Búgin memlekettik mereke – Tuńǵysh Prezıdent kúni. Osy oraıda Elbasy Nursultan Nazarbaevtyń qatysýymen 2021 jyly ótken sharalarda sóılegen birqatar qanatty sózin usynamyz.
2021 jylǵy 7 qańtarda Nursultan Nazarbaevqa Qazaqstan Pravoslav shirkeýiniń joǵary nagradasy – «Alǵys» ordeni tabys etildi.
«Táýelsizdiktiń alǵashqy kúnderinen bastap biz toleranttylyqty, barlyq etnostar jáne dinı konfessııalar dostyǵy men senimin nyǵaıtý saıasatyn ustandyq. Birlik pen dostyq – turaqtylyq pen damýdyń kepili».
2021 jylǵy 10 qańtarda Qazaqstannyń Tuńǵysh Prezıdenti Nur-Sultan qalasyndaǵy №115 saılaý ýchaskesine bardy.
«Otyz jyl ishinde biraz sharýa atqaryldy. Ynta-jiger men bereke-birliktiń arqasynda birtalaı jetistikke qol jetkizdik. Eń bastysy – biz memlekettiń negizin qaladyq».
2021 jylǵy 11 qańtarda Elbasy Nursultan Nazarbaev «Nur Otan» partııasynyń respýblıkalyq saılaýaldy shtabyna bardy.
«Álemde koronavırýs indetine shaldyqqandar sany artýda. Dúnıejúzilik bank álemdik ekonomıkanyń quldyraýy men jumyssyzdyq ósedi dep boljap otyr. Bul jaǵdaıda birtutas saıası kúshtiń aınalasyna toptasqan qoǵam ǵana jeńiske jetedi».
2021 jylǵy 11 qańtarda Nursultan Nazarbaev Qazaqstan halqy Assambleıasynan Parlament Májilisine saılanatyn depýtattarǵa daýys berý rásimine qatysty.
«Qazaqstan halqy Assambleıasynan Parlament Májilisine usynylyp otyrǵan toǵyz kandıdat – Qazaqstanda turatyn túrli etnos ókilderi. Biz Assambleıany saqtap, onyń ınstıtýttarynyń damýyn qamtamasyz etýimiz kerek. Osy 25 jyldyń ishindegi qyzmeti men qoldaýy úshin barlyq Assambleıa múshelerine rızashylyǵymdy bildiremin. Tek birliktiń arqasynda biz tolaǵaı tabysqa jetip, Qazaqstandy órkendetemiz».
2021 jylǵy 3 aqpanda Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń tóraǵalyǵymen Qaýipsizdik Keńesiniń otyrysy ótti.
«Ekonomıkalyq, tehnologııalyq, áleýmettik ahýal men syrtqy jaǵdaılar qalaı ózgerse de, bizdiń eshqashan myzǵymaıtyn ulttyq múddelerimiz bar. Bul – Qazaqstannyń egemendigi, aýmaqtyq tutastyǵy, birlik, saıası turaqtylyq, azamattardyń ál-aýqaty jáne áleýmettik ádildik. Ulttyq qaýipsizdik strategııasy osy qundylyqtardy qorǵaýǵa, bıyl 30 jyldyǵyn atap ótip jatqan Táýelsizdigimizdi nyǵaıtýǵa negizdelgen».
2021 jylǵy 31 naýryzda Elbasy Túrkitildes memleketterdiń yntymaqtastyq keńesiniń beıresmı sammıtine qatysty.
«Meniń usynysym boıynsha «Túrki áleminiń keleshegi – 2040» qujaty der kezinde ázirlendi dep esepteımin. Bul qujatty bıyl kúzde Túrkııada ótetin kezekti sammıtte qabyldaımyz. Bakýdegi sammıtte Keńesti Uıym deńgeıine kóterýdi usynǵan bolatynmyn. Sol mańyzdy usynysty qoldaǵandaryńyz úshin barshańyzǵa alǵysymdy bildiremin».
2021 jylǵy 28 sáýirde Qazaqstan Respýblıkasynyń Tuńǵysh Prezıdenti – Elbasynyń tóraǵalyǵymen Qazaqstan halqy Assambleıasynyń XXIX sessııasy ótti.
«Qazirgi naryqtyq ekonomıkany jańadan qurdyq, irgeli reformalar tabysty júzege asty. Sonyń arqasynda Qazaqstan álemdegi damyǵan 50 memlekettiń jáne tabys deńgeıi ortashadan joǵary elderdiń qataryna qosyldy. Elimiz jahandyq ulttar qoǵamdastyǵynyń bedeldi ári senimdi múshesine aınaldy – kók týymyz Birikken Ulttar Uıymynyń shtab-páterinde jelbirep tur. Biz halyqaralyq arenada ózimizdiń ulttyq múddelerimiz ben basymdyqtarymyzdy júıeli túrde qorǵap kelemiz. Qazaqstannyń memlekettik shekarasy zań júzinde bekitilip, ony álemniń barlyq elderi moıyndady».
2021 jylǵy 11 mamyrda Nursultan Nazarbaev Mýzykalyq drama teatrdyń ashylý rásimine qatysty.
«Túrkistan qazirgideı jańǵyrýdy buryn-sońdy basynan ótkizip kórgen emes. Tanymastaı bolyp ózgerdi. Bul jer qazaqstandyqtar úshin ǵana emes, barlyq týrıster úshin de biregeı mekenge aınalady».
2021 jylǵy 19 mamyrda Qazaqstan Respýblıkasynyń Tuńǵysh Prezıdenti – Elbasynyń tóraǵalyǵymen Qaýipsizdik Keńesiniń otyrysy ótti.
«Shekarany barlyq qaýip-qaterden qorǵaýdy qamtamasyz etý kerek. Shekara qyzmeti men Qarýly Kúshterdi qurý ózara úılesimdi ári biryńǵaı standart boıynsha júrgizilýge tıis. Sonymen birge shekaralyq qaýipsizdik máselesin keshendi, júıeli túrde qarastyrǵan jón».
2021 jylǵy 21 mamyrda Nursultan Nazarbaev Joǵary Eýrazııalyq ekonomıkalyq keńestiń otyrysyna qatysty.
«Senimdi seriktestermen jáne odaqtastarmen birlesip qana elderimizdiń ekonomıkalyq qaýipsizdigi men táýelsizdigin qamtamasyz etýge bolady. Eýrazııa ekonomıkalyq odaǵy qurylǵannan beri uıym músheleri eń kúrdeli jaǵdaıda da ózara mámilege kelip, bir-birin qoldaıtyn seriktester ekenin kórsetti. Qazirgi jaǵdaıǵa baılanysty biz ıntegraııa men ózara túsinistikti budan da arttyra túsýimiz kerek».
2021 jylǵy 2 shilde de Nursultan Nazarbaev elordanyń «jasyl beldeýiniń» damý barysymen tanysty.
«Tabıǵatty aıalap, tazalyq saqtaý qajet. Aǵashtardy órtten qorǵap, joıylyp ketýine jol bermeý kerek. Munyń bári ózimizdiń balalarymyz úshin, keler urpaqtyń ıgiligi úshin jasalyp jatyr. Olar osyndaı keremet syı qaldyrǵanymyz úshin bizdi maqtan tutatyn bolady. Týǵan jerge degen mahabbat – qazaqstandyq patrıotızmniń mańyzdy bóligi».
2021 jylǵy 8 qyrkúıekte Elbasy BUU Bas Assambleıasynyń joǵary deńgeıdegi plenarlyq otyrysyna qatysýshylarǵa úndeý joldady.
«Osydan otyz jyl buryn men álemdegi eń iri ıadrolyq polıgonnyń biri – Semeı ıadrolyq polıgonyn jabý týraly Jarlyqqa qol qoıdym. Bul adamzat tarıhynda ıadrolyq synaqtar ótkizýge zańdyq turǵyda tyıym salǵan alǵashqy sheshim edi. Semeı polıgonynan keıin dúnıe júzi boıynsha basqa da polıgondar jabyldy nemese toqtatyldy. Iadrolyq synaqtarǵa tyıym salý jahandyq sıpatqa ıe boldy».
2021 jylǵy qarashada QR Tuńǵysh Prezıdentiniń tóraǵalyǵymen «Nur Otan» partııasy Saıası keńesiniń keńeıtilgen otyrysy ótti. Onda Nursultan Nazarbaev partııa tóraǵasy retindegi óz ókilettiligin el Prezıdenti Qasym-Jomart Toqaevqa berý týraly sheshim qabyldady.
«Men partııamyzdyń negizin qalap, oǵan osy jyldar ishinde basshylyq ettim. «Nur Otan» partııasyn el Prezıdenti basqaryp, onyń saıasaty men strategııasyn ózi aıqyndap otyrýy mańyzdy ekenin jaqsy bilemin. Buǵan deıin de solaı boldy. Biz partııa Jarǵysyna súıene otyryp, sheshim qabyldaýymyz kerek. Bul – bizdiń birligimizdi kórsetetin qadam», – dedi Elbasy.
