Búgin Nur-Sultan qalasynda QR Prezıdenti janyndaǵy Ortalyq kommýnıkaııalar qyzmeti alańynda Shymkent qalasynyń ákimi Murat Áıtenovtiń qatysýymen brıfıng ótti. Onda úshinshi megapolıs ákimi Memleket basshysy tapsyrmalarynyń oryndalýy men qalanyń áleýmettik-ekonomıkalyq damýy týraly baıandady.
Shymkentte ótken on bir aıda barlyq salada ekonomıkalyq ósim dınamıkasy baıqaldy. Ekonomıkanyń negizgi sektorlaryna jeke toqtalar bolsaq, ótken jyldyń tıisti kezeńimen salystyrǵanda ónerkásip ónim kóleminiń ındeksi 6,3 paıyzǵa, ınvestıııa kólemi – 55 paıyzǵa, qurylys jumystary – 9,6 paıyzǵa, paıdalanýǵa berilgen turǵyn úıler alańy – 63,6 paıyzǵa, bólshek saýda kólemi – 9,8 paıyzǵa artqan.
Murat Áıtenov turǵyndardyń ómir súrý sapasyn arttyrý, olarǵa jaıly ári qaýipsiz orta qalyptastyrý jónindegi mindetter birinshi kezekte atqarylýy tıis jumystar retinde belgilenip, qalanyń ınjenerlik ınfraqurylymyn damytýǵa aıryqsha kóńil bólingenin jetkizdi.
«Bes jyl ishinde halyqty 100 paıyz taza aýyz sýmen qamtamasyz etýimiz qajet. Búgingi kúnge Shymkentte 5 eldi meken kestemen berilse, 7 eldi meken tasymaldy aýyz sýmen qamtylǵan. Aǵymdaǵy jyly 16 mlrd. teńgege sý qubyrynyń qurylysy júrgizilýde. Nátıjesinde 25 myńnan astam adam sapaly aýyz sýmen qamtylady. Jospar boıynsha 2023 jyly aýyz sý máselesi tolyǵymen sheshiledi. 16 eldi mekende elektr energııasynyń sapasy tómen. Bıyl 9,8 mlrd. teńgege 19 nysannyń qurylysy júrgizilýde. Nátıjesinde qamtý deńgeıi 95 paıyzdan 97 paıyzǵa jetedi. Aǵymdaǵy jyly gazben qamtý boıynsha 5,9 mlrd. teńgege 18 nysannyń qurylysy júrgizilýde. Qalany gazdandyrý máselesi 2025 jyly tolyǵymen sheshiledi»,-dedi qala ákimi.
Bıylǵy jyly turǵyndardy káriz júıesimen qamtý deńgeıi 52 paıyzdan 54 paıyzǵa jetedi. Damý jospary boıynsha 2025 jyly kárizben qamtý kórsetkishi 75 paıyzǵa jetpek.
Shymkent qalasy ákimdiginiń baspasóz qyzmeti
