Sápıev,Artaev,Ybyraıymovtarǵa ómir boıy aı saıyn 300 myń teńgeden tólenedi

9654
Adyrna.kz Telegram

Sportshylar men jattyqtyrýshylarǵa ómir boıy aı saıynǵy materıaldyq qamsyzdandyrýdy tóleý qaǵıdalaryn bekitý týraly Úkimettiń jańa qaýlysy shyqty, dep habarlaıdy “Adyrna” ulttyq portaly Express Qazaqstan. saıtyna silteme jasap.

Endi sportshylar men jattyqtyrýshylarǵa ómir boıy aı saıynǵy materıaldyq qamsyzdandyrý mynadaı mólsherde tólenedi:

1). Olımpıada, Paralımpıada jáne Sýrdlımpıada oıyndarynyń chempıondary men júldegerleri jáne (nemese) sporttyń olımpıadalyq túrleri boıynsha álem chempıondary ataqtaryn jeńip alǵan sportshylarǵa — 100 aılyq eseptik kórsetkish ( 2021 jyl boıynsha — 291 700 teńge);

2). Olımpıada, Paralımpıada jáne Sýrdlımpıada oıyndarynyń chempıondary jáne júldegerleri, jáne (nemese) sporttyń olımpıadalyq túrleri boıynsha álem chempıondary ataqtaryn jeńip alǵan sportshylardy daıyndaǵan jattyqtyrýshylarǵa — 100 aılyq eseptik kórsetkish.

Qazirgi ýaqytta sportshylar men jattyqtyrýshylarǵa aı saıynǵy materıaldyq qoldaýǵa arnalǵan tólemderdiń kólemi — 101 898 myń teńgeni quraıdy.

Úkimet memleket basshysynyń 2021 jylǵy 1 qyrkúıektegi Qazaqstan halqyna joldaýyndaǵy "Kásipqoı sportty basqarý júıesin qaıta qaraý boıynsha usynystar tujyrymdaý" degen tapsyrmasyn oryndaý maqsatynda osy qaýlyny ázirlegen.

Joǵary sporttyq nátıjege jetý úshin álemdik tájirıbeni eskere otyryp, sportshy, jattyqtyrýshy mártebesin kóterip, materıaldyq qoldaý qajet.Mysaly, Reseıde sportshylar men jattyqtyrýshylarǵa áleýmettik qoldaý aıyna 60 000 rýbl mólsherinde belgilengen, — delingen Úkimettiń qaýlysynda.

Bul shamamen 352 000 teńgeni quraıdy eken.

Qazaqstanda qazir 1 aılyq eseptik kórsetkish 2 917 teńge bolsa, jańa jyldan bastap, 3 063 teńge bolady. Iaǵnı qujat qabyldanǵan soń, chempıondarǵa aı saıyn 300 myńnyń ústinde tólemaqy tólenedi.

Dopıng daýynan keıin jańartylǵan tizimge sáıkes, Qazaqstan jazǵy Olımpıada oıyndarynan 15 altyn, 21 kúmis, 36 qola medal enshiligen. Barlyǵy 72 medal. Al qysqy Olımpıada oıyndarynda 1 altyn, 3 kúmis, 4 qola medal alǵanbyz. Al Paralımpıada oıydarynan 9 medal (2 altyn, 5 kúmis, 2 qola) bar. Odan bólek, álem chempıondary men júldegerleri de jeterlik.

Aldaǵy ýaqytta Vasılıı Jırov, Ermahan Ybyraıymov, Baqtııar Artaev, Serik Sápıev jáne basqa da chempıondar men júldegerlerge tólenetin qarjy kóbeıedi.

Qujattyń tolyq mátini "Ashyq NQA" portalynda jarııalandy. Qoǵamdyq talqylaý 14 qazanǵa deıin jalǵasady.

”Adyrna” ulttyq portaly

Pikirler