Almatynyń sybaılas jemqorlyqqa qarsy qyzmeti qyrkúıek aıynda ótken «AlmatyTikTokChallenge» baıqaýynyń qujattaryn zerttep jatyr, dep habarlaıdy «Adyrna» tilshisi orda.kz-ke silteme jasap.
Qalanyń kreatıvti ındýstrııalar basqarmasy «AlmatyTikTokChallenge» baıqaýyn ótkizgen bolatyn. Onyń nátıjeleri boıynsha baıqaý uıymdastyrýshysynyń balalary jeńimpaz atandy. Bul áleýmettik jelilerde qoǵamdyq rezonans týdyrdy.
«Sybaılas jemqorlyqqa qarsy is-qımyl agenttiginiń departamenti mán-jaıdy qarastyryp jatyr. Onyń aıasynda Almatynyń kreatıvti ındýstrııa basqarmasynan TikTok konkýrsynyń qujattary suraldy. Suratylǵan qujattardy alǵannan keıin jáne olardy zerdelegennen soń odan ári sheshim qabyldanady. Bul týraly sizge qosymsha habarlaımyz», – dep túsindirdi basshynyń birinshi orynbasary Danııar Taýmurat.
Ákimdik bul baıqaýdy ótkizýge 31 mln teńge jumsaǵan.
Jeńimpazdar syılyqqa qymbat tehnıka aldy. Baıqaýǵa qatysý úshin TikTok áleýmettik jelisinde #Almatyday2021 tegimen beıne jarııalaý qajet boldy.
Jeńimpazdardy qaralym sany men beıneniń kreatıvtiligi boıynsha anyqtady.
«Adyrna» ulttyq portaly