Shymkentte «Qazaqstan halqy Assambleıasy» ǵımaratynda Ulttyq mádenı ortalyqtar kúni atalyp ótti.
Bul Táýelsizdiktiń 30 jyldyq mereıtoıyna arnalǵan «30 jyldyqqa – 30 juldyzdy kún» atty is-sharalar sherýi aıasynda ótýde.
Bir aılyq akııa aıasynda «Tuǵyrly táýelsizdik» atty is-sharaǵa qatysqan qala ákiminiń birinshi orynbasary Shyńǵys Muqan ortalyqta jańadan jasaqtalǵan etno murajaıdy aralap, «Beıbitshilik pen kelisim jolymen» televızııalyq jobasy fılmin tamashalady.
Televızııalyq jobanyń basty maqsaty – Qazaqstan Respýblıkasynyń Tuńǵysh Prezıdenti – Elbasy N.Á.Nazarbaevtyń ulttyq egemendik pen táýelsizdikti nyǵaıtýdaǵy, beıbitshilik pen kelisim saıasatynyń qundylyqtaryn shoǵyrlandyrýdaǵy rólin kórsetý.
Alqaly jıynda sóz alǵan Shyńǵys Jumabekuly Qazaqstan halqy Assambleıasynyń mán-mańyzyna, el birliginiń yntymaqtyǵyna toqtalyp, memlekettiń bolashaǵy, elimizdiń ósip-órkendeýiniń túp qazyǵy tatý-tátti tirshilikte ekenin jetkizdi.
– Elimiz táýelsizdigin alǵan tusta alpaýyt elderdiń saıasatkerleri men halyqaralyq sarapshylar kópultty elimizdiń bolashaǵyna kúmánmen qarady. Túrli pessımısttik boljamdaryn aıtty. Degenmen bárimiz bir týdyń astyna birigip, sol ómirsheń emes boljam ekenin dáleldeı aldyq. Elbasynyń sarabdal saıasatyn kóptegen el úlgi etip aldy. Biz sol basqa qonǵan baǵymyzdy baǵalaı bilýimiz kerek, - dedi Sh. Muqan.
Jıyndy Shymkent qalasynyń ishki saıasat jáne jastar isteri jónindegi basqarmasy basshysynyń mindetin atqarýshy M.Shotanov júrgizdi. Is-sharaǵa etnomádenı birlestikterdiń tóraǵalary men ókilderi, QHA janyndaǵy qoǵamdyq qurylymdardyń (Qoǵamdyq kelisim, Analar keńesteri, Medıaııa keńesi, «Jańǵyrý joly» jastar qozǵalysy, ǵylymı-sarapshylyq top) jetekshileri men Qoǵamdyq kelisim» KMM-niń qyzmetkerleri qatysty.
Al «XIII legion» salaýatty ómir saltyn qalyptastyrý ortalyǵynyń jetekshisi, volonter Tımýr Shaıdýllın, qalalyq slavıan etnomádenı birlestiginiń múshesi, «Jýsan» bankiniń bólim basshysy Iýlııa Drobıazko, tatar-bashqurt etnomádenı birlestiginiń tóraıymy Asıa Muhamedova, qalalyq Qazaqstan halqy Assambleıasy janyndaǵy medıaııa keńesiniń tóraıymy Laýra Aqshegirova jáne paýerlıftıng boıynsha 7 dúrkin álem chempıony Ksenııa Han qasterli táýelsizdigimiz týraly tushymdy oılaryn ortaǵa saldy.
Azamat JAPPAR,
Foto – Serik QOSAEV.
