Májilis depýtaty Bekbolat Tileýhan dıssıdent, aqyn, marqum Aron Atabekti "elbuzar" dep aıyptady. Aıtýynsha, "Shańyraq" oqıǵasy kezinde Aron Atabek onyń kómekshisi bolǵandyqtan, depýtat onyń múddesin qorǵaǵan. Tipti, sol úshin ishki ister mınıstri men Almatynyń sol kezdegi ákimi Imanǵalı Tasmaǵambetovpen kezdeskenin aıtady. Alaıda istiń mán-jaıyp bilgende, ókingenin jetkizdi. Bul týraly "Azattyq radıosy" habarlady.
Bekbolat Tileýhannyń oıynsha, 18 jylǵa sottalǵan aqynǵa berilgen jaza ádil bolǵan.
"Bári zań boıynsha boldy. Men qasynda bolǵan joqpyn. Maǵan dálel keltirdi. Qoǵamdyq kómekshimdi qorǵadym, biraq onyń isi qate boldy. Sot durys jasady. Advokattardyń, tekserýshilerdiń sózine qarasaq, bári zańdy", - dedi Tileýhan.
Depýtat Atabektiń sózine elpildep, emoııaǵa berilgenin atap ótti.
"Ol qazaq úshin júgirgen joq. Belgili bir saıası kúshterdiń múddesin qorǵaǵanyn bilmedim. Ókinip qaldym. Sol kezde shyn júregimmen halyqqa jany ashıdy dep qorǵadym. Keıin saıası qural, dıssıdent ekenine kózim jetti", - degen Tileýhan marqum Atabekti "elbuzar" dep aıyptady.
Sondaı-aq, depýtat Aron Atabekti "qazaqtyń aqyny" dep ataǵan jýrnalıstke ashýlandy.
"Ol - orystyń aqyny, orys mádenıetiniń ókili. Adam qaı tilde sóılese, sol elge qyzmet etedi. Ol kisi qalmaqtyń dinindegi putqa tabynýshy bolǵan. Júregi de, tili de, dini de qazaqsha emes", - dep málimdedi Tileýhan.
“Adyrna” ulttyq portaly
