Marat Ospanov atyndaǧy Batys Qazaqstan medisina universitetı qoǧamdyq-gumanitarlyq tärtıp kafedrasynyŋ meŋgeruşısı, oblystyq qoǧamdyq keŋes müşesı Altai Taijanov auyl äkımın sailau, jaŋa reforma jönınde öz pıkırın bıldırdı, dep QazAqparat-qa sılteme jasai otyryp "Adyrna" ūlttyq portaly habarlaidy.
Filosofiia ǧylymdarynyŋ doktory, professor Altai Taijanov auyl äkımın sailau auyl ömırıne özgerıs äkeledı dep esepteidı.
«Būl halyqtyŋ ünı, tılegı, tıptı talaby dep aitsaq bolady. Äkımder Prezidenttıŋ jergılıktı jerdegı ökılı ekenı belgılı. «Tömennen bastap joǧary qarai qaraiyq. Äitpese qiyndyq, qatelık bolar» degen oimen audan emes, auyl äkımderınen bastap sailau qolǧa alyndy. Ärı qarai joǧarylai beruı mümkın. Jeke pıkırım, jalpy äkımdı halyqtyŋ sailap qoiuy dūrys. Sebebı bıreudı bıreu taǧaiyndap qoiatyn bolsa, ol sol adamǧa täueldı. Halyq sailap qoiatyn bolsa, ol halyqtyŋ atynan söilei alady. Halyqqa eşkım täueldı emes, halyqqa qyzmet etesıŋ. Män-maŋyzy osynda. Äsırese el arasyndaǧy türlı pıkır, oidyŋ erkın aityluy, äleumettık jelıdegı jazba, bilık pen halyq arasyndaǧy alşaqtyq bılıngen kezde mūnyŋ mänı zor dep esepteimın. Būl halyqtyŋ oianuy. Äkımdı halyq sailasa, halyq arasynda jüretın bolsa, ol oianǧan, oianǧysy kelıp jürgen halyqqa qyzmet jasai alady»,- dedı ol.Auyl äkımıne ümıtkerler öz baǧdarlamalaryna äleumettık mäselelerdıŋ şeşımın ūsyndy. Altai Taijanovtyŋ aituynşa, mūny jetkızu, ıske asyru kez kelgennıŋ qolynan kelmeidı.
«Aluan-aluan jüirık bar, älıne qarai şabady. Auyl, tıptı audan äkımı özı jol sala almaidy. Ol üşın biudjetten qarjy qarastyryluy kerek. Al qarjy bölu üşın sol mekennıŋ aqsap tūrǧan tūsyn, naqty tüsındırıp, aitu kerek. Oblys äkımı qoldap, mäslihatta bekıtıluı tiıs. Auyldan sailanǧan, halyq taŋdaǧan adam ıs qylam dese joǧary otyrǧandar qoldaidy dep esepteimın. Al ony taǧaiyndaityn bolsa, «ornyŋa basqa adamdy qoiamyn, ündemei otyr» dep aituy mümkın. Halyq sailaǧan adamnyŋ artynda halyq bar. Jaltaqtamai, öz bılımı men bılıgın osy salada paidalana alady»,- dedı Marat Ospanov atyndaǧy Batys Qazaqstan medisina universitetı qoǧamdyq-gumanitarlyq tärtıp kafedrasynyŋ meŋgeruşısı, oblystyq qoǧamdyq keŋes müşesı Altai Taijanov.Onyŋ sözınşe, sailaudyŋ ädılettı ötuın qamtamasyz etu qajet. Dūrys, ısker azamat auyldy örge süireidı. Dūrys taŋdau auyl tūrǧyndarynyŋ sanalylyǧyn, bılıktılıgı men parasattylyǧyn körsetedı.
«Bıreudıŋ joǧalǧan tailaǧyn bıreu öleŋ aityp jürıp ızdeidı degen bar. Menıŋ oiymşa äkım sol auyldan şyqqan adam boluy kerek. Bälkım ol qalada tūryp, auylǧa äkım bolǧan soŋ köşıp, ülken ıs tyndyruy mümkın. Mūndai adamdardy qūptaimyn. Al auyl äkımı qyzmetın tramplin retınde qoldanyp, joǧary qyzmetterge körsetudı közdese, būrys. Qaladan auylǧa barsa, «Ruhani jaŋǧyru» baǧdarlamasynyŋ oryndalǧany. Körgen, bılgenın, üirengenın auyldastaryna arnasa, odan artyǧy joq bolar edı»,- dedı Altai Taijanov.
Aqparat inform.kz saitynan alyndy
Ūqsas jaŋalyqtar
