Shymkentte azyq-túlik baǵasyn turaqtandyrý boıynsha kúndelikti monıtorıng júrgiziledi

2556
Adyrna.kz Telegram

Kúndelikti júrgizilip otyrǵan monıtorıng boıynsha búgingi kúnge qalanyń ishki naryǵyndaǵy áleýmettik mańyzy bar 19 negizgi azyq-túlik taýarlarynyń shekti baǵa deńgeıimen salystyrmaly kórsetkishi boıynsha 3 ónimde ósim baıqalsa, qalǵan ónimderdiń baǵasy shekti baǵa deńgeıinde, ıaǵnı bir qalypta tur. Bul týraly búgin aýyl sharýashylyǵy jáne veterınarııa basqarmasynyń basshysy A.Qanybekov qala ákimdiginiń «Instagram» jáne Facebook paraqshasynda ótken tikeleı efırde málimdedi.

Onyń aıtýynsha, búgingi kúni qalada áleýmettik mańyzy bar azyq-túlik ónimderiniń baǵalaryn turaqtandyrý maqsatynda jumys toby men turaqtandyrý qoryn basqarý komıssııasy jumys jasaıdy.

«Jalpy halyq kúndelikti birinshi kezekte tutynatyn áleýmettik mańyzy bar azyq-túlik baǵalary basty nazarda. Búginde azyq-túlik taýarlarynyń baǵasy óndirýshiniń ózindik qunynyń artýymen jáne óndiriste paıdalanatyn shıkizat baǵasynyń ósýine baılanysty qymbattap otyr. Osy oraıda, qalamyzda áleýmettik mańyzy bar azyq-túlik taýarlaryna baǵany turaqtandyrý sharalary sheńberinde birqatar jumystar atqaryldy»,-dedi basqarma basshysy.

Máselen, áleýmettik azyq-túlik taýarlarynyń baǵasyn negizsiz ósirmeý maqsatynda iri saýda jelileri, azyq-túlik bazarlary jáne jergilikti taýar óndirýshileri men eki jaqty ortaq 14 memorandýmǵa qol qoıyldy. Sonymen birge, turaqtandyrý qorynyń aınalym mehanızmi boıynsha iri saýda jelileri «Gramad», «Fırkan», «Magnum Cash&Carry» jáne jergilikti taýar óndirýshileri, kásipkerlik sýbektilerine aınalymǵa qaryz qarajat berilip, kelisim shart túzilip, birqatar áleýmettik mańyzy bar azyq-túlik taýarlary belgilengen baǵada satylýda.

Budan bólek, birinshi qajettiliktegi negizgi azyq-túlik baǵalaryn turaqtandyrý aıasynda qalanyń 8 jerinen «Hermes» JShS-niń jyljymaly áleýmettik saýda núkteleri uıymdastyrylyp, kókónis ónimderi belgilengen baǵada satylýda.

Ár apta saıyn turaqty túrde qalanyń 4 jerinde azyq-túlik jármeńkeleri ótkizilýde («Fosforshylar» mádenıet úıiniń aldy, «Qajymuqan» atyndaǵy ortalyq stadıon aýmaǵy, «1000 usaq-túıek» saýda qatary, «Rahıma Plaza» saýda ortalyǵynyń jany).

Buǵan qosa, halyqtyń tyǵyz ornalasqan aımaǵynda (Eńbekshi aýdany, Elshibek batyr kóshesi №116) áleýmettik dúken ashylyp, kúndelikti tutynatyn azyq-túlik taýarlary tómen baǵada satylýda.

Shymkent qalasy ákimdiginiń baspasóz qyzmeti

Pikirler