Ş.Ş. Uälihanov atyndaǧy Tarih jäne etnologiia instituty Qazaqstan öŋırlerınıŋ tarihyna arnalǧan 18 tomdyq arhiv qūjattary men materialdar jinaǧyn jaryqqa şyǧardy. Basylym elımızdıŋ barlyq oblystarynyŋ tarihyn qamtityn qūjattyq derekter negızınde daiyndalǧan, dep habarlaidy "Adyrna".
Jinaqqa engızılgen materialdar negızınen üş tarihi kezeŋdı qamtidy: patşalyq däuır, keŋes kezeŋı jäne täuelsızdık jyldary. Ǧalymdardyŋ aituynşa, jaŋa arhiv qūjattary arqyly Qazaqstan öŋırlerınıŋ tarihyndaǧy būryn belgısız bolyp kelgen köptegen derekter ǧylymi ainalymǧa engızılgen.
Auqymdy jobany daiyndauǧa institut qyzmetkerlerımen qatar öŋırlerdegı ǧylymi ökılder de qatysqan. Olardyŋ qatarynda B.S. Jumagulov, M.N. Sdykov, A.N. Seidehan, G.A. Abenova, M.Z. Utegenov, V.V. Kozina, N.A. Kubik, J.S. Aubakirova, A.A. Maksutova, A.T. Maden, J.D. Mustafina, R.J. Baidaly jäne basqa da zertteuşıler bar.
18 tomdyq qūjattar men materialdar jinaǧynyŋ är tomy 500 danamen basylyp şyqqan. Biyl osy qūjattar negızınde är oblystyŋ ejelgı kezeŋnen bügınge deiıngı tarihyn qamtityn bırtomdyq ǧylymi monografiialar şyǧaru josparlanyp otyr.
Sonymen qatar būl arhiv materialdary Ejelgı däuırden bügınge deiıngı Qazaqstan tarihy atty 7 tomdyq akademiialyq basylymdy äzırleu barysynda keŋınen qoldanylyp jatyr. Atalǧan ǧylymi eŋbek te Ş.Ş. Uälihanov atyndaǧy Tarih jäne etnologiia institutynda daiyndaluda.
Jaŋa şyqqan kıtaptar Qazaqstannyŋ barlyq öŋırındegı kıtaphanalar men ǧylymi mekemelerge tegın taratylatyn bolady.
