Búgin el táýelsizdiginiń 30 jyldyǵyna oraı Aqtaý qalasynda "Jastar" stýdııasy ashyldy dep habarlaıdy "Adyrna" ulttyq portaly.
Mańǵystaý oblysy ákiminiń baspasóz qyzmeti málimdegendeı, jańa stýdııa oblystyq jastar resýrstyq ortalyǵynda ornalasqan. Stýdııanyń alǵashqy qonaǵy bolǵan oblys ákimi Serikbaı Trumov mańǵystaýlyq jastardy merekelermen quttyqtap, stýdııa júrgizýshisiniń suraqtaryna jaýap berdi.
"Búgin erekshe kún, jalyndaǵan jastarymyzdyń merekesi. Barsha mańǵystaýlyq jastardy osynaý aıtýly merekemen quttyqtaımyn! Búgingi ashylyp jatqan «Jastar» stýdııasynyń qadamy qutty bolsyn! El úmitin – er aqtar. Sózsiz, búgingi jańa býyn jas talap kúsh-qaıraty boıynda bar kezde eli, ulty úshin qyzmet jasaýǵa mindetti. Óz Otanyn álemniń eń damyǵan elderiniń qataryna qosý – bilikti de sanaly urpaqtyń qolynda",- dedi oblys ákimi.
Jańa stýdııa birneshe taqyryptyq qabyrǵalarǵa bólingen. Bul ortalyqta jastar túrli taqyrypta foto jáne vıdeo ónimderin jasaı alady.
Sondaı-aq QR Táýelsizdiginiń 30 jyldyǵy qarsańynda «Mańǵystaý jastary» ınternet portaly iske qosyldy. Bul portal jastar saıasaty salasyndaǵy atqarylyp jatqan sharalar týraly aqparat alýǵa, avtorlyq jobalarmen nemese jańalyqtarmen bólisýge, volonterlyq toptar men jastar uıymdaryna múshelikke ótýge múmkindik beredi.
Búginde oblysta 14-29 jas aralyǵyndaǵy 150 myńnan astam jas bar. Ol oblys halqynyń 21%-yn quraıdy. "Eńbek" memlekettik baǵdarlamasy aıasynda "Bastaý bıznes" jobasy boıynsha óz isin bastaýǵa 240 jas grant jáne 35 jas shaǵyn nesıe aldy.
Sonymen birge "Dıplommen aýylǵa" baǵdarlamasy boıynsha aýyldarǵa eńbek etýge barǵan 250 mamanǵa bir jolǵy kóterme járdemaqy berildi. Sondaı-aq, 124 mamanǵa jeńildetilgen turǵyn úı nesıesi usynyldy.
Bıyl "Jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan" baǵdarlamasy aıasynda 6434 jas jumysqa ornalastyryldy. 2021-2022 oqý jylyna oblys ákiminiń 175 granty taǵaıyndaldy.
Aımaqta 50-ge jýyq volonterlik toptar men qaıyrymdylyq uıymdary bar, olardyń qatarynda 3 myńǵa jýyq erikti qyzmet etedi.
Mańǵystaý oblysynyń volonterler korpýsy pandemııa kezinde oblys turǵyndaryna koronavırýstan qorǵaný, tótenshe jaǵdaı rejımindegi qaýipsizdik sharalaryn saqtaý, karantınde qıyn jaǵdaıǵa tap bolǵan áleýmettik jaǵynan osal toptaǵy azamattarǵa qoldaý kórsetý baǵytynda aýqymdy jumys atqaryp keledi.
"Adyrna" ulttyq portaly.
