Londonnyń batysyndaǵy Kensıngton baǵynda kópshiliktiń súıiktisi bolǵan Dıana hanshaıymnyń músini qoıyldy. Eskertkishti hanshaıymnyń uldary — knıazdar Ýılıam men Garrı ashty dep habarlaıdy "Adyrna" ulttyq portaly "RIA Novostıge" silteme jasap.
Hanshaıymnyń 60 jyldyǵyna oraı rásim Kensıngton saraıynyń janynda ornalasqan Sanken baǵynyń qupııa baqshasynda ótken. Oǵan knıazdardan basqa Dıana otbasynyń músheleri, músinshi Ian Rank-Brodlı, landshaft dızaıneri Pıp Morrıson jáne eskertkishtiń qamqorshylyq komıtetiniń músheleri qatysqan. Eskertkishtiń ashylýynda hanzada Charlz bolmaǵan.
Músinniń ashylýymen birge kórermenderge Morrıson qurǵan, hanshaıymǵa arnalǵan jańartylǵan memorıaldy baq usynylǵan. "Sunken Garden" baǵy Dıana hanshaıymnyń Kensıngton saraıyndaǵy súıikti oryndarynyń biri bolǵan. Qazir munda hanshaıymnyń súıikti gúlderi, sonyń ishinde raýshan gúlderi, qyzǵaldaqtar, Dahlias jáne lavanda gúldeıdi. Baqty jasaqtaý 2019 jyldyń qazan aıynda bastalǵan. Jáne ony Ulybrıtanııa korol saraılary men baqshalarynyń bastyǵy Grem Dıllamor bastaǵan bes baǵban jasaqtaǵan. Myń saǵattyq jumys ýaqyty ishinde baǵbandar 4 myń gúl ekken.
Ýılıam men Garrı Dıana hanshaıymnyń músinin jasaýǵa 2017 jyly tapsyrys bergen. Músinniń avtory - brıtandyq Renk-Brodlı. Músindi ornatý koronavırýstyq pandemııaǵa baılanysty keshiktirilgen.
Aıta ketý kerek, Hanshaıym Dıana — Ýeldyq Charlz hanzadanyń, brıtandyq taq murageriniń alǵash áıeli. 2002 jylǵy "Bı-bı-sı" kompanııasynyń júrgizgen saýalnamasy boıynsha Dıana tarıhtaǵy eń uly brıtandyqtar tiziminde úshinshi orynǵa ıe bolǵan. Ol 1997 jyly 31 tamyzda 36 jasynda Parıjde jol apatynan kóz jumdy.
"Adyrna" ulttyq portaly.
