Eńbekshi aýdanynda «Halyq qatysatyn bıýdjet» jobasynyń aıasynda 56 kópqabatty úıdiń aýlalary jańartylady. Atalǵan jumystarǵa bıýdjetten 890 mln. teńge bólinip otyr. Bul týraly aýdan ákimi D.Esilbek aýdanda atqarylǵan jumystar barysyn qala ákimi Murat Áıtenovke tanystyrý barysynda aıtty.
Onyń aıtýynsha, qazirgi tańda 24 kópqabatty úıdiń aýlalarynda abattandyrý jumystary júrgizilýde eken. Qalǵan 32 kópqabatty úı boıynsha memlekettik satyp alý is-sharasy ótkizilýde.
Eńbekshi aýdany boıynsha 630 kópqabatty turǵyn úıler 435 aýlaǵa biriktirilgen. Aýdanda 2011-2020 jyldar aralyǵynda kezeń-kezeńmen 565 úıdiń 373 aýlasy abattandyrylǵan.
Aýlalary buryn abattandyrylǵan úılerdiń basym bóligindegi oıyn elementteriniń tozyǵy jetken, jańalaýdy qajet etedi. Aýdanda aǵymdaǵy jyldan bastap aýlalardy qaıta abattandyrý, balalar oıyn alańshalaryn jańalaý jumystary Qazaqstan Respýblıkasynyń Prezıdenti Qasym-Jomart Toqaevtyń «Halyq únine qulaq asatyn memleket» tujyrymdasynyń negizinde «Halyq qatysatyn bıýdjet» jobasy aıasynda iske asyrylýda.
2022 jyly abattandyrý jumystary osy joba sheńberinde júrgiziletin bolady. Aıta keteıik, osy jyldyń qyrkúıek aıynan bastap turǵyndardan jobalyq usynystar aýdan ákimi apparatynyń resmı saıty arqyly qabyldaý bastaldy.
