Úshinshi megapolıste merekelik jıyn ótti. Qalalyq ishki saıasat jáne jastar isteri jónindegi basqarma uıytqy bolǵan saltanatty is-shara el táýelsizdiginiń 30 jyldyǵy men Jeltoqsan oqıǵasynyń 35 jyldyǵyna arnaldy. Jastar ortalyǵyna 1986 jylǵy Jeltoqsan oqıǵasyna qatysýshylar jınalyp, azattyqtyń aq tańyn jaqqan sol oqıǵa týraly derekti fılmdi tamashalady.
– Qurmetti Jeltoqsan oqıǵasyna qatysýshylar! Bıyl – el táýelsizdiginiń 30 jyldyǵy, sondaı-aq, egemendik jolymyzdaǵy eren jaǵdaı – 1986 jylǵy Jeltoqsan oqıǵasyna 35 jyl tolyp otyr. 30 jyl ishinde jas memleketimiz qanshama jetistikke qol jetkizdi. Ekonomıkalyq turǵydan kemeldengen, saıası ustanymy sarabdal, básekege qabiletti, ózindik basqarý júıesi men mádenıeti qalyptasqan, álem elderi sanasatyn qýatty memleketke aınaldy. Elimizdiń osy dárejege jetýine qosqan úlesterińiz zor. Sizderdiń sol kezde kórsetken batyldyqtaryńyz búgingi jas urpaqqa úlgi. Biz jeltoqsanshylardyń erligin eshqashan umytpaımyz. Barshańyzdy Táýelsizdik kúni merekesimen shyn júrekten quttyqtaımyn. Denderińiz saý, otbasylaryńyz aman bolsyn! Táýelsiz Qazaqstannyń bolashaǵy jarqyn, keleshegi kemel bolsyn! – dedi Shymkent qalalyq ishki saıasat jáne jastar isteri jónindegi basqarmasy basshysynyń mindetin atqarýshy Muratjan Shotanov.
Merekelik jıynda Jeltoqsan oqıǵasyna qatysýshylar marapattaldy. Saıası qýǵyn-súrgin qurbany retinde tanylǵan jáne aqtalǵan azamattardyń keýdesine QR Prezıdenti Qasym-Jomart Toqaevtyń 2021 jylǵy 2 jeltoqsandaǵy Jarlyǵymen Qazaqstan Respýblıkasy táýelsizdiginiń 30 jyldyǵyna arnalǵan merekelik medaldar taǵyldy. Al birqatar azamatqa Shymkent qalasy ákiminiń Alǵys haty tabystaldy. Jıyn sońy konerttik baǵdarlamaǵa ulasty.
Nýrlan Bektaev
Serik Qosaev
