Qazaqstanda ótken 10-shy Azamattyq forým máresine jetti. El Táýelsizdiginiń 30 jyldyǵyna oraı Almaty qalasynda ótken saltanatty jıyndy tikeleı baılanys arqyly elimizdiń barlyq óńirlerindegi Azamattyq Alıans músheleri tamashalady.
Plenarlyq sessııaǵa QR Prezıdenti ákimshiligi basshysynyń orynbasary Dáýren Abaev, QR Aqparat jáne qoǵamdyq damý mınıstri Aıda Balaeva jáne Qazaqstan Azamattyq Alıansynyń jetekshileri men músheleri, qoǵamdyq uıymdardyń ókilderi qatysty.
Bıylǵy azamattyq forýmnyń ereksheligi – oǵan halyqaralyq uıym ókilderiniń de qatysýy boldy. Plenarlyq sessııa otyrysy men odan keıingi marapattaý rásimin Shymkent qalasynyń ishki saıasat jáne jastar isteri jónindegi basqarma basshylary men qalalyq Azamattyq Alıans músheleri onlaın tamashalady.
Plenarlyq sessııada Shymkent qalalyq «Sana-sezim» qoǵamdyq birlestiginiń jetekshisi Shahnoza Hasanova sóz alyp, áıelder, eńbek mıgranttary men adam saýdasy qurbandarynyń quqyqtaryn qorǵaý jónindegi jetistikterimen bólisti.
Almatyda ótken saltanatty jıynda eren eńbegimen kózge túsken úkimettik emes uıymdarǵa bıyl alǵash ret «Tańdaý» respýblıkalyq premııasy tabystaldy. Marapattalǵan úkimettik emes uıymdardyń arasynda «Shymkent qalalyq ACCESS túlekteri ASAA» uıymy da boldy.
Forým jumysy aıaqtalǵan soń Shymkent qalasynyń ishki saıasat jáne jastar isteri jónindegi basqarma basshysynyń orynbasary Beksultan Ádilhanov qatysýshylardy Táýelsizdiktiń 30 jyldyǵymen quttyqtap, azamattyq qoǵamdy damytý jolyndaǵy jumystaryna sáttilik tiledi. Birqatar úkimettik emes uıymdarǵa marapattar tabystady.
Nurlan BEKTAEV
Foto: Serik QOSAEV
