Marat Ospanov atyndaǵy Batys Qazaqstan medıına ýnıversıteti qoǵamdyq-gýmanıtarlyq tártip kafedrasynyń meńgerýshisi, oblystyq qoǵamdyq keńes múshesi Altaı Taıjanov aýyl ákimin saılaý, jańa reforma jóninde óz pikirin bildirdi, dep QazAqparat-qa silteme jasaı otyryp "Adyrna" ulttyq portaly habarlaıdy.
Fılosofııa ǵylymdarynyń doktory, professor Altaı Taıjanov aýyl ákimin saılaý aýyl ómirine ózgeris ákeledi dep esepteıdi.
«Bul halyqtyń úni, tilegi, tipti talaby dep aıtsaq bolady. Ákimder Prezıdenttiń jergilikti jerdegi ókili ekeni belgili. «Tómennen bastap joǵary qaraı qaraıyq. Áıtpese qıyndyq, qatelik bolar» degen oımen aýdan emes, aýyl ákimderinen bastap saılaý qolǵa alyndy. Ári qaraı joǵarylaı berýi múmkin. Jeke pikirim, jalpy ákimdi halyqtyń saılap qoıýy durys. Sebebi bireýdi bireý taǵaıyndap qoıatyn bolsa, ol sol adamǵa táýeldi. Halyq saılap qoıatyn bolsa, ol halyqtyń atynan sóıleı alady. Halyqqa eshkim táýeldi emes, halyqqa qyzmet etesiń. Mán-mańyzy osynda. Ásirese el arasyndaǵy túrli pikir, oıdyń erkin aıtylýy, áleýmettik jelidegi jazba, bılik pen halyq arasyndaǵy alshaqtyq bilingen kezde munyń máni zor dep esepteımin. Bul halyqtyń oıanýy. Ákimdi halyq saılasa, halyq arasynda júretin bolsa, ol oıanǵan, oıanǵysy kelip júrgen halyqqa qyzmet jasaı alady»,- dedi ol.
Aýyl ákimine úmitkerler óz baǵdarlamalaryna áleýmettik máselelerdiń sheshimin usyndy. Altaı Taıjanovtyń aıtýynsha, muny jetkizý, iske asyrý kez kelgenniń qolynan kelmeıdi.
«Alýan-alýan júırik bar, áline qaraı shabady. Aýyl, tipti aýdan ákimi ózi jol sala almaıdy. Ol úshin bıýdjetten qarjy qarastyrylýy kerek. Al qarjy bólý úshin sol mekenniń aqsap turǵan tusyn, naqty túsindirip, aıtý kerek. Oblys ákimi qoldap, máslıhatta bekitilýi tıis. Aýyldan saılanǵan, halyq tańdaǵan adam is qylam dese joǵary otyrǵandar qoldaıdy dep esepteımin. Al ony taǵaıyndaıtyn bolsa, «ornyńa basqa adamdy qoıamyn, úndemeı otyr» dep aıtýy múmkin. Halyq saılaǵan adamnyń artynda halyq bar. Jaltaqtamaı, óz bilimi men biligin osy salada paıdalana alady»,- dedi Marat Ospanov atyndaǵy Batys Qazaqstan medıına ýnıversıteti qoǵamdyq-gýmanıtarlyq tártip kafedrasynyń meńgerýshisi, oblystyq qoǵamdyq keńes múshesi Altaı Taıjanov.
Onyń sózinshe, saılaýdyń ádiletti ótýin qamtamasyz etý qajet. Durys, isker azamat aýyldy órge súıreıdi. Durys tańdaý aýyl turǵyndarynyń sanalylyǵyn, biliktiligi men parasattylyǵyn kórsetedi.
«Bireýdiń joǵalǵan taılaǵyn bireý óleń aıtyp júrip izdeıdi degen bar. Meniń oıymsha ákim sol aýyldan shyqqan adam bolýy kerek. Bálkim ol qalada turyp, aýylǵa ákim bolǵan soń kóship, úlken is tyndyrýy múmkin. Mundaı adamdardy quptaımyn. Al aýyl ákimi qyzmetin tramplın retinde qoldanyp, joǵary qyzmetterge kórsetýdi kózdese, burys. Qaladan aýylǵa barsa, «Rýhanı jańǵyrý» baǵdarlamasynyń oryndalǵany. Kórgen, bilgenin, úırengenin aýyldastaryna arnasa, odan artyǵy joq bolar edi»,- dedi Altaı Taıjanov.
Aqparat inform.kz saıtynan alyndy
