Jibek Qulymbetova – 12 jasynda djıý-djıtsýdan eki dúrkin álem chempıony atanǵan qazaq qyzy.
Ol Saǵadat Nurmaǵambetov atyndaǵy Sagadat Batyr zalynda jattyǵady. Portalymyzdyń tilshisi talaı sportshynyń jaýyrynyn jer ıisketken daryn ıesimen tildesip, suqbat qurdy.
«Sportqa degen beıimimdi eń alǵash dene shynyqtyrý pániniń muǵalimi baıqady. Men uzyndyqqa sekirý, júgirý kórsetkishteri boıynsha synyp ishinde birinshi oryn alatynmyn. Keıin Elvıra apaıym jetistikterimdi anama aıtty. Osylaısha 9 jasymda djıý-djıtsýǵa jazyldym. Sportpen shuǵyldana bastaǵan soń, minezim de ashylyp, tuıyqtyǵymnan aryldym», - dep áńgimesin bastady keıipkerimiz.
Bir qyzyǵy, jas sportshy er balalar arasynda da kúsh synasyp, baıraqty básekelerde qarsylastarynan basym túsip júr.
«Birinshi ret jattyǵý zalyna barǵanymda jalǵyz qyz bolatynmyn. Sol sebepti er balalarmen kúresýge týra keldi. Shyny kerek, eshqandaı qorqynysh bolmady. Olarmen kúresken óte qyzyq, óıtkeni maǵan qaraǵanda fızıkalyq turǵydan myqtyraq keledi ǵoı. Uldarmen básekege túse otyryp, kóp tájirıbe jınadym», - deıdi ol.
Otbasynda tek Jibek qana sportpen kásibı túrde shuǵyldanǵan. Buryn inisi djıý-djıtsýǵa qatysqan eken. Alaıda densaýlyǵyna baılanysty sportpen qoshtasýǵa týra kelgen.
Talantty arýdyń ustazyna degen qurmeti erekshe.
«Sporttaǵy úlgi tutar tulǵam – Nursultan Orynbasarov. Ol kisi maǵan erekshe qoldaý berip, kóp nárse úıretti. Aǵaıymnyń bapkerlik eńbeginiń arqasynda «Álem chempıony» atandym. Jattyqtyrýshyma alǵysym sheksiz.
Sportshy qyrkúıek aıynda 44 kg salmaq dárejesinde djıý-djıtsýdan Qazaqstan chempıony atandy.
«Buıyrsa qarashada bolatyn Álem chempıonatyna joldama aldym. Daıyndyq qyzý. Alla qalasa, Otanyma jeńispen oralý úshin bar kúshimdi salamyn», -deıdi jas daryn.
Suqbat sońynda Jibek asqaq armanymen bólisti.
«Armanym – kók týymyzdy jelbiretip, birneshe márte chempıon ataný. Sondaı-aq Azııa oıyndarynda top jarýdy kózdep otyrmyn. Búkil álemge qazaq qyzdarynyń myqty ekenin dáleldegim keledi», - dep áńgimesin aıaqtady Jibek Qulymbetova.
Otandasymyzǵa sáttilik tileımiz!
Áńgimelesken Dıana ASAN,
«Adyrna» ulttyq portaly
