Shymkentte 5 qańtardan bastap engizilgen tótenshe jaǵdaıǵa baılanysty oqýshylar men stýdentterdiń qysqy demalysy uzartyldy. Al balabaqshalar shtattyq rejımde jumys isteıdi. Sonymen qatar 10 qańtar men 10 aqpan aralyǵynda ótkizilýge josparlanǵan Ulttyq biryńǵaı testileýge de ózgerister engizildi. Bul týraly Shymkent qalalyq bilim basqarmasynyń basshysy Janat TÁJIEVA málimdedi.
Janat Arysbekqyzy QR Bilim jáne ǵylym mınıstrliginiń tikeleı buıryǵymen mektepterde qysqy demalys 17 qańtarǵa deıin, al kolledjder men JOO stýdentteriniń demalysy 24 qańtarǵa deıin uzartylǵanyn jetkizdi. Elimizde tótenshe jaǵdaı rejıminiń engizilýine baılanysty 2022 jylǵy 10 qańtar men 10 aqpanǵa josparlanǵan ulttyq biryńǵaı testileý (budan ári - UBT) 25 qańtar men 22 aqpan aralyǵynda ótkiziletin bolady. Bul rette, 11 qańtar men 24 qańtar aralyǵyndaǵy josparlanǵan UBT kelesi kúnderge:
- 11 qańtarda ótkiziletin UBT 29 qańtarǵa;
- 12 qańtardaǵy UBT – 5 aqpanǵa;
- 13 qańtardaǵy UBT – 11 aqpanǵa;
- 14 qańtardaǵy UBT – 12 aqpanǵa;
- 15 qańtardaǵy UBT – 21 aqpanǵa;
- 17 qańtardaǵy UBT – 14 aqpanǵa;
- 18 qańtardaǵy UBT – 15 aqpanǵa;
- 19 qańtardaǵy UBT – 16 aqpanǵa;
- 20 qańtardaǵy UBT – 17 aqpanǵa;
- 21 qańtardaǵy UBT – 18 aqpanǵa;
- 24 qańtardaǵy UBT – 19 aqpanǵa shegeriletin bolady. Al, basqa merzimge josparlanǵan UBT óz ýaqytymen ótetin bolady. Sonymen qatar, UBT-ǵa ótinishterdi qabyldaý merzimi 2022 jylǵy 21 qańtarǵa deıin uzartylatynyn atap ótti.
– Joǵary jáne joǵary oqý ornynan keıingi bilim berý baǵdarlamalaryn iske asyratyn bilim berý uıymdarynyń bilim alýshylary men mektep oqýshylaryna UBT merziminiń ózgergeni týraly habarlaımyz. Testilenýshi ózgergen testileý kúnimen jeke kabınetinen tanysa alady. Prezıdentimiz Q.K. Toqaevtyń syn saǵatta janymyzda bolyp, barlyq ahýaldy birden baqylaýǵa alyp, halqyna arnaǵan Úndeýin tyńdap, jaǵdaıdyń jaqsaratynyna sendik. Egemen el retinde qýatty memleketke aınalatynymyzǵa senemiz. Qalamyzdaǵy jaǵdaılarǵa baılanysty ata-analarǵa balalarynyń qaýipsizdigin qamtamasyz etýlerin, úıden shyǵarmaı ustaýlaryn jáne únemi eresek adamdardyń janynda bolýyn qadaǵalaýlaryńyzdy suranamyz, - dedi J.Tájıeva.
