Shymkentte Táýelsizdiktiń 30 jyldyǵyna oraı Oqýshylar saraıynda «Táýelsiz el - tuǵyrym» atty merekelik kesh ótti. Saltanatty jıynǵa qatysqan qala ákiminiń birinshi orynbasary Shyńǵys Muqan kópshilikti merekemen quttyqtap, mektep ustazdaryn «Eren eńbegi úshin» jáne «Táýelsizdiktiń 30 jyldyǵy» tósbelgisimen marapattady. Is-sharada «Aıbyn - 2021» VII respýblıkalyq áskerı-patrıottyq jastar jıyny qorytyndylandy.
-Táýelsizdik ár azamat qasterleıtin qundylyq. Sońǵy 30 jyldyń ár on jyldyǵy bir ǵasyrdyń júgin arqalap turdy desek artyq aıtqandyq emes. Memlekettiliktiń nyshandary osy jyldary qalandy. Shymkentte 30 jyl buryn 400 myń halyq bolsa, sońǵy sanaq boıynsha 1 mln 200 myńǵa jettik. 3 ese halyq sany ósip otyr. Mektepter 70-ten 200-ge artty. Oqýshylar da 70 myńnan 230 myńǵa óskenin baıqaýǵa bolady. Ótken jyly úshinshi megapolıste 33 myń sábı jaryq dúnıe esigin ashty. Búgingi sapta turǵan jas sarbazdar – erteńgi Otan qorǵaýshylar. Olardyń naǵyz erjúrek jaýyngerge aınalaryna senemiz, - dedi Shyńǵys Jumabekuly.
Marapattaý rásiminde Shyńǵys Muqan halyqaralyq ekologııa, ınjenerııa jáne pedagogıka ǵylymdar akademııasy men Qazaqstan Respýblıkasynyń Ybyraı Altynsarın atyndaǵy ulttyq akademııasymen birlesip uıymdastyrylǵan «KÓShBASShY PEDAGOG – 2021» konkýrsynyń jeńimpazy Sharıpa Úmenovaǵa avtokólik kiltin tabystady.
«Aıbyn - 2021» VII respýblıkalyq áskerı-patrıottyq jastar jıynynyń qalalyq irikteý oıyndarynan jeńimpaz atanǵan úsh áskerı-patrıottyq klýbynyń múshelerin jeńisterimen quttyqtady. «Aıbyn» áskerı-patrıottyq jıyny – otanshyl jastardy adal qyzmet etýge, el qorǵany bolýǵa tárbıeleıtin biregeı alań ekenin atap ótti.
Azamat JAPPAR,
Serik QOSAEV.
