Almatyda úıi órtengen otbasy monshada turady. Áp-sátte bar jıǵan-tergeni kúlge aınalǵan ana tórt balasymen birge jýynatyn jerde bir aptadan beri túnep júr. Al, qyzyl jalyn sharpyǵan baspana qaıta qalpyna keltirýge de jaramaıdy. Esep bergende eldi qarq qylatyn jergilikti bılik tótenshelikterdiń jaýabyn kútýden basqa qaıran joq deıdi. Onyń úısiz-kúısiz tórt balaǵa ne qatysy bar ekenin ózderi túsindirer. Al, dalada qalǵan otbasyn eń bolmasa ýaqytsha bir ortalyqqa da ornalastyrýǵa bolmaı ma dep bizdiń tilshimiz shyryldap júr. Bul týraly «Adyrna» ulttyq portaly «Eýrazııa» birinshi arnasyna silteme jasap habarlaıdy.
Taý bókterinde ornalasqan jer úıdiń qalaı jyldam janyp ketkeni Qalamqas Kúlimjanovanyń áli de kóz aldynda. Keshki saǵat segizdiń shamasynda qyltımadan shyqqan órt aýmaqqa jyldam taraı bastaǵan. Ishinde qystyq kıimder men kilemsheler bolǵandyqtan, tez tutanýyna sebep boldy, deıdi.
«Balkon jaǵym jana bastady. Balalarymdy jınadym da vorotanyń arǵy jaǵyna shyǵyp kettim. Kórshiler bári júgirip keldi. Balkonda qystyq kıimder bolǵan. Jerde kovralan tóselgen. Sol eń birinshi tez jana bastady», - deıdi kópbalaly ana Qalamqas Kúlimjanova.
Aldyn ala boljam boıynsha órttiń shyǵýyna elektr toǵynyń tuıyqtalýy áser etken bolýy múmkin. Sol kúni bir óship, bir janyp turdy, deıdi. Tipti, qyrsyqqanda qubyrdaǵy sý da aqpaı qalǵan. Óıtkeni, jetisine bir ret tazalyq jumystary júrgiziledi eken.
«Qyzyl jalyn sharpyǵan baspana taý bókterinde bolǵandyqtan órt sóndirýshiler kelgenshe biraz ýaqyt ótipti. Oǵan deıin úıdiń saý tamtyǵy qalmaı órtenip ketken. Bilikti qurylys mamandary aıadaı mekendi qalpyna keltirý múmkin emestigin jetkizipti. Sondyqtan dál osy mańaıdan shaǵyn ǵana úı kóterýden basqa amaly joq», - deıdi tilshi Baýyrjan Jaqsymbet.
Joldasymen ajyrasyp, tórt balasyn ózi baǵyp otyrǵan Qalamqas qazir jumyssyz ekenin jetkizdi. Jıǵan dúnıesiniń barlyǵy órtenip ketkendikten, endi ne isterin bilmeı dal. Al, aýdan ákimdigi kópbalaly anaǵa qol ushyn berýge ázirmiz, biraq kútý qajet, deıdi.
«Qazir biz Tótenshe jaǵdaı mamandarynyń qorytyndysyn kútip otyrmyz. Osydan keıin qarjylaı ótemaqy tóleý týraly qujattardy ázirleımiz. 15 kúnniń ishinde qujat kelýi tıis. Alty aıdyń ishinde ótemaqy da tólenýi múmkin», - deıdi Naýryzbaı aýdany ákiminiń apparaty áleýmettik sala bóliminiń bas mamany Ásel Júnisova.
Órtengen baspana ıesi jeke menshik jerinde oryn bolǵandyqtan endi oǵan shaǵyn bolsa da úı turǵyzyp alýdy kózdep otyr. Óıtkeni, monshada qysta túneý múmkin emes, deıdi. Qazirdiń ózinde keshi salqyn, ishi tar ekenin aıtýda.
«Tar. Qazirgi keshki ýaqyttarda salqyn. Túnde sýyq. Biraq basqa baratyn jerim joq. Ne bolatynyn bilmeımin» - deıdi kópbalaly ana Qalamqas Kúlimjanova.
"Adyrna" ulttyq portaly
(foto stan.kz saıtynan)
