Qutqarýshylar — jedel túrde qyzmet etetin, adamdardyń ómirin qutqarýdy basty mıssııasy sanaıtyn mamandyq ıeleri. Olardyń basty mindeti — halyqtyń beıbit ómirin, turmystaǵy, óndiristegi qaýipsizdigin qamtamasyz etip, apattyq jaǵdaıǵa jol bermeý. Apat aıtyp kelmeıdi. Tosynnan bolǵan apat kezinde azamattarǵa birinshi bolyp kómekke umtylatyn tótenshe jaǵdaılar qyzmetiniń qutqarýshylary. Bul is kez kelgenniń qolynan kele bermeıdi. Oǵan úlken júrek, mashyq, bilim jáne tájirıbe kerek.
Qutqarýshylardyń osyndaı eńbegine qurmet retinde el astanasy — Nur-Sultan qalasynda «Qutqarýshylar saıabaǵy» paıdalanýǵa berildi. Bul — táýelsizdik jyldarynda elordada osyndaı jankeshti mamandyq ıeleriniń qurmetine ashylyp turǵan alǵashqy saıabaq.
Saıabaq A. Ianýshkevıch pen A. Pýshkın kósheleriniń qıylysynda ornalasqan.
Saıabaq aýmaǵy balalar men eresekterge arnalǵan aımaqtarǵa bólingen. Munda kedergi jolaqtaryn qosa alǵanda, ekstrım-sportyn qoldaý úshin turǵyndarǵa arnalǵan parkýr-alań ornalasqan. Sol sııaqty qala turǵyndaryna arnalǵan tynysh demalys aımaǵy bar. Al kópir jaǵynda «Public art» sýrettelgen. Sondaı-aq, saıabaq mańyna 1964 jyly shyqqan A-30 MAZ 205 arnaıy órt sóndirý mashınasy qoıylǵan.
Saıabaq órt sóndirýshi-qutqarýshylardyń, sondaı-aq mindetin oryndaý kezde qaza tapqan qyzmetkerlerdiń qurmetine jasaqtalǵan. Nysannyń jan-jaǵy erekshe abattandyrylǵan. Máselen, saıabaq aýmaǵyna 150-ge jýyq aǵash egelgen.
Saıabaqtyń ashylýyna qatysqan qala ákimi Altaı Kólginov aýmaq áli de jetildirilip, tolyqtyrylatynyn jetkizdi.
— Bizge qala turǵyndary bos ýaqytyn densaýlyǵyna paıdaly etip ótkizetin oryndar qurý mańyzdy. Bıyl biz 150 aýla men 40 qoǵamdyq keńistik (saıabaqtar, gúlzarlar, jelekjoldar) salamyz. Jalpy alǵanda, 70-ke jýyq aýla men qoǵamdyq keńistiktiń jumysy aıaqtalyp, ashylǵaly tur. Memleket basshysynyń tapsyrmasy boıynsha abattandyrý kezinde kógaldandyrýǵa erekshe kóńil bólinedi, — dedi elorda ákimi.
Al saıabaqtaǵy órt sóndirýshiniń eskertkishi basqa adamdardyń ómirin saqtap qalý úshin kún saıyn óz ómirlerin qaterge tikken batyrlarǵa alǵys retinde ornatylǵan.
Skver aýmaǵynda azamattyq qorǵaý qyzmetiniń úzdikteri úshin «Qurmet taqtasy» da jasaqtalǵan.
Aıta ketý kerek, bıyl elimizde azamattyq qorǵaý organdarynyń 19 myńnan asa qyzmetkeriniń jalaqysy ósti. Mysaly, qazir 20 jyldan asa eńbek ótili bar órt sóndirýshi 177 myń teńge jalaqy alady. Ótken jyldyń qańtarynan bastap órt sóndirýshilerdiń jalaqysy 20 paıyzdan 65 paıyzǵa deıin artqan bolatyn. Bul qutqarýshylardyń eńbegi men qyzmettegi jetistikterine degen qamqorlyq deýge bolady.
"Adyrna" ulttyq portaly.
