Kúni keshe ǵana ólsheýli ǵumyrda sheksiz meıirim ıesi, janashyr áriptesimiz, ulaǵatty ustaz Maıra Ǵılaqyzy ómirden ozdy.
Maıra Ǵılaqyzy 1940 jyly 26 qyrkúıekte Gýrev (Atyraý oblysy, Teńiz, Qurmanǵazy) aýdanynda dúnıege keldi. 1957 jyly sol aýdannyń Abaı atyndaǵy orta mektebin bitirip, 1957-1962 jyldary Almaty shet tilderi ınstıtýtynyń nemis fakýltetinde oqydy. 1967 jyldan bastap H.Dosmuhamedov atyndaǵy Atyraý memlekettik ýnıversıtettiń fızıka-matematıka fakýltetinde nemis tilinen aǵa oqytýshy, akademııalyq doent qyzmetterin atqardy. Ýnıversıtettiń qoǵamdyq jumystaryna belsene aralasyp, ýnıversıtettiń qyzdar keńesiniń tóraıymy, fızıka-matematıka fakýltetiniń partııa uıymynyń hatshysy boldy. QR «Bilim berý isiniń úzdigi» tósbelgisimen, «QR ǵylymyn damytýǵa sińirgen eńbegi úshin», «QR bilim berý isiniń qurmetti qyzmetkeri», jas urpaqty oqytý jáne tárbıeleý isindegi eleýli tabystary úshin 2009 jyly «Y.Altynsarın», H. Dosmuhamedov atyndaǵy tósbelgilerimen, oblystyq jáne qalalyq ákimshilikterdiń alǵys hattarymen marapattalǵan.
Maıra apaı tek bilim men ǵylym salasynda ǵana jetistikterge jetip qoımaı, jyly uıadaı óziniń otbasynda da baqytqa kenelgen jan. Qudaı qosqan qosaǵy, Atyraý ǵalymdarynyń kóshbasshysy, uzaq jyldar boıy ýnıversıtet rektory bolyp abyroıly eńbek etken Hısmet Bozanuly ekeýi urpaq ósirip, bıikke jetelep jetkizdi, ornymen oqytyp adam qataryna qosty.
Bar ǵumyryn bilim salasynyń órkendeýine úles qosýǵa arnaǵan abzal jan, aıaýly ustaz, Maıra Ǵılaqyzynyń jarqyn beınesi jadymyzda árdaıym saqtalady. Jany jánnatta bolǵaı!
Atyraý memlekettik ýnıversıtetiniń rektory Idrısov Salamat Nurmuhanuly.
Maıra apamyzdyń qazasyna
Armysyń Atyraýdyń qaraly eli,
Torlady aýyr qaza sanany endi.
Altaıdan Atyraýǵa kelgenimde,
Sıpaǵan mańdaıymnan Anam edi.
Ańyrap keldim joqtap ornyńdy,
Amalsyz kóteremiz qazany endi.
Maıra apam, erkeletken bir ul edim,
Balam dep kim aıtady maǵan endi.
Sekildi týǵan anam kórinetin,
Túzetip beretuǵyn jaǵa-jeńdi.
Eske alyp eńireımiz nurly júzin,
Shaqyryp duǵamyzǵa tamam eldi.
Anamyz jatqan jeri jaryq bolsyn,
Alagór Haq Qudaıym panańa endi.
Meıirimdi bar jurtyna asyl Ana,
Máńgilik umytylmas ǵasyr Ana.
Hısmet atamyzǵa asyqty ma,
Erterek barǵysy kep qasyna da.
Amal ne basqa túsken qıyndyqqa,
Qaramaıdy ajal kózdiń jasyna da.
Júregi qandaı jumsaq sol Ananyń,
Bólengen alǵysyna kóp adamnyń.
Meıiri kúndeı nurly kúlip turǵan,
Anasy sekildi edi bar balanyń.
Kúrsine eske alamyz endi Anany,
Júrekten saǵynyshtyń arnap ánin.
Ezildi estigende et júregim,
Eńsemdi basyp qaıǵy ketti meniń.
Amal ne basqa tústi, kónemiz de,
Jánnattyq bolsyn Ana dep tiledim.
Aıaýly Beıbit, Saqtaǵan, Erlan aǵalarym
Sabyr et, asyl týǵan tektilerim!
Tógilgen meıirine razymyz,
Sónbeıtin keýdedegi shyraǵymyz
«Qaraǵym, aınalaıyn» degen sózin, estirdeı eleńdeıdi qulaǵymyz
Amal ne Asyl Ana qımasaq ta,
Saǵynyp kózden aǵar bulaǵymyz.
Eshqashan umytpaımyz, aıaýly Ana
Beıishte bolsyn baqı turaǵyńyz!
Qazaqstan ulttyq muraǵat qorynyń qyzmetkeri
Ahat Rasýl
MEIIRIMDI MAIRA APAI
Atyraý jurtshylyǵy jany jaısań jaqsy adam Maıra Gılaeva apamyzdy qadir tutatyn. Ýnıversıtettegi ustazdyǵy bir bólek, adamshylyǵy bir bólek jany jomart apamyz edi. Atyraý ýnıversıtetin uzaq jyldar basqarǵan rektor, belgili tarıhshy ǵalym Hısmet Tabyldıevtyń jary Maıra apaıdyń ár isi ónege, úlgi bolatyn. Hısmet aǵanyń 80 jyldyq mereıtoıy qarsańynda kitap shyǵarý, uıymdastyrý isine kómek bergen edik. Maıra apaı «Mynaý Farızanyń erterekte jibergen óleńi edi maǵan arnaǵan, sony kitapqa kirgizý kerek sııaqty» degen edi. Farıza apaıdyń óleńi Maıra apaıǵa degen rıza kóńilden jazylǵan eken.
Maıra Gılaevaǵa
Aıtqyzbaı - aq oıyńdy túsinetin,
Ázildeıtin, aldyńda kishiretin.
Jany jumsaq, jarasty sulý Maıra
Jaıdarysyń, jaqynsyń kisige tym.
Maıra sensiń úlgi eter maqtanymyz,
Eneni de mápelep baptadyńyz.
Qos batyrdy mura ǵyp Hısaǵaǵa
Ózin jigit qalpynda saqtadyńyz.
Aqyldy áıel...
Erge bergen baǵy ǵoı bir Allanyń,
Ana -tuǵyr ushyrar qyrandaryn.
Hısaǵanyń 60 jas toıy kúni
Maıra , saǵan alǵys pen jyr arnadym.
Farıza Ońǵarsynova
Maıra apaı kitapty kóp oqıtyn jáne sózge mán beretin. Ár sózdiń astaryna úńilip otyratyn. Jasy úlken bolsa da kishireıtpeı syrlasyp, keıde aqylyn aıtyp, ázildesip otyratyn. Men ol kisige «Sizge áıelderdiń danyshpany» dep at qoıdym desem, Maıra apaı kúletin de qoıatyn. Meniń Atyraýǵa barǵanda , amandasyp ketetin jaqsy kóretin apalarymnyń biri -Dildá apaı bolsa, ekinshisi Maıra apaı bolatyn.Ókinishtisi, endi aramyzda joq. Elanasy atanǵan Dildá apaı da, meıirimdi Maıra apaı da ómir joly ónegeli jandar. Mine Maıra apaı da kelmes kerýenge ilesip ,artyna sonyly-soqpaqty iz tastap kete bardy. Aldynan jarylqasyn deımiz. Artynda qalǵan urpaqtaryna qaıǵyryp kóńil aıtamyn.
Aqyn, dramatýrg, aýdarmashy, prozaık, satırık -
Ershý Marjan Amanqosqyzy
"Adyrna" ulttyq portaly
