Tokıo Olımpıadasynda karataeshi Sofıa Berýleva alǵashqy eki kezdesýinde úsh upaı jınady, dep habarlaıdy EK.
Ol karateniń kýmıte sanaty boıynsha áıelder arasynda 61 keliden joǵary salmaq dárejesinde óner kórsetip jatyr.
Sofıa toptyq kezeńde aldymen úsh dúrkin Eýropa chempıony, álem chemıonatynyń eki dúrkin júldegeri túrkııalyq Meltem Hodjaoglý jolyqty. Tartysty jekpe-jekte ekeýi de aıanyp qalmady. Sóıtip, qyzyqty kezdesý 5:5 esebimen aıaqtaldy.
Otandasymyz odan keıin Eýropa oıyndarynyń jeńimpazy, Italııa sportshysy Sılvııa Semeraronyń osal tusyn tapty. Qorytyndy esep — 5:1.
Endi Sofıa qarsylasy álem jáne Eýropa oıyndarynyń chempıony Irına Zarekaıamen (Ázirbaıjan) jolyǵady.
Toptyq kezeńdegi sońǵy jekpe-jegin japonııalyq Aıýmı Ýekýsamen ótkizedi. Olımpıadadaǵy júıe boıynsha árbir topta eń kóp upaı jınaǵan eki sportshy jartylaı fınalǵa joldama alady.
