Shymkent qalasynyń jumyspen qamtý jáne áleýmettik qorǵaý basqarmasynyń basshysy B.Narbekova qala ákimdiginiń «Instagram» paraqshasynda ótken tikeleı efırde áleýmettik qorǵaý saıasatynyń júzege asyrylýy men halyqty jumyspen qamtý baǵyttarynyń nátıjelerin baıandady.
Basqarma basshysynyń aıtýynsha, bıyl «Eńbek» memlekettik baǵdarlamasynyń sheńberinde 21 954 adamdy jumyspen qamtý sharalaryna qatystyrý josparlanyp, naqty 9 aıdyń kórsetkishi boıynsha 19 462 adam jumyspen qamtylǵan.
Naqtyraq aıtqanda, baǵdarlamanyń I baǵyty boıynsha 2675 adam 3 aılyq kásiptik oqytý kýrstaryna, II baǵyty boıynsha 2 155 adam «Bastaý bıznes» jobasy aıasynda kásipkerlik kýrsyna oqytýǵa joldandy. 53 adamǵa shaǵyn nesıe, 584 adamǵa memlekettik grant berildi.
Baǵdarlamanyń III baǵyty boıynsha (halyqty jumyspen qamtýǵa járdemdesý) 8 168 adam bos jáne jańa jumys oryndaryna, 336 adam áleýmettik jumys oryndaryna, 2531 adam jastar praktıkasyna, 2845 adam qoǵamdyq jumysqa, 115 adam «Alǵashqy jumys oryndary» jobasy boıynsha 24 aıǵa joldandy.
Qyrkúıek aıynda «Arbat» alańynda jastarǵa arnalǵan bos jumys oryndary jármeńkesi ótkizildi. Jármeńkege qaladaǵy 50-den asa jumys berýshi kásiporyndar men mekemeler qatysyp, 9 myńǵa jýyq bos jumys oryndaryn usyndy. Nátıjesinde turaqty jumysqa 790 azamat, «Jastar praktıkasy» baǵdarlamasymen 121 jas joldama aldy.
Shaharda halyqty áleýmettik qorǵaý baǵytynda da júıeli is-sharalar atqarylýda. 2021 jyldyń I toqsanynda 36 969 otbasyǵa (179 209 adam), II toqsanda 30 962 otbasyǵa (149 147 adamǵa), III-toqsanda 19 333 otbasyǵa (90 177 adamǵa) memlekettik ataýly áleýmettik kómek tólendi.
Sondaı-aq, basqarma basshysy arnaýly áleýmettik qyzmetter, azamattyq quqyqtyq aktilerin tirkeý, kóshi-qon máselesi jáne qandastarmen jumys isteý, ardagerler men az qamtamasyz etilgen azamattardy qoldaý is-sharalarynan habardar etip, turǵyndar saýalyna jaýap berdi.
