Anardyń oıynshyqtaryna Úndistan, Afrıka, Túrkııa, Reseı elinen tapsyrys túsken

Býyny aýyratyndyqtan Anar kóp júre almaıdy. Biraq soǵan bola taǵdyryna nalyp, ómirine eshýaqytta ókpe artqan emes. Kerisinshe, oǵan qarap, álemdi meıirimge toltyrǵysy keletin, aınalasyna izgiliktiń shýaǵyn shashyp júrgen qaısar da názik arýdy kóresiń.

"Jeltoqsan oqıǵasyna qatysqan ákemdi úlgi tutamyn"

Ol toǵyzynshy synypqa deıin barlyq bala sekildi jalpy orta mektepte bilim aldy. Taýǵa shyqqandy jaqsy kóretin. Jańbyrdan keıin qurbylarymen sańyraýqulaq jınaıtyn. Toǵyzynshy synypty bitirip, qolyna kýálik alǵan soń, O.Tańsyqbaev atyndaǵy Almaty sándik qoldanbaly óner kolledjiniń grafıkalyq dızaıner mamandyǵyna qujat tapsyrdy. Biraq oqýyn jalǵastyra almady. Densaýlyǵy kúrt nasharlap, aýrýhana tósegine tańyldy. Uzaq ýaqyt em qabyldady.

– Sol jyldary qatty aýyrdym. Úı men aýrýhananyń eki ortasynda júrdim. Kishkentaıymnan sýret salǵandy unatatynmyn. Dızaıner bolamyn degen armanym jaıyna qaldy. Eń bastysy – ata-anam men baýyrlarym janymda. Baqyt degen – jaqyndaryńnyń amandyǵy, olardyń júzderindegi kúlki jáne qoldaýy eken.

Úıde tórt qyzbyz. Men úshinshimin. Ata-anamyz bizdi qatardan kem qylmaı ósirdi. Bar jyly-jumsaǵyn aýzymyzǵa tosty. Bala kezden birge oınap-ósken qurbylarym qıyndyqta janymnan tabyldy. Sondyqtan shyǵar, ózimdi múgedekpin dep, ózgelerden ózgeshe sezingen emespin.

Ákem Saılaý Lepesovti úlgi tutamyn. Ol 1986 jyly Jeltoqsan oqıǵasyna qatysqan. Taıaq jep, qamalǵan. Onyń aldynda órtenip jatqan úıge qoıyp ketip, eki orys qyzdy qutqaryp qalǵan eken. Sonyń óteýi bolar, bir polıııa bosatyp jiberipti.

Bala kezimde "Baldyrǵan" jýrnalyn, "Jas Alash", "Qazaq ádebıeti" gazetterin oqytyp qoıatyn, ózi de jıi maqalalar jazyp turdy. Bizdi asyraý úshin kúzetshi bolyp ta istedi. Aýla da sypyrdy. Qazir jýrnalıstıka salasyna qaıta oraldy, – deıdi Anar.

"Jarnama qaǵazyn ilýden bastadym"

Anar ata-anasynyń qolyna qarap, kúnuzaq tórt qabyrǵaǵa qamalyp, úıde otyrǵandy jón kórmeıdi. Kúsh-qýatyn jınap, jumys izdeýge kirisedi. Tabylǵany – kóshe-kósheni aralap, aıaldamaǵa, podezdge habarlandyrý jabystyrý. Uzaq ýaqyt adymdap júre almaıtynyn bilse de, amalsyz kelisedi. Óıtkeni dári-dármek alý kerek.

– Sol kezde "Megalaın" men úıfonnyń saýdasy qyzý júrip jatqan. Kúnine 300 qaǵaz beredi. Sony ilip shyǵýym kerek. Kópqabatty úı tóraıymdary men turǵyndarynan sóz estımin. Kúni boıy mejeli jerge jabystyryp úlgeremin dep sharshaımyn. Sondaǵy alatyn kúndik tabysym – 600 teńge. Biraq bul jumys maǵan azǵa qanaǵat etýdi, qıyndyqqa moıymaýdy úıretti. Solaı jarnama qaǵazyn ilip júrip, bir kúni baspaǵa adam izdep jatqan habarlandyrýdy kózim shaldy, – deıdi Anar.

"Baspahanada ótken bes jylym"

Mekenjaıyn qaǵazǵa túrtip alǵan ol baspahanaǵa barady. Eki-úsh kún tájirıbeden ótedi. Biraq Anardyń densaýlyǵyna alańdaǵan basshylar jumysqa qabyldaǵysy kelmeıdi. Qaısarlyǵynyń, tabandylyǵynyń arqasynda ǵana ...

– Kóp mekemeler múmkindigi shekteýli adamdardy jumysqa alǵysy kelmeıdi ǵoı. Basynda basshylar qoryqty. Keıin bir jaǵdaı bolyp qalsa, eshkimge kiná artpaıtynymdy jazyp berdim. Sosyn baryp jumysqa kiristim. Jumys tańǵy 8.00-den keshki 18.00-ge deıin. Keshikpeı barýǵa janymdy saldym. Jumysymdy jaqsy kórip, ár isime uqyptylyqpen qaradym. Ózimdi bireýge kerek ekenimdi sezindim.

– Biz qorap jelimdedik, ony qurastyrdyq, tasydyq. Aıyna 30 myń teńge jalaqy aldym. Onyń ózi úlken medeý. Bul baspahanada bes jyl jumys istedim. Sońǵy jyly jelimniń, ózge de boıaýdyń ısi men aýyr jáshikterdi kóterý densaýlyǵyma keri áser ete bastady. Qulshynysym azaıa berdi. Biraq "bul jumystan ketsem meni kim alady?" degen oı boldy. Shydap, ózimdi toqtatyp júrdim. Biraq báribir densaýlyq qymbat qoı, aýyra bergen soń, úırenisip qalǵan ortadan ketýge májbúr boldym, – deıdi Anar.

"Oıynshyq toqýdy qalaı bastadym?"

Qaıtadan aýrýhana men úıdiń ortasyndaǵy sabylǵan ómir bastalady. Oıynshyq toqýǵa degen qyzyǵýshylyqtyń oıanǵany da osy kez.

Birde ınternetten toqylǵan oıynshyqtardy kórip qalady. Qaıtalap, jasap kórmek bolady. Eń birinshi toqyǵan oıynshyǵy – kerik. Ony ózi kúlip eske alady.

– Kóńildi kerikti toqyǵym kelgen, biraq usqynsyz bolyp shyqty. Bir aıaǵy uzyn, bir aıaǵy qysqa. Biraq ózime sondaı qatty unady. Týys-týǵandarǵa, tipti kórshilerime deıin maqtanyp kórsetip shyqtym. Keıin qurbylarymnyń týǵan kúnderine oıynshyq toqyp syıladym. Instagram áleýmettik jelisinen @anarik_komarik paraqshasyn ashyp, oıynshyqtarymnyń sýretterin sonda jarııalaı bastadym. Olga Rıabeva esimdi erikti qyz maǵan kóp kómektesti. Ol kásipkerlerge, dostaryna meniń oıynshyqtarymdy jarnamalady. Solaı aqyryndap tapsyrys túse bastady. Keıin "Instagramda" biraz ánshilerge ózimniń jaǵdaıymdy aıtyp, "paraqshańyzda jarnamalap berseńiz, sizge oıynshyq syıǵa tartamyn" dep usynys aıtyp, hat jazyp shyqtym, – deıdi Anar.

"Nurtas Adambaı uıymdastyrǵan aýkıonda qýyrshaǵym 300 myńǵa satyldy"

Ánshilerdiń ishinen Anarǵa "Rıngo" tobyndaǵy Danııar Ótegen eń birinshi bolyp jaýap jazyp, tapsyrys jasapty. Úsh kerik toqyp bergen eken. Ol kezde oıynshyqtardyń baǵasy – 1500 teńge.

– Basynda basqa oıynshyq joqtaı, tek kerik toqı berippin. Qazir olardyń túrin kóz aldyma elestetsem, kúlkim keledi. Óıtkeni olar aıaǵyn nyq basyp tura almaıtyn, tek jatatyn. Keıin Aıqyn Tólepbergenge mýltfılm keıipkerin toqyp berdim.

Al Ásel Sádýaqasova 300 myńǵa oıynshyq toqýǵa tapsyrys bergen. Qys boıy tek sonyń tapsyrysyn oryndadym. Birde Nurtas Adambaı "Kelınka Sabınka" qýyrshaǵyn toqyp berýdi suraǵan. Ol kezde aýrýhanada jatqan edim. Bas tartaıyn dep oıladym da, ol qýyrshaq aýkıon arqyly satylatynyn, túsken qarjynyń múgedek adamnyń emine jumsalatynyn estip, kelistim. Jartysyn aýrýhanada, jartysyn úıde toqyp, bir aıda bitirip berdim. Eńbegimdi 15 myńǵa baǵaladym. Aýkıonda ol qýyrshaqtyń bastapqy baǵasy – 20 myń teńge bolypty.

Úsh kúnniń ishinde baǵasy ósip, 300 myńǵa satylypty. Nurtas Adambaı sol qarjysyn qolyna ustap, "aýkıonnan túsken aqshany sizge bergim keldi" dep qaıta kelip tur. Qýandym, qatty rıza boldym. Ol aqshaǵa shıpajaıda emdelip, biraz dári-dármegimdi aldym. Al "Reketır" fılmine túsken Saıat Isembaev jarnamalaǵanda kelesi kúni birden 20 tapsyrys túsken. Osylaısha oıynshyq toqý maǵan lázzat syılap ǵana qoımaı, tabys kózine de aınaldy, – deıdi Anar.

"Damý"-dan 3 mıllıon teńge grant utyp aldym"

Anar oıynshyqqa tapsyrysty "Feısbýk" jáne "Instagram" áleýmettik jelisi arqyly alady. Búginde "Instagramda" 15 myńnan astam jazylýshysy bar. Ol árbir oıynshyqty bar ynta-yqylasymen toqıdy. Jáne sapasyna asa qatty kóńil bóledi.

Sapaly ıirilgen jipke aqshany aıamaımyn. Sol sebepti meniń oıynshyqtarymdy kir jýý mashınasynda qoryqpaı jýa berýge bolady. Túsi ózgermeıdi, tútilip ketpeıdi. Olardy ilmekpen toqımyn. Ol stıl japondyq­tarǵa jaqsy tanys, amıgýrýmı dep ata­lady. Sondaı-aq, adamdarǵa jylylyq pen meıirim syılaıtyn, kóńildi kóteretin oıynshyqtar toqyǵym keledi. Keıde menen qorqynyshty kıno men mýltfılmderdegi keıipkerlerdi toqýdy ótinip jatady. Ondaı tapsyrystardan bas tartamyn. Oıynshyqtar tek qýanysh syılaý úshin kerek.

Eger tapsyrys jaqsy bolsa, aıyna 80 myńdaı aqsha tabamyn. Ony dári-dármegime jumsaımyn. Jekemenshik aýrýhanalarda em qabyldaǵandy jón kóremin. Memlekettik aýrýhanalarda emdelý qıyn. Qaǵazdary kóp. Júgirip jınaýyń kerek. Ony ótkizýiń kerek. Sosyn aılap kútýiń kerek. Al maǵan densaýlyq qymbat. 2016 jyldyń jazynda "Damý" qorynan 3 mıllıon teńge grant utyp alǵanmyn. Ol qarjyǵa úıimniń qasynan sheberhana soǵyp, ishine jıhaz ben qajetti qural-jabdyqtar aldyq.

– Qaladan sál alystaý. Sol jaǵy qıyn. Endi qalanyń ishinen oıynshyq dúkeni, sheberhana ashqym keledi. Sondaı-aq, qasyma kómekshiler alyp, balalarǵa arnalǵan túrli kıimder toqıtyn edik. Ýkraınada oıynshyq toqıtyn Svetlana Perova degen kisi bar. Ózime úlgi tutamyn. Toqýǵa qatysty suraqtarymdy sol kisiden suraımyn, – deıdi Anar.

"Shetelderden tanymaıtyn adamdar jip jiberip turady"

– Negizi Astana, Almaty, Shymkent, Aqtaý qalalarynan kóp tapsyrys túsedi. Reseı, Túrkııa, Úndistan, Afrıka elderinen de tapsyrys túsken. Qazir kóz­di jumyp qoıyp ta oıynshyq toqı beremin. Úırenip ketkenmin. Ekinshiden toqyma kózime zııanyn tıgizedi. Kóz janarymdy saqtaǵym keledi. Me­­niń oıyn­shyq­tarym­nyń baǵasy – 5-15 myń teńge araly­ǵynda. Osy kúnge deıin shama­men 4 myń­daı qýyr­shaq toqyǵan shyǵarmyn.

– Bilesiz be, ómirde tanymasa da qol ushyn sozatyn meıirimdi adamdar kóp. Mysaly, Reseıden bir kisi "seniń oıynshyqtaryń qatty unady, biz saǵan jip jibereıik degenbiz, meken-jaıyńyzdy aıtsańyz" dep, Feısbýk arqyly hat jazyp jibergen. Biraz kún ótken soń, poshtadan "kelip, alyp ketińiz" degen habar keldi. Barsam, úlken eki qorap. Ishi men jer-kókti sharlap izdep júrgen qymbat jipterge tolyp tur. Úıge áreń jetkizgenmin. Taǵy birde Germanııa men Franııadan bir qyzdar osyndaı syı jasaǵan. Olar meni ómirinde kórgen emes, bilmeıdi. Osy qoldaý qanat bitirdi. Keıin oıynshyq toqyp, rızashylyǵymdy bildirip, hat jiberdim.

Sosyn Almatyda ótken bir bıznes lekııaǵa qatysqan bolatynmyn. Ol jerde ózimniń oıynshyqtarym týraly aıttym. Esimi elge belgili kásipker aǵa qandaı qoldaý kerek ekenin surady. Maǵan kólik kerek edi. Óıtkeni, oıynshyqtarymdy qalanyń ishinde ózim tasyǵym keletin. Kýrerler keıde ýaqytynan kesh jetkizedi. Nemese, tapsyrysty jetkizip bermeı tastaıtyn kezder bolady. Odan bólek, aýrýhanaǵa jıi baramyn. Kólik júrgizý kýáligim de bar edi, tek aqsha jınaı almaı júrgenmin. Biraz ýaqyttan keıin kásipker aǵa kólik tartý etti. Biraq óziniń aty-jónin atamaýdy ótindi. Qazir sol kólikpen júrmin. Ol kisige Alla razy bolsyn, – deıdi Anar.

Ol qol qýsyryp qarap otyrǵysy joq. Internetten onlaın dárister qarap, sheberligin shyńdap, bilimin jetildirýge umtylady. Adamǵa kóterińki kóńil syılap, meıirim shýaǵyn tógetin oıynshyq toqyp, aınalasyna jylýlyq syılasam deıdi. Dári-dármegi men tolassyz emine ózi aqsha tapqysy keledi. Siz ben biz, Anardyń oıynshyǵyn satyp alý arqyly oǵan kómektese alamyz. Bir-birimizge qýanysh syılaıyq.