Aýyr atlet Albert Lınderdiń óliminen soń Jazıra Japparqul, Karına Gorıcheva, Semen Lınder bastaǵan basqa atletter "quramadaǵy bapkerler qol kóteredi, tapqan jalaqymyzdan jyryp alady, bopsalaıdy, aqsha bermesek dopıng tabamyz dep qorqytady" dep málimdedi. Bul shý basy dopıng daýynan arylmaǵan aýyr atletıkaǵa áli reforma jasalmaǵanyn kórsetti. "Júlde alǵanda bapkerlerge kereksiń, basqa kezde seni laqtyra salady" deıdi atletter.
Olar 1994-2016 jyldary quramanyń bas bapkeri bolǵan, bas bapkerlikten ketse de de-fakto ornyn saqtap qalǵan Alekseı Nı men quramanyń aǵa bapkeri Sergeı Sedovty aıyptaıdy. Rıoda qola alǵan Gorıcheva Sedovtyń qol kótergenin jylap otyryp aıtty. Balalar quramadaǵy orny úshin osyǵan deıin aýyzdaryn jaýyp keldik dep otyr.
"Quramadaǵy aýyr atletterdiń kóbi turmysy tómen otbasynan shyqqan. Biz alyp júrgen aılyǵymyzdan aıyrylyp qalamyz ba dep qorqyp júrdik" - deıdi Nadejda Nogaı.
Bir sportshynyń ólimi aýyr atletıka júıesindegi bylyqty taǵy da ashyp bergendeı. Qazaqstan aýyr atletıkasynda sportshy karerasyn aıaqtaǵan soń bapkerlikke aýysýǵa múmkindik joq. Es bilgeli shtanga zalynan shyqpaǵan sportshy ómirden ózin tappaı qınalady. Qoldaýshysy az sportshy psıhologqa barýdy da ózi oılamasa kerek.
Qazaq qyzdary arasynan olımpıada júldesin alǵan Jazıra Japparqul qazir qaıda? Afınada kúmis alǵan aýyr atlet Sergeı Fılımonovtyń STO-da jumys istep júrgeni belgili bolǵan. Azııa chempıony Tatıana Hromova da sporttan ketken soń eshkimge kerek bolmaı qalǵan. Alber Lınder de qurylys pen STO jaǵalady. Aýyr atletıkada júlde alsań kereksiń, basqa ýaqytta eshkim seni kerek qylmaıdy. Ilıa Ilın ǵana qazir memlekettik qyzmette júr. Ol Ilınniń pysyqtyǵy shyǵar. Ia bir jerden ózińdi tabý úshin olımpıadada eki altyn alyp, artynan dopıngpen ustalyp ony qaıtaryp berý kereksiń.
Rýslan MEDELBEK,
"Adyrna" ulttyq portaly.
