QR Táýelsizdigiń 30 jyldyǵyna oraı "Rýhanı jańǵyrý" baǵdarlamasy aıasynda Taldyqorǵan qalasynda respýblıkalyq IQ Doda zııatkerlik oıyny ótti. Úshinshi megapolıstiń "Shymqala" komandasy elimizdiń túkpir-túkpirinen jınalǵan 17 quramanyń arasynan júldeli úshinshi oryndy ıemdendi.
Zııatkerlik oıynnyń maqsaty - “Rýhanı jańǵyrý” baǵdarlamasy ıdeıalaryn júzege asyrý, qazirgi zamannyń jańa jaǵdaılaryna sáıkes standartty emes derbes oılaýdy, ıntýıııany, zııatkerlik qabiletti damytý, tabystyń irgeli faktory retinde jańashyldyq pen bilimdi nasıhattaý bolatyn.
Taldyqorǵanǵa Shymkentten qalalyq oqýshylar saraıynyń dırektory Mustafaev Baqytjan Nurǵazyuly, "Shymkent aqparat ortalyǵy" JShS dırektory Orymbaev Nurbol Ábdezimuly, OQMPÝ jastar saıasaty bóliminiń meńgerýshisi Tasbolat Bekdaýlet Beısenbaıuly, Á. Qýatbekov atyndaǵy Halyqtar dostyǵy ýnıversıtetiniń áleýmettik tárbıe jáne jastar isi jónindegi bólim basshysy Álibek Bekseıit Áshirbekuly quraǵan komanda namysty qoldan bermeı, eki kún ishinde úzdik nátıje kórsetti.
Qatysýshylar logıka, tapqyrlyq jáne bilimin qoldana otyryp, jan-jaqty qyzyqty suraqtarǵa jaýap berdi. Aqtyq kezeńde 7 komandamen oı júıriktigin synǵa salǵan jerlesterimiz az ǵana upaı aıyrmashylyǵymen Túrkistan oblysynyń " Turan" komandasy (28 upaı) men pavlodarlyq "Ertis" komandasyna (27 upaı) jol berip, "Shymqala" (26 upaı) úzdik úshtik qatarynan kórindi. Jerlesterimizdi júldemen quttyqtaımyz!
