Búgin ataqty jazýshy, dramatýrg Sofy Smataev seksen jasqa toldy. Áleýmettik jelilerde óner adamdary jazýshyny quttyqtap jatyr, dep habarlaıdy «Adyrna» ulttyq portaly.
«Búgin - altynnan ardaqty, kúmisten salmaqty, jany saf taza jazýshy Sofy Smataev aǵanyń seksen jastyń seńgirine shyqqan týǵan kúni!
Álekedeı jalanǵan áleýmettik jelini seksen jasynda júgendep, erttep minip, elmen erkin aralasyp otyrǵan batyl júrek aǵanyń jasampaz da jeńimpazdyǵy kimge bolsyn úlgi-ónege», - dep Tóreǵalı Táshenov jyly lebizin bildirdi.
Al Dýman Ramazan jazýshynyń shyǵarmashylyǵyn, sonyń ishinde «Elim-aı» romanyn taldap, odan bólek quttyqtaý tilegin jazypty.
«Mine, mereıli 80 jasqa tolyp otyrsyz. Sizge bergen Qudaıdyń eń úlken syıy osy. Bul jasqa kelgen de, kelmegende bar. Másele, qalaı kelýde?! Siz osynaý mereıli jasqa aýyz toltyryp aıtarlyqtaı jetistiktermen, zor tabyspen, iri jeńispen kelip otyrsyz. Qolyńyzdan qalamyńyz túsken joq. Qal-qadirińizshe týǵan elińizge aq-adal qyzmet etip kelesiz. Jumyr basty pendege, eli men halqyn súıetin qalamgerge budan artyq baqyt joq. Shyn baqyttysyz, Aǵa! Baǵyńyz baıandy bolsyn, qýanyshyńyz uzaǵynan súıindirsin! Qashanda mereıińiz ústem, mártebeńiz joǵary, abyroıyńyz asqaq bolsyn!
Biz Sizdi qazaq ádebıetiniń klassıgi dep bilemiz! Solaı tanımyz, baǵalaımyz. Shynynda da solaı! Sizdiń shyǵarmalaryńyz áli talaı urpaqtyń tanym-túsinigin ushtap, kózqarasyn qalyptastyryp, kóńil kókjıegin keńeıte túserine senimdimiz!
Aman bolyńyz, Aǵa! Ǵumyr-jasyńyz uzaq bolsyn!
Adam urpaǵymen myń jasaıdy! Urpaǵyńyzdyń qyzyq-qýanyshyn kóre berińiz!
Halqyńyzdyń súıispenshiligi men qalyń oqyrmanyńyzdyń ystyq yqylasyna bólene berińiz!
Qudaıym, boıyńyzǵa da, qalamyńyzǵa da qýat bersin!», - dep jazdy ol.
"Adyrna" ulttyq portaly
