قىزىلوردا وبلىسى ارال اۋدانىندا 150-دەي وقۋشى بيىل جاڭا وقۋ جىلىندا مەكتەپتىڭ ەمەس، اكىمدىك عيماراتىنىڭ تابالدىرىعىن اتتاعالى وتىر. ويتكەنى نەبارى بەس جىل بۇرىن عانا بيۋدجەتتىڭ 400 ميلليون تەڭگەسىنە سالىنعان اۋىلداعى سۋ جاڭا ءبىلىم ۇياسى جابىلىپ قالعان، دەپ حابارلايدى “ادىرنا” ۇلتتىق پورتالى 31 ارناعا سىلتەمە جاساپ.
قولدانىسقا بەرىلگەنىنە كوپ ۇزاماي مەكتەپتىڭ قابىرعالارى جارىلعان. قازىر قۇلاۋدىڭ از-اق الدىندا تۇر. سوندىقتان، بىلتىر ءبىلىم ورداسى اپاتتى دەپ تانىلىپ، ەسىگىنە قارا قۇلىپ سالىنعان. ءبىلىم ۇياسىنىڭ قۇرىلىسىنا 402 ميلليون تەڭگە جۇمسالىپتى. اتا-اتانالار بيۋدجەتتىڭ اقشاسىنا ءدال وسىنداي ساپاسىز مەكتەپ سالىپ بەرگەن جەرگىلىكتى بيلىكتەگىلەرگە اشۋلى.
ولار الداعى وقۋ جىلىندا دا ساباق اكىمدىك عيماراتىندا وتەدى دەگەنگە نارازىلىق ءبىلدىردى. ويتكەنى ەشقانداي تالاپتارعا ساي كەلمەيتىن اكىمدىكتە وقۋشىلار بىلتىر ءبىر توقسان وقىعان ەكەن. سول كەزدە سۋىق عيماراتتا بالالارىمىز توڭىپ، بىرىنەن سوڭ ءبىرى اۋىرىپ شىقتى دەيدى.
“قيىن بولدى. بالالار سىيمادى. ەڭ كوپ دەگەنى 24 بالادان بولدى. ونىڭ ۇستىنە سۋىق بولدى. ءىشى رەمونتتالماعان، بالالار توڭدى. بىراق امال جوق. وقۋ كەرەك، وقىدى”، – دەيدى اتا-انا گۇلماراش ابىلتاەۆا.
ال وبلىستىق ءبىلىم باسقارماسى اۋىل وقۋشىلارىنىڭ ماسەلەسىن بيىل دا شەشىپ بەرە المايتىندارىن كەسىپ ايتتى. باسقارما ازىرگە تەك اپاتتى مەكتەپتىڭ بۇل جاعدايىن تەكسەرىپ، جوبالىق-سمەتاسىن دايىنداۋعا عانا قاراجات اۋدارىلاتىن بولدى دەپ وتىر.
“جوبالىق-سمەتالىق قۇجاتتار ازىرلەنىپ، وبلىستىق ماسليحاتقا بيۋدجەتتىك ءوتىنىم ۇسىنىلىپ وتىر. بيۋدجەتتەن قولداۋ تاۋىپ وتىر. ساپالى سالىنۋى، ساپاسىزدىعىنان اپاتتى جاعداي ورىن الىپ وتىر دەۋ ءۇشىن وعان ساراپتاما كەرەك. جەر استى سۋلارى كوبەيىپ كەتەدى. سودان بولۋى كەرەك”- دەيدى قىزىلوردا وبلىستىق ءبىلىم باسقارماسى باسشىسىنىڭ ورىنباسارى باعدات بەرداۋلەتوۆ.
باسقارمادىعالار دا ادەتتەگى شەنەۋنىكتەردەي مەكتەپتىڭ نەبارى بەس جىلدا اپاتتى كۇيگە تۇسۋىنە تابيعاتتى كىنالاپ وتىرعانداي. قازىرگى قيراۋعا شاق قالعان عيماراتتىڭ "تاعدىرى" ساراپتامادان كەيىن شەشىلەدى.
