Reseıde koronavırýstyń órshýi arta tústi. On kún buryn kúndik juqtyrý statıstıkasy 7-8 myń arasynda bolsa, qazirgi ýaqytta ol 17-19 myńǵa deıin jetti. Reseıdegi vakına qabyldaýdyń qarqynyna qaramastan jaǵdaıdyń kúrt nasharlaýy toqtar emes.
Reseıdiń 13 aımaǵy "qyzyl aımaq" qataryna endi. Tek qana Ingýshetııa men Iakýtııa "jasyl aımaq" qatarynda tur. Alaıda ol uzaqqa sozylmaıdy deıdi mamandar. Aldaǵy aptada atalmysh eki aımaqta da jaǵdaı kúrt nasharlaýy múmkin.
Vırýs juqtyrýdan Máskeý, Habarovsk, Tyva, Amýr, Hakasııa, Kırov, Komı, Býrıatııa, Nene, Chýkotka aımaqtary kósh bastap tur. Bul aımaqtaǵy vırýs juqtyrý ındeksi 1,2-ge teń. Sarapshylar jaǵdaıdyń tamyz aıyna deıin turaqtalýy qıyn deıdi. Sebebi vakına alǵandar sany paıyzdyq negizde az, al halyqtyń óz erkimen alýǵa nıeti joq. Sondyqtan vırýstyń taraýy artpasa kemimeıdi degen boljamdar aıtylýda. 21 maýsymda Reseıde 17378 adamnan vırýs anyqtalǵan. Bir kúnniń ishinde 440 adam indetten kóz jumǵan. Jalpy pandemııa bastalǵaly beri Reseıde 5334204 adam vırýs juqtyryp, 129801 adam qaıtys bolǵan.
"Adyrna" ulttyq portaly
