Qyzylorda oblysy Aral aýdanynda 150-deı oqýshy bıyl jańa oqý jylynda mekteptiń emes, ákimdik ǵımaratynyń tabaldyryǵyn attaǵaly otyr. Óıtkeni nebári bes jyl buryn ǵana bıýdjettiń 400 mıllıon teńgesine salynǵan aýyldaǵy sý jańa bilim uıasy jabylyp qalǵan, dep habarlaıdy “Adyrna” ulttyq portaly 31 arnaǵa silteme jasap.
Qoldanysqa berilgenine kóp uzamaı mekteptiń qabyrǵalary jarylǵan. Qazir qulaýdyń az-aq aldynda tur. Sondyqtan, byltyr bilim ordasy apatty dep tanylyp, esigine qara qulyp salynǵan. Bilim uıasynyń qurylysyna 402 mıllıon teńge jumsalypty. Ata-atanalar bıýdjettiń aqshasyna dál osyndaı sapasyz mektep salyp bergen jergilikti bıliktegilerge ashýly.
Olar aldaǵy oqý jylynda da sabaq ákimdik ǵımaratynda ótedi degenge narazylyq bildirdi. Óıtkeni eshqandaı talaptarǵa saı kelmeıtin ákimdikte oqýshylar byltyr bir toqsan oqyǵan eken. Sol kezde sýyq ǵımaratta balalarymyz tońyp, birinen soń biri aýyryp shyqty deıdi.
“Qıyn boldy. Balalar syımady. Eń kóp degeni 24 baladan boldy. Onyń ústine sýyq boldy. Ishi remonttalmaǵan, balalar tońdy. Biraq amal joq. Oqý kerek, oqydy”, – deıdi ata-ana Gúlmarash Ábiltaeva.
Al oblystyq bilim basqarmasy aýyl oqýshylarynyń máselesin bıyl da sheship bere almaıtyndaryn kesip aıtty. Basqarma ázirge tek apatty mekteptiń bul jaǵdaıyn tekserip, jobalyq-smetasyn daıyndaýǵa ǵana qarajat aýdarylatyn boldy dep otyr.
“Jobalyq-smetalyq qujattar ázirlenip, oblystyq máslıhatqa bıýdjettik ótinim usynylyp otyr. Bıýdjetten qoldaý taýyp otyr. Sapaly salynýy, sapasyzdyǵynan apatty jaǵdaı oryn alyp otyr deý úshin oǵan saraptama kerek. Jer asty sýlary kóbeıip ketedi. Sodan bolýy kerek”- deıdi Qyzylorda oblystyq bilim basqarmasy basshysynyń orynbasary Baǵdat Berdáýletov.
Basqarmadyǵalar da ádettegi sheneýnikterdeı mekteptiń nebári bes jylda apatty kúıge túsýine tabıǵatty kinálap otyrǵandaı. Qazirgi qıraýǵa shaq qalǵan ǵımarattyń "taǵdyry" saraptamadan keıin sheshiledi.
