اۋىل شارۋاشىلىعى مينيسترلىگى قازاقستاندا اۋسىل اۋرۋىنىڭ تىركەلگەنىن رەسمي تۇردە راستادى، دەپ حابارلايدى «ادىرنا» ءتىلشىسى كازتاگ-قا سىلتەمە جاساپ.
«قاراعاندى وبلىسى شەت اۋدانىنىڭ كيىكتى اۋىلدىق وكرۋگىندە دەنە قىزۋى كوتەرىلىپ، جەم-شوپتەن باس تارتقان ءىرى قارا مال انىقتالدى. دياگنوزىن انىقتاۋ ءۇشىن وسى جانۋارلاردان بيولوگيالىق ماتەريال سىنامالارى الىندى، ولار قر اۋىل شارۋاشىلىعى مينيسترلىگى ۆەتەريناريالىق باقىلاۋ جانە قاداعالاۋ كوميتەتىنىڭ ۆەتەريناريا بويىنشا ۇلتتىق رەفەرەنتتىك ورتالىعىنا جىبەرىلدى. زەرتحانالىق زەرتتەۋلەردىڭ ناتيجەلەرى بويىنشا اۋسىل دياگنوزى قويىلدى»،– دەلىنگەن حابارلامادا.
وسى جاعدايعا بايلانىستى 14 قاڭتاردا كيىكتى اۋىلدىق وكرۋگى اكىمىنىڭ شەشىمىمەن اۋرۋ مالدار تابىلعان «مۇرات» فەرمەرلىك شارۋاشىلىعىنا كارانتين قويىلدى.
«رەسپۋبليكالىق ەپيزووتياعا قارسى وترياد» رمم ۆەتەريناريالىق-كارانتيندىك ءىس-شارالاردى جۇرگىزۋگە كىرىستى، ينفەكتسيا وشاعىن جويۋ بويىنشا ارنايى تەحنيكا مەن 16 مامان جۇمىلدىرىلدى. وڭىردەگى ەپيزووتيالىق جاعداي باقىلاۋدا»، - دەپ تولىقتىردى اۋىل شارۋاشىلىعى مينيسترلىگى.
ەستەرىڭىزگە سالا كەتەيىك، 12 قاڭتاردا رەسەي اۋسىل اۋرۋىنا بايلانىستى قازاقستاننان ەت پەن ءسۇت اكەلۋدى شەكتەگەن بولاتىن.
اۋسىل - جىلقىدان باسقا تۇلىكتىڭ بارلىعىندا كەزدەسەتىن قاتەرلى ىندەت ءتۇرى. وعان شالدىققان مالدىڭ كوزى جاساۋراپ، اۋزىنان سىلەكەي اعادى، كۇلدىرەۋىكتەر شىعىپ، جۇقا تەرىلى جەرگە دەيىن ءورشىپ، تۋتاسىپ، ءىرىڭدى سۋعا اينالادى. ەكى- ءۇش كۇننەن كەيىن كۇلدىرەگەن ءتىلىن سالبىراتىپ، سىلەكەيىن توقتاۋسىز شۇبىرتا باستايدى.
«ادىرنا» ۇلتتىق پورتالى
