Memleket basshysy buqaralyq sportty damytýdyń mańyzdylyǵyn, jas urpaqtyń sporttyq jáne shyǵarmashylyq áleýetine erekshe nazar aýdarý qajet ekendigin atap ótken bolatyn.Osy oraıda, elimizdegi úshinshi megapolıste buqaralyq sportty damytý, jastardyń bos ýaqytyn tıimdi uıymdastyrý baǵytynda is-sharalar atqarylýda. Jumys barysyn BAQ ókilderimen birge baqylaǵan Shymkent qalasy ákiminiń orynbasary Maqsut Isahov memlekettik tapsyryspen jan basyna qarjylandyrý jobasyna qamtylǵan birqatar jekemenshik sporttyq nysandardy aralady.
Irikteýden ótken bilikti ónim berýshilerdiń biri «Etalon Klınıng» JShS-gi «STRONG» fıtnes ortalyǵyn jalǵa alý arqyly memlekettik tapsyryspen jumys jasaýdy bastapty. Sport kesheniniń jalpy aýdany 950 sharshy metrdi quraıdy. Kásipker boks jáne taekvondo sport túrinen 160 balaǵa ótinim joldap, osy jyldyń 3 shildesinen bastap jumysqa kirisken. Qazirgi tańda 110 ata-anadan ótinim túsip, olardyń arasynda kelisim-shart jasalǵan.
Beıbit Kósherbaev - Kásipker
Búgingi tańda qalada 4096 balaǵa 71 sport túrinen tegin sport sekııalaryn uıymdastyrý úshin jergilikti bıýdjetten (jan basyna shaqqandaǵy qarjylandyrý) 339,8 mln teńge qarjy baǵyttalǵan. Bul kórsetkish 2021 jyly jalpy bos balalardyń qosymsha sporttyq sekııamen qamtý úlesiniń 5,3 %-yn quraıtyn bolady. Búginde, balalaryn tegin sporttyq sekııaǵa qatystyrý úshin 3 myńnan astam ata-anadan ótinim túsipti.
Maqsut Isahov – Shymkent qalasy ákiminiń orynbasary
Memlekettik tapsyrysty júzege asyrý maqsatynda 2021 jyldyń mamyr aıynda «Bala» sandyq platformasy iske qosyldy. Bul platformaǵa artsport.edu.kz mekenjaıy arqyly kásipkerler, jattyqtyrýshylar jáne qalanyń árbir turǵyny ata-ana retinde ótinim joldaı alady. Ata-ana balaǵa arnalǵan shyǵarmashylyq nemese sporttyq úıirmege ótinish berip, vaýcher (biregeı nómir) alady. Aıta keteıik, búginde qalada memlekettik-jekeshelik áriptestik aıasynda 5 sport klýby jumys isteıdi.
G.Asqarqyzy
