Búgin Raıymbek aýdany, Narynqol aýdanynda sporttyq keshenniń ashylý saltanaty ótti. Ashylý rásimine Almaty oblysy ákiminiń orynbasary Arslan Dandybaev, Raıymbek aýdanynyń ákimi Nurjan qudaıbergenov, erejesiz jekpe-jekten úsh dúrkin álem chempıony Ardaq Nazarov pen sport ardageri Bekbolat Bırbaev t.b. qatysty.
Arslan Dalabaevtyń aıtýynsha, Jetisý jerinde buqaralyq sportty damytýǵa úlken kóńil bólinýde.
«Bıylǵy jyl bizdiń elimiz úshin óte mańyzdy-táýelsizdiktiń 30 jyldyǵy. Osy jyldar aralyǵynda kólemdi ister atqaryldy. Bul rette bizdiń Almaty oblysynda jyldan jylǵa halyqtyń ál-aýqaty jaqsaryp, barlyq qajetti jaǵdaılar jasalýda.Prezıdent Qasym-Jomart Toqaevtyń aldymyzǵa qoıǵan mindetterine sáıkes, memlekettik qoldaýdyń, qajyrly eńbektiń jáne halyq birliginiń arqasynda biz barlyq salada turaqty damýdy jalǵastyryp kelemiz. Ózderińiz biletindeı, 2018 jyly Memleket basshysy Nursultan Nazarbaevtyń Jarlyǵymen Raıymbek jáne Kegen aýdandary qaıta quryldy.Osyǵan baılanysty aýdan ortalyǵynda ákimshilik ǵımarattardy salý, jóndeý jumystary bastaldy, jańa turǵyn úıler salynyp, paıdalanýǵa berildi. Qysqa ýaqyt ishinde úlken jumys jasaldy.Munyń bári el úshin, bolashaq urpaq úshin jasalady. Jyl saıyn oblysta mereıtoılyq is-sharalar ótkiziledi.Bıyl Qazaqstan Respýblıkasy Táýelsizdiginiń 30 jyldyǵyna, Taldyqorǵannyń 20 jyldyǵyna, Jambyl Jabaevtyń 175 jyldyǵyna, Muqaǵalı Maqataevtyń 90 jyldyǵyna arnalǵan túrli mádenı-buqaralyq is-sharalar josparly túrde ótkizilýde. Sportqa erekshe kóńil bólinedi. Búginde óńirde 11 dene shynyqtyrý-saýyqtyrý kesheni jumys isteıdi. Bul keshen on ekinshi boldy. Sizderdi dene shynyqtyrý-saýyqtyrý kesheniniń ashylýymen quttyqtaımyz», - dedi ol.
Sý jańa ǵımarat ishinde boks, kúres, fýtbol, jattyǵý zaldary men stadıon bar. Sondaı-aq, medıınalyq jáne massaj kabıneti, ákimshilik úı-jaılary, garderoby bar býfet jáne vestıbıýl ornalasqan.
Komandalyq oıyndar zaly voleıbol, basketbol, gandbol, mını-fýtbol, badmınton, tennıske arnalǵan. Sport kesheninde kórermen trıbýnasy 180 orynǵa eseptelgen.
«Bul sport kesheninde tek balalar men jasóspirimder ǵana emes, memlekettik qyzmetkerlerden bastap zeınetkerlerge deıingi barlyq aýyl turǵyndary da aınalysa alady. Osy aımaqtan kóptegen sportshylar shyqty. Mysaly, erkin kúresten Rýslan Jumabekov, Ardaq Nazarov, Beıbit Nazarov, Jasulan Qydyrbaev ta Raıymbek aýdanynyń týmalary. Osyndaı zamanaýı sport kesheninen álemdik jarystarda Olımpıada shyńdaryn baǵyndyratyn sportshylar shyǵady dep úmittenemiz», - dep qorytyndylady Almaty oblysy dene shynyqtyrý jáne sport basqarmasynyń basshysy Nurbaqyt Teńizbaev.
"Adyrna" ulttyq portaly
