Búgin Shymkent qalasy ákiminiń orynbasary Erǵalı Bilisbekov aqparattyq –kommýnıkaııalyq ortalyǵynda ótken baspasóz brıfıngine qatysyp, 2021 jylǵy qańtar-mamyr aılaryndaǵy qalanyń strategııalyq damýy boıynsha atqarylǵan jumystaryn qorytyndylady.
Jıyn barysynda Erǵalı Dáýletbekuly BAQ ókilderine ózi jetekshilik etetin turǵyn úı, jumyspen qamtý jáne áleýmettik qorǵaý, ekonomıka jáne bıýdjettik josparlaý, qarjy salalary boıynsha birqatar suraqtarǵa jaýap berdi.
Qalanyń áleýmettik-ekonomıkalyq damýy turǵysynda mańyzdy salalardyń biri - qarjy salasy. Bıylǵy túsimder jospary 451 mlrd 275,4 mln teńgeni quraıdy. Onyń ishinde salyqtyq túsimder, salyqtyq emes jáne negizgi kapıtaldy satýdan túsimder men transfertter bar.
Jıynda atap kórsetilgenindeı, osy jyldyń 5 aıynda jergilikti bıýdjetke túsetin salyqtar men basqa da túsimderdiń jospary 121,8 %-ǵa oryndalǵan. Iaǵnı, jospar boıynsha 54 mlrd. 39,6 mln.teńgeniń ornyna naqty 65 mlrd. 820,2 mln.teńge túsip, 11 mlrd. 780,6 mln.teńgege artyq oryndaldy.
– Bıýdjettiń shyǵystar bóligin oryndaý jónindegi kórsetkishterdiń de jaman emestigin atap ótkim keledi. Ótken jyldyń qorytyndysymen 452,7 mlrd.teńge bıýdjet qarjysy ıgerilip, josparlanǵan meje 99,7%-dy quraǵan bolatyn. Bul bizdiń qalamyzdaǵy sońǵy jyldardaǵy joǵary kórsetkish, –dedi qala ákiminiń orynbasary.
Bıyl bıýdjet shyǵystarynyń basym bóligi áleýmettik salaǵa baǵyttalyp otyr. Onyń ishinde bilim berý, áleýmettik kómek jáne áleýmettik qamsyzdandyrý, mádenıet, sport, týrızm, aqparattyq keńistik jáne densaýlyq caqtaý salalary. Jalpy bıýdjettiń ıgerilýi týraly málimetterdi qala ákimdiginiń jáne qarjy basqarmasynyń saıtynan kórýge bolady. Málimetter aı saıyn jańartylyp otyrady.
Shymkent qalasy ákimdiginiń baspasóz qyzmeti
