Ardaqty aǵaıyn!
Qymbatty baýyrlar!
Dúnıejúzi qazaqtarynyń V quryltaıyna kelgen barshańyzǵa qazaqtyń qasterli Atajurty – Qazaq Eline, onyń bas ordasy – Astanaǵa qosh keldińizder dep, qýanyshymdy bildiremin!
Alty qurlyqqa saýyn aıtqan myna alqaly jıynǵa álemniń 39 elinen 350-den astam qandasymyz keldi.
Qaıda júrse de qazaqtyń tarıhı otany bireý-aq. Ol – Qazaqstan.
Atamekenimiz jalǵyz, ol – bir ýys topyraǵyna deıin qasıetti Qazaq Eli.
Búgingi basqosýǵa negizinen jas býynnyń ókilderi shaqyryldy.
Sebebi, jas urpaq túp qazyǵyn umytpaı, bir tamyryn tarıhı Otanynda jaıýǵa tıis.
Týǵan elimen baılanysyn nyǵaıtyp, ata saltyn saqtap, ana tilin umytpaı, bilip ósýi qajet.
Quryltaı balamaly energııa boıynsha jer júziniń ınnovaııalyq jetistikterin pash etetin EKSPO-2017 kórmesine oraı ótýde.
Biz arnaıy osylaı baılanystyrdyq.
Sebebi, bul Qazaqstannyń mereıin asyryp, kúlli álemniń nazaryn aýdaratyn aýqymdy shara bolyp otyr.
Biz baýyrlarymyz Atajurtynyń búgingi kelbetin kórip, marqaısyn, oı túısin dep, sizderdi EKSPO-ǵa oraı shaqyrdyq.
Dúnıeni tańqaldyrǵan elordamyz – Astananyń ósip-órkendep bara jatqanyn kórsin, qýansyn dep oıladyq.
Kesheden beri Qazaqstannyń marqaıǵan, kórkeıgen astanasyn kórip, kóz jetkizdińizder.
Qurmetti otandastar!
Alǵashqy quryltaıdan beri 25 jyl ótti.
20 ǵasyrda qazaqtyń basynan ótpegen zulmat joq. Táýelsizdiktiń 25 jyly da qıyndyqsyz bolǵan joq.
Degenmen, qazaqtyń talantty halyq ekeni dúnıe júzine belgili. Bárimiz birigip, jumyla jumys istep, birligimizden jazbaǵannyń arqasynda osy jyldar ishinde keleli tabystarǵa jettik.
Jalpy ortasha ómir súretin halyqtardan ozyp, olardan joǵary shyqtyq. 40 paıyz kedeıshilikti 3 paıyzǵa tómendettik.
Ekonomıkamyzdy 22 ese ósirdik. Eldiń tabysy da osynsha ósti. Búgingi qazaqtyń tarıhynda onyń jaǵdaıy men turmysy esh ýaqytta mundaı bolǵan emes.
Bul – tarıh turǵysynan qas qaǵym sát bolǵanmen, qazirgi tańda tutas dáýirge tatıtyn ýaqyt.
Elimizdiń bolashaqqa bastar baǵyty men maqsaty da aıqyn.
Biz bul joldan da óttik. Birinshi jolymyz – táýelsizdik alǵan qýanyshymyz boldy. Ekinshisi – 2030 jylǵa deıingi baǵdarlamamyz. Ony oryndadyq.
Endi úshinshi jol – 2050 jylǵa deıingi strategııamyz. Onyń negizgi maqsaty – órkendegen eń úlken memleketter qataryna qosylý.
Eldigimizdi nyǵaıtatyn 5 ınstıtýttyq reformany iske asyrý úshin «100 naqty qadam» Ult Josparyn oryndap jatyrmyz.
Qazaqstannyń úshinshi jańǵyrýyn jarııalap, onyń 5 basymdyǵyn naqtyladyq.
Konstıtýııalyq reformalar jasap, saıası jańǵyrýdy júzege asyrýdamyz.
Bul jumystardyń ózegine aınalatyn Rýhanı jańǵyrýdy qolǵa aldyq.
Oǵan qoǵamdyq sanany túbegeıli ózgertip, jańa urpaq qalyptastyrýǵa baǵyttalǵan
6 joba negiz bolady.
Zaman óte tez jyljyp keledi. Qazir tehnıka men ınnovaııanyń artqan kezi. Jańalyqtar kún saıyn eselenýde.
Halyqtar zor básekelestik jolyna tústi. Solardyń qatarynda bolý úshin biz de qamdanýymyz kerek.
Birinshiden, qazaq tilin latyn álipbıine kóshirý.
Bul – ana tilimizdiń jahandyq ǵylym men bilimge kirigýin, ári álem qazaqtarynyń rýhanı tutastyǵyn qamtamasyz etetin biregeı qadam.
Muny aıtyp otyrǵan sebebim, qazir TMD aýmaǵyndaǵy qazaqtar kırıll áripterin, Qytaıdaǵy qandastarymyz tóte jazýdy, batys elderindegi baýyrlar latyn álipbıin qoldanýda.
Bárimiz sóıleskende tilimiz bir bolsa da, oqyǵanda úsh túrli bolyp shyǵady. Eshbir kedergisiz túsinisetin bir qazaqtyń balasy bir-biriniń jazýyn uqpaıtyn kúıge jetti.
Bul – jer júzine tarydaı shashylǵan qazaqtyń keıingi urpaǵyn bir-birinen alshaqtatýda.
Kóp uzamaı bul olqylyqtar birjola joıylady.
Qazaq tiliniń latyn álipbıine kóshýi birligimizdi nyǵaıtyp, rýhanı jaqyndastyra túsedi.
Ekinshiden, gýmanıtarlyq baǵyttaǵy eń úzdik 100 oqýlyqty qazaq tilinde shyǵarý.
Bul – qazaqstandyqtar úshin ǵana emes, kúlli qazaq úshin aıryqsha mańyzdy joba.
Shet eldiń oqýlyqtaryn aldymen orysshaǵa, sosyn qazaqshaǵa aýdarǵansha kóp jyl ótedi.
Sondyqtan eń kerekti 100 kitapty qazaq tilinde shyǵarý máselesin alǵa qoıyp otyrmyz.
Endi qandastarymyz qaı elde turǵanyna qaramastan dúnıedegi eń tańdaýly bilimmen ana tilinde sýsyndaı alady.
Qazir osynda san tilde sóıleıtin, tereń bilimdi kóptegen jastar otyr.
Sizderdi kúlli qazaqtyń órisin keńeıtip, deńgeıin kóteretin aıtýly jobaǵa belsene qatysýǵa shaqyramyn.
Joldaýymda muny 2025 jylǵa deıin júzege asyrý kerek degen meje qoıǵan bolatynmyn. Biraq ony soza berýdiń qajeti joq.
Ǵalymdarymyz bizge tıisti áripterdi tańdap berýge tıis.
Menińshe, esh qıyndyq joq. Sebebi, bizdiń balalarymyzdyń bári birinshi synyptan bastap aǵylshynsha oqıdy.
Ósip kele jatqan urpaqqa ony ıgerý esh qıyn bolmaıdy.
Úshinshiden, «Týǵan jer» jobasy árbir azamattyń jeri men eline qamqorlyq jasaýyn kózdeıdi.
Men tarıhı Otanyna septigin tıgizgisi keletin qandastarymyz da kóp ekenine senimdimin.
Árqaısymyz óz múmkindigimizge qaraı kindik qanymyz tamǵan týǵan jerimizge jaqsylyq istesek, búkil halyqtyń berekesi bolar edi.
«Týǵan jerin súıe almaǵan, súıe alar ma týǵan elin?» degen aqynnyń óleń joldary bar.
Shynynda da, otanshyldyq, otandy súıý týǵan jerińnen, týǵan aýylyńnan bastalady.
Sondyqtan «Týǵan jerge táý etý» degen uǵym qazaqqa tán nárse.
Aıtalyq, Eýropadan dáriger qazaq kelip, bir baýyryna operaııa jasasa, bul bar qazaqtyń jany bir ekenin kórsetpeı me?
Nemese quryltaıǵa kelgen árbir qazaq Astanada aǵash otyrǵyzsa, ony jergilikti jurt qıyrdaǵy baýyrymnyń qoltańbasy dep baptap júrse qandaı jarasymdy?!
Sheteldegi qazaq ónerpazy elde konert berse, qazaq ǵalymy tapqan jańalyǵyn engizip, kásipkerler jańa óndirister ashyp jatsa, el men eldiń qosylǵany osy emes pe?!
Jobany úılestirýshi organ Dúnıejúzi qazaqtary qaýymdastyǵymen birlesip, bul baǵytta jumys isteýi kerek.
Tórtinshiden, qazaq úshin Atamekenniń bir shymshym topyraǵyna deıin tunyp turǵan qasıet.
Tutas túrkiniń altyn besigi Altaı, kıeli Túrkistan, ult uıasy Ulytaý jáne basqa da oryndar – barsha qazaq úshin qasıetti.
Bul jerlerge shetelden san myń qazaq kelip, taǵzym etip júr.
Alaıda, keıingi jastardyń eldegi tarıhı, rýhanı qundylyqtardan habary az.
«Qazaqstannyń kıeli jerleriniń geografııasy» jasalǵan soń, ol shettegi qazaqtarǵa da tanystyrylýy qajet.
Qaıda júrsek te alty alashqa ortaq qundylyqtar bizdi biriktire túsedi.
Sondaı-aq, qazaqtyń talaı baǵa jetpes rýhanı qazynalary Qazaqstannan tys jerde.
Biz bir jyldy «Ulttyq tarıh jyly» dep jarııalap, dúnıe júzi boıynsha qazaq tarıhyna qatysty qundylyqtardy izdestirdik.
Kóp dúnıe jınaldy. Keıinnen «Mádenı mura» baǵdarlamasyn iske asyrdyq. Jańa kitaptar jazyp, qazaqtyń ataly sózderin, ánderin, fılosoftar murasynyń jınaǵyn shyǵardyq.
Ǵalymdarymyz shetelderge jasaǵan ǵylymı saparlary arqyly kóptegen qundy muralarymyzben qaıta tabystyrýda.
Jaqynda belgili ǵalymymyz 1,5 myń jyl buryn jasalǵan dombyrany taýyp, elge ákeldi.
Kóne túrki tilinde «jupar kúı áýeni súısindirdi» degen jazýy bar dombyra qazaq kúıi 15 ǵasyr buryn uly óner deńgeıine kóterilgenin kórsetedi.
Qazaqstannan tysqary jerlerde mundaı qundy jádigerler jetip artylady.
Arheologııalyq zertteýler jasaǵanda shettegi kıeli oryndar men muralar nazardan tys qalmaýǵa tıis.
Besinshiden, Qazaqstandyq mádenıetti álemge tanytatyn biregeı joba bastaldy.
Onda otandyq mádenıettiń tańdaýly úlgileri álemniń basty tilderinde sóılep, barlyq qurlyqtarǵa jol tartady.
Sondaı óner týyndylaryn taýyp, saraptap, Birikken Ulttar Uıymynyń alty tiline aýdaryp, dúnıe júzine taratý kerek.
Qazaqstandyq mádenıet degenimiz – eń aldymen qazaqtyń mádenıeti.
Endeshe, tól mádenıetimizdi jer júzine tanytýǵa aǵaıyndar da atsalysýy kerek.
Qazaqstan halqy Assambleıasynyń XXV sessııasyna sonaý Argentınada turatyn jerlesimiz kelip qatysty.
17 jyl buryn Almatydan kóshken nemis qyzy Qazaqstannyń mádenı ortalyǵyn quryp, ulttyq baıraq memorıalynda kók týymyzdy jelbiretip júr.
Osyndaı patrıottar barshaǵa úlgi.
Altynshydan, «Qazaqstandaǵy 100 jańa esim» jobasy Táýelsizdik jyldarynda jetistikke jetken otandastarymyzdy elge tanystyryp, úlgi etýdi kózdeıdi.
Biz 25 jyl ishinde ǵasyrǵa tatıtyn sharýa jasadyq. Qazaqstandy dúnıe júzine pash ettik. Elimizdiń deńgeıin kóterdik.
Qazaqstannyń kóptegen bastamasy álemde qoldaý taýyp, iske asýda.
Osy jyldar ishinde barshaǵa belgili bolǵan otandastarymyz da az emes. Solardy iriktep, attaryn álemge tanytý kerek.
Árbir azamattyń tabys joly – elimizdiń damý jolynyń kórinisi.
Olardy alystaǵy aǵaıyn bilýi qajet.
Sondaı-aq, ómir boıy syrtta júrse de, bilimi men biligi, óneri men daryny arqyly qazaqtyń atyn shyǵarǵan baýyrlaryn tarıhı Otany tanýǵa tıis.
Qaýymdastyqqa álemdegi tanymal qazaqtardyń elektrondy bazasyn daıyndaýdy tapsyramyn.
Bul shette júrgen aǵaıynmen san túrli salada yntymaqtastyq ornatyp, barys-kelisti jandandyrýǵa jol ashady.
Rýhanı jańǵyrý degen – búkil qazaqtyń jańǵyrýy, birlik degen – barsha qazaqtyń birligi.
Bul – negizgi másele. Bizdiń qol jetken tabysymyz el ishindegi tynyshtyq pen birliktiń arqasy.
Birligi joq elderde ne bolyp jatqanyn kórip otyrmyz. Qazaqtyń «Óser eldiń armany bitpes, óspes eldiń janjaly bitpes» degen ataly sózi bar.
Sondyqtan biz birlikti, sonyń ishinde qazaqtyń birligin saqtap kele jatyrmyz.
Tarıhqa kóz salsaq, qazaqtyń jeńilip, bireýge bodandyqqa túsýi tek qana ishten ydyrap, birliginen aıyrylǵan kezde bolǵan.
Kerisinshe, qazaq birikken kezde jeńip otyrǵan. Osyny umytpaýymyz kerek.
Qazirgi jahandaný dáýirinde rýhanı tutastyq qana qazaqty ǵasyrlar synynan súrinbeı ótetin Máńgilik El etedi.
Qadirli baýyrlar!
Ótken 20-shy ǵasyr qazaq úshin qııanatty, óte aýyr ǵasyr boldy. 1921-1930 jyldardaǵy ashtyqta qazaqtyń teń jartysynan aıyryldyq.
Kezinde ondaı jaǵdaı bolmaǵanda, qazir qazaqtyń sany 50-60 mıllıonnan asyp qalar edi.
Odan keıin repressııa boldy. 103 myń adam sottaldy. Qazaqtyń 65 myń betke ustar zııalysy tutqyndaldy. Onyń 25 myńy atyldy.
Qazaq úshin sóz aıta alatyn adamdardyń tamyryna balta shabylyp, joıyp jiberildi. Sol qıynshylyqtar kezinde qazaqtar jan saýǵalap, dúnıe júzine shashyrap ketti.
Myń ólip, myń tirilgen qazaq órkendep, qaıta ósip keledi.
Qazir 5 mıllıonnan astam qandasymyz shet memleketterde turyp jatyr.
Biz Táýelsizdik jyldarynda alystaǵy aǵaıyndy qoldaýdy esten shyǵarǵan emespiz.
Shetelden 1 mıllıonǵa jýyq qazaqty elge kóshirip alyp, qoldan keler barlyq kómegimizdi jasadyq.
Búginde baýyrlarymyz Qazaqstannyń azamaty atanyp, el damýyna óz úlesterin qosýda.
Kelgen aǵaıyndardyń ishinde kóptegen tanymal ǵalymdar, daryndy sportshylar men óner maıtalmandary bar.
Mysaly, boksshy Qanat Islam, ánshi Maıra Muhamedqyzy, ǵalym Qarjaýbaı Sartqojauly, Dúken Másimhan jáne basqa da kóptegen azamattardy ataýǵa bolady.
Sonymen birge, aǵaıyndar demografııalyq jaǵdaı jaqsaryp, halyq sanynyń ósýine erekshe yqpal etti.
1991 jyly elimizde qazaqtardyń úlesi 40 proentteı bolsa, qazir 70 proentten astyq.
Qymbatty otandastar!
20 ǵasyrda Soltústik Kavkazdan 550 myń adam, Qıyr Shyǵys pen Koreıadan 100 myń adam, Reseıdegi nemis ultynan 600 myń adam, evreıler men grekterden 1,5 mıllıondaı adam kúshtep kóshirilip, jasandy túrde kóp ultty elge aınaldyq.
Táýelsizdik alǵan jyldarda 17 mıllıonǵa tarta halqymyz bar edi. Odaq ydyrap, el sarsańǵa túskende, solardyń birazy elderine kóshti. Sodan biz 14 mıllıon bolyp qaldyq.
Alǵashqyda jyl saıyn 200 myńdaı bala dúnıege kelse, qazir jylyna 400 myńnan astam bala týady.
Men bıylǵy 1 shildede halqymyzdyń sany 18 mıllıonǵa jetedi dep jarııalaımyn.
Qandastarymyzǵa memleket pen qoǵam tarapynan jan-jaqty qoldaý men kómek kórsetý úshin myna jumystar qolǵa alynýy tıis.
Birinshiden, shettegi jáne elge kóship keletin aǵaıyndy qoldaý úshin «Otandastar» qoryn quramyz.
Qazaq bıznesmenderin osy qorǵa óz úlesterin qosýǵa shaqyramyn.
Muny uıymdastyrýdy Quryltaı basshylyǵyna, Prezıdent Ákimshiligine jáne Úkimetke tapsyramyn.
Qaýymdastyqtyń ofısin Almatydan Astanaǵa kóshiretin kez keldi.
Ekinshiden, qurylǵan Qor Dúnıejúzi qazaqtary qaýymdastyǵymen birlesip, otandastarǵa jan-jaqty qoldaý men kómek berýdiń is-sharalaryn anyqtap, soǵan sáıkes keshendi baǵdarlama ázirlesin.
Ol baǵdarlamada qazaqtyń kóshi men alystaǵy aǵaıynmen baılanystyń barlyq máseleleri qamtylýy kerek.
Baǵdarlamanyń basymdyqtary men mindetteri qor arqyly iske asyrylatyn bolady.
Úshinshiden, elim, jerim dep emirengen árbir qazaqqa Qazaqstannyń esigi árqashan aıqara ashyq. Eshkimge shekteý joq.
Biz kóship keletin aǵaıynǵa jol silteýdi turǵylyqty jerinen bastaýymyz kerek.
Elshilikter azamattardyń qujatyn qamdap, qonystanatyn jeri týraly keńes berýge tıis. Ony Syrtqy ister mınıstrligine tapsyramyn.
Sonda shekaradaǵy shyrǵalań da, elge kelgen soń qujat túgendeý úshin ary-beri sabylý da bolmaıdy.
Qytaı qazaqtarynyń sottalmaǵany týraly anyqtama alýy jaıy, aǵaıynnyń arǵy bettegi eńbek ótili eseptelmeýi sııaqty problemalar bar.
Úkimetke osynyń bárin keshendi túrde qaıta qarap, sheshimin tabýdy tapsyramyn.
Tórtinshiden, jastarǵa qoldaý kórsetý.
Biz sheteldegi qazaq balalarynyń Qazaqstanda bilim alýyna jaǵdaı jasaýymyz kerek.
Qazir olar memlekettik grantpen elimizdiń joǵarǵy oqý oryndarynda oqı alady.
Úkimetke otandastarymyzdyń joǵary bilim alýyn qoljetimdi etý úshin olarǵa bólingen kvotany 2 esege kóbeıtýdi tapsyramyn.
Qazir bilim men ǵylymǵa kóp kóńil bólip jatyrmyz. Osy jyldar ishinde 1 500 mektep salyndy. Zııatkerlik mektepter men joǵary oqý oryndaryn saldyq.
Sheteldik qazaq stýdentteri úshin bilimine qaraı arnaıy stıpendııalyq baǵdarlama engizý kerek.
Qaı eldiń azamaty bolsa da elde oqyǵan qazaq balasy erteń Qazaqstanǵa qyzmet etetinin este saqtaǵan jón.
Besinshiden, syrtta júrgen baýyrlardyń bir bóligi, ásirese, jastar assımılıaııaǵa túsip, ana tilin umytyp barady.
Biz buǵan ara túsýge tıispiz.
Úkimet sheteldegi qandastarymyz yqsham ornalasqan óńirlerde olardyń ana tilinde bilim alý múmkindikterin qarastyrýy kerek.
Qysqa merzim ishinde qazaq dıasporasyn gýmanıtarlyq baǵyttaǵy ádebıettermen, oqýlyqtarmen, ádistemelik quraldarmen qamtamasyz etýdi tapsyramyn.
Altynshydan, alystaǵy aǵaıyn elden turaqty habar alyp, baılanysta bolǵysy keledi. Qazaqstanda ne bolyp jatqanyn bilip, atqarylyp jatqan isterdi kórgisi keledi.
Qazir sheteldik kórermenderge arnalǵan KazakhTV telearnasy qandastarymyz turatyn aımaqtardyń birazyn qamtıdy.
Biraq, bul jetkiliksiz.
Úkimetke memlekettik telearnalardy irgeles elderde kórsetý múmkindikterin qarastyrýdy júkteımin.
Bul merzimdi baspasózge de qatysty.
Jetinshiden, kez-kelgen memleket kásibı, bilimdi, jańashyl mamandarǵa muqtaj.
Men tarıhı Otanyma eńbek sińiremin, onyń damýyna úles qosamyn degen árbir talantty qazaqty elge shaqyramyn.
Úkimet osyndaı azamattardy elge tartyp, mamandyǵyna, múmkindigine qaraı jaǵdaı jasaýdyń tetikterin qarastyrsyn.
Segizinshiden, biz arnaıy baǵdarlama qabyldap, ońtústiktiń turǵyndaryn soltústikke kóshirip jatyrmyz.
Aǵaıyndar eńbek kúshi az teriskeı jaqqa qonystanýǵa yntaly bolýy kerek.
Bul úshin kóship kelýshilerdiń jańa ortaǵa neǵurlym tez beıimdelýine jaǵdaı jasaýǵa tıispiz.
Ol jaqta beıimdeý ortalyqtary jumys isteýi qajet.
Kelgen aǵaıyndy qonystandyratyn úıler salyp, áleýmettik ınfraqurylym jasaý kerek. Ony baǵdarlama túrinde qolǵa alýymyz qajet.
Olardyń qajetti mamandyq alýyna járdem berilip, jumyspen qamtýdyń jol kartasy jasalsyn.
Osynyń bári – ultymyzdyń, elimizdiń jarqyn bolashaǵy úshin atqarylatyn mańyzdy sharalar bolmaq.
Ardaqty aǵaıyn!
Biz sizderdiń kelgenderińizge qýanamyz. Atajurtqa tarıhı otanymyz bar dep kelip otyrsyzdar.
Sondyqtan, dúnıe júzindegi qazaqtardyń basy qosylyp, elimizdiń órkendeýine atsalyssa eken deımin. Birligimiz ajyramasyn.
Qaýymdastyq qurylǵan kúnnen bastap oǵan ózim tóraǵalyq etip kelemin.
Men úshin shette júrgen baýyrlarǵa janashyr bolý – árbir qazaqstandyqqa qamqorlyq jasaýmen birdeı mańyzdy.
«Ár qazaq – meniń jalǵyzym» degen óleń jolyn quryltaı minbesinen álemdegi árbir qazaqqa joldaımyn.
Sizderge aıtarym, alystaǵy aǵaıynǵa meniń duǵaı sálemimdi jetkizińizder.
Qazaq balasy qaı elde tursa da Uly Dalada Máńgilik El quryp jatqan baıtaq Qazaqstannyń ajyramas bólshegi ekenin júreginiń tórinde ustasyn!
Quryltaı kúnde bolyp jatqan joq.
Asyqpaı Atamekende aýnap-qýnap, ásem Astanany kórińizder.
Álem nazaryn tikken EKSPO-ny tamashalańyzdar. Oǵan 115 memleket pen 22 halyqaralyq uıym qatysýda.
Biz eki-úsh jyldyń ishinde Astananyń bir aýdanyn salyp shyqtyq.
Bul sapar elmen etene tanysyp, oı túıer jemisti sapar bolsyn.
Búgin barsha qazaqtyń basyn biriktirer salmaqty oılar aıtylyp, izgi ister bastaý alaryna senimdimin.
Eki kúnnen soń barsha musylmandar úshin qasıetti aıt merekesi bastalady.
Biz umytylyp kete jazdaǵan ata dinimizdi qaıtaryp, Qazaqstanda 2,5 myńnan astam meshit ashtyq. Eldi ımandylyqqa shaqyryp kelemiz.
Biz ekstremızm men terrorızmge qarsy elmiz. Zaıyrly memleketpiz. Sol joldy ustanamyz. Órkenıetke, ǵylym men bilimge qol sozǵan elmiz.
Aıt qabyl bolsyn, jaratqan Qazaqqa jar bolsyn!
Qazaqstannyń táýelsizdigi máńgilik bolsyn!
Bizdiń kók baıraǵymyz máńgi jelbireı bersin!
* * *
Qurmetti otandastar!
Dúnıe júzindegi qazaqtar sany basqa eldermen salystyrǵanda kóp emes. Degenmen, eldiń deńgeıi halqynyń kóptigimen nemese azdyǵymen ólshenbeıdi. Eldiń sińirgen eńbegimen, sol elden shyqqan belgili adamdar men ǵalymdardyń jetistikterimen ólshenedi.
Sondyqtan, bar qazaqtyń basyn biriktirý – meniń Elbasy retindegi paryzym! Senimderińizge rahmet!
Qazaqstan – bárimizdiń ortaq Otanymyz.
Syrttaǵy aǵaıyn árdaıym kóńilimizdiń tórinde.
Búgin kóptegen máselelerdi talqyladyq. Usynystaryńyzdyń barlyǵy eskeriletin bolady.
Men Úkimetke birqatar tapsyrmalar berdim, ol meniń baqylaýymda bolady.
Jalpy, bul quryltaıdyń bereri az emes dep sanaımyn.
Qazaqta «barmasań, kelmeseń jat bolarsyń» degen sóz bar.
Sondyqtan, tek qana quryltaıǵa emes, ár ýaqytta kelip turyńyzdar. Bizdiń esigimiz árdaıym ashyq.
Shettegi árbir qandasymyz – qazaq eliniń bir túıirshigi.
Sizder eki el arasyndaǵy dáneker bolasyzdar.
Sheteldegi qazaqtar elge jıi kelip, týǵan jerge tamyr bekitip turǵany durys.
Sizder elge kelip kózaıym bolsańyzdar, men de syrttaǵy jastarymyzdyń oı órisin, bilim deńgeıin, bastysy, qazaqy bolmystaryn kórip, kóńilim tolyp otyr.
Osy qalyptan tanbańyzdar.
Qaıda júrseńizder de, arqa súıer Atamekendi, búkil qazaq qasıet tutar Qazaqstandy júrek tórine saqtap júrińizder.
Sonda ózderińiz de, urpaqtaryńyz da máńgi qazaq bolyp qalasyzdar.
Qazaq bolý – mártebe, maqtanysh, qazaq bolý – jaratqannyń syıy!
Osyny bárimiz de baǵalaı bileıik!
Biz sizderge tilekshimiz, árkez birgemiz.
Bárińizdi ata-babalar arýaǵy qoldasyn!
Elimiz aman, irgemiz tynysh bolsyn!
Kók baıraǵymyz bıikte jelbiresin!
Qazaqstannyń Máńgilik el bolýyna birlese atsalysaıyq!
