Búgin Halyqaralyq eskertkishter men tarıhı oryndar kúni. Bul mereke alǵash ret 1984 jyly atalyp ótilgen eken. IýNESKO janynan qurylǵan Halyqaralyq eskertkishter men kórnekti oryndardy qorǵaý máseleleri jónindegi keńes assambleıasy osy kúndi 1983 jyly bekitken.
Qazirgi ýaqytta osy uıymnyń qatarynda álemniń 175 memleketi bar. Dúnıejúzindegi 122 eldiń 754 tarıhı qundylyǵy IýNESKO tizimine engizilgen. 2003 jyly osy tizimge elimizdegi «Áziret Sultan» tarıhı-arhıtektýralyq kesheni men Almatyǵa taıaý Tańbaly tas shatqalyndaǵy jartastarǵa salynǵan sýretter toptamasy kirdi. Qazaqstanda ulttyq qundylyq bolyp esepteletin 25 myńnan astam tarıhı-mádenı eskertkish bar.
Osy aıtýly dataǵa oraı, Almaty qalasy Ortalyqtandyrylǵan kitaphana júıesi I.A.Krylov atyndaǵy qalalyq balalar kitaphanasynda «Jan azyq» atty ıntellektýaldyq saıys ótti. Bul saıysqa O.Jáýtikov atyndaǵy Respýblıkalyq mamandandyrylǵan daryndy balarǵa arnalǵan fızıka-matematıka orta mektep-ınternatynynan - «Qoja Ahmet Iassaýı», Sh. Smaǵulov atyndaǵy oblystyq mamandandyrylǵan daryndy balalarǵa arnalǵan fızıka-matematıka orta mektep- ınternatynan - «Altyn adam» jáne №81 mektep-gımnazııasynan - «Kúltegin» komandalary qatysty.
«Súırep qosqan tazy túlki almaıdy» - degen támsildi eskergen oqýshylar úzdik bolý úshin bar bilimderin ortaǵa saldy. Atap aıtqanda, led ekran arqyly elimizdiń tarıhı jerleriniń ataýlaryn durys taýyp, batyrlar jyryn jatqa aıtty. Jáne turaqty sóz tirkesteri men maqal-mátelderderdiń mán-maǵynasyn túsindirdi.
Jarys qortyndysy boıynsha «Kúltegin» komandasy úzdik shyqty. Al «Altyn adam» men «Qoja Ahmet Iassaýı» komandalary tıisinshe ekinshi jáne úshinshi oryndardy ıemdendi. Shara sońynda komandalarǵa Alhys hattar men syılyqtar tabys etildi.
Lázzát Muhtarqyzy SPATAEVA, Almaty qalasy Ortalyqtandyrylǵan kitaphana júıesi I.A.Krylov atyndaǵy qalalyq balalar kitaphanasynyń meńgerýshisi:
-Kitaphana ujymy oqyrmandarmen ásirese, osy jarysqa kelip otyrǵan mekteptermen tyǵyz qarym-qatynas ornatqan. Ataýly kúnder qarsańynda osyndaı sharalar ótkizip turýdy dástúrge aınaldyryp kelemiz. Búgin solardyń birine kýá bolyp otyrsyz. Qazirgi kezde balalarǵa ıntellektýaldy jarystarǵa qatysyp turǵany jaqsy. Osyndaı jarystar olardy shapshań oılaýǵa úıreteri sózsiz.
Jasulan NAÝRYZALIEV