Qazaqstandyqtar áleýmettik jelilerde mektep avtobýstaryn satyp alý týraly jańalyqty talqylap jatyr. Keıbir paıdalanýshylardyń pikirinshe, kólik ata-analardyń kelisiminsiz balalardy evakýaııalaý úshin paıdalanylmaq. Bul aqparattyń jalǵan ekenin stopfake.kz jazdy, dep habarlaıdy «Adyrna» ulttyq portaly.
Aqparat boıynsha, jeńildetilgen sharttarmen 515 mektep avtobýsyn satyp alý týraly Indýstrııa jáne ınfraqurylymdyq damý mınıstri Beıbit Atamqulov bıy maýsym aıynyń sońynda málim etken bolatyn. Biraq bul habardy estigende ata-analardyń bári birdeı qýanǵan joq. Instagram-da keıbiri bul avtobýstar balalardy sabaqtan alyp ketý úshin qajet, al ata-anaǵa balasynyń qaıda ekeni aıtylmaıdy, bul olardy COVID-19 qarsy vakına alýǵa májbúrleý úshin jasalady degen pikirlerin bildirdi.
QR Bilim jáne ǵylym mınıstrligi bul boljamdardy joqqa shyǵardy. Vedomstvo ókilderi keıbir balalarǵa mektepke jetý qıyn bolǵandyqtan jańa avtobýstar satyp alý qajettilikten týyndaǵanyn habarlady.
«Balalardyń qaýipsizdigi balalardy mektepke jáne úıge tegin tasymaldaýdy uıymdastyrý arqyly qamtamasyz etiledi. Buǵan 21 myńnan astam bilim alýshy muqtaj, olar úshin 758 birlik avtokólik tasymaly qamtamasyz etilgen. Sońǵy úsh jylda avtobýs parki 203 birlikke jańartyldy. Búgingi tańda avtokólik satyp alý qajettiligi áli de saqtalyp otyr. Bul máseleni sheshý úshin mektepterdi avtobýstarmen qamtamasyz etý jónindegi Jol kartasy aıasynda avtobýs parkin jańartý josparlanǵan», – dep habarlady QR BǴM baspasóz qyzmetinen.
Sondaı-aq mektep avtobýstary balalardy mektepke jáne mektepten úıge jetkizý úshin ǵana paıdalanylmaq. Kólikti basqa maqsattarda paıdalaný josparda joq.
Demek elimizde ata-analardy vakınaııalaýǵa májbúr etý maqsatynda balalardy mektepten jasyryn túrde áketý úshin mektep avtobýstary satyp alynatyny týraly pikirler negizsiz jáne shyndyqqa janaspaıdy.
"Adyrna" ulttyq portaly
