Táýelsizdiktiń 30 jyldyǵyna oraı Shymkent qalalyq Abaı aýdany ákimdiginiń uıymdastyrýymen saltanatty is-shara ótti. Abaı saıabaǵynda uıymdastyrylǵan merekege zııaly qaýym ókilderi, ardagerler, aýdan turǵyndary jınaldy. Aldymen kópshilik Abaı aýdanyna qarasty bastaýysh bilim berý uıymdary uıymdastyrǵan merekelik kórmeni tamashalady. Tárbıeshiler balǵyndarmen birge jasaǵan táýelsizdik belgilerin aıshyqtaıtyn túrli buıymdardy kelýshiler nazaryna usyndy.
– Qurmetti qala turǵyndary men qonaqtary. Sizderdi elimizdiń eń ulyq merekesi – Táýelsizdik kúnimen shyn júrekten quttyqtaımyn! Osynaý jyldar ishinde Qazaqstanymyz, onyń ishinde Shymkent qalasy men Abaı aýdany aıtarlyqtaı jetistikterge jetti. Sol jetistikterdiń ishinde sizderdiń de úlesterińiz bar. Táýelsiz Qazaqstan máńgi jasaı bersin! – dedi kópshilikti merekemen quttyqtaǵan Abaı aýdanynyń ákimi Buharbaı Parmanov.
Budan keıin aýdannyń kórkeıýine úles qosyp júrgen bir top ardager men kásipkerler, qoǵam belsendileri aýdan ákiminiń Alǵys hatymen marapattaldy. Merekelik is-shara konerttik baǵdarlamamen jalǵasty.
