Úshinshi megapolıstegi dinı konfessııa ókilderi arasyndaǵy sporttyq saıys aıaqtaldy. "Alaman" sport kesheninde ótken jabylý rásimine Shymkent qalalyq máslıhatynyń depýtattary Murat Joldyqojaev pen Talǵat Baltabaev, qalalyq sport basqarmasy basshysynyń orynbasary Ermek Dármenov, din isteri basqarmasynyń jetekshileri, dinı konfessııa ókilderi men qala turǵyndary qatysty.
– Din ókilderiniń arasyndaǵy sport saıystary jylda uıymdastyrylyp turady. Bıylǵy erekshelik – Shymkenttegi jarystar bir aı boıǵy spartakıada túrinde ótti. Kelesi jyly da osy dástúrdi jalǵastyrý josparymyzda bar, – dedi Shymkent qalasynyń din isteri basqarmasy basshysynyń mindetin atqarýshy Baqyt Alııakparov.
Saltanatty jıynda sport jarystarynyń jeńimpazdary marapattaldy. Atap aıtqanda shahmattan Kamra Vapaev 1-orynǵa ıe bolsa, ústel tennısinen Zamanaı Samatov jeńimpaz atandy. Al shaǵyn fýtboldan qalalyq ortalyq Aqmeshittiń komandasy chempıon atandy.
Jeńimpazdar men júldegerlerge alǵys hattar men dıplomdar, baǵaly syılyqtar tabystaldy.
Aıta keteıik, din ókilderi arasyndaǵy spartakıada Qazaqstan Respýblıkasy Táýelsizdiginiń 30 jyldyǵy men 18 qazan – Rýhanı kelisim kúnine oraılastyryp ótkizildi. Mundaǵy maqsat – turǵyndar arasyndaǵy tatýlyq pen kelisimdi nyǵaıtý, buqaralyq sportty nasıhattaý, salaýatty ómir saltyn rásimdeý.
Nýrlan Bektaev
