I. Omarov atyndaǵy oblystyq qazaq drama teatrynda Táýelsizdiktiń 30 jyldyq mereıtoıy qarsańynda jazýshy-dramatýrg Qalıhan Ysqaq pen Shahımarden Qusaıynovtyń «Qazaqtar» atty tarıhı dramasynyń premerasy ótti. Qoıýshy-rejısseri – Qazaqstannyń Halyq artısi, Memlekettik syılyqtyń laýreaty Tuńǵyshbaı Jamanqulov.
Aıta keteıik, sońǵy jaǵdaılarǵa baılanysty teatrǵa kelýshiler «Ashyq» qosymshasy arqyly ǵana kirgizildi. Turǵyndar baǵdarlamanyń yńǵaıly, tıimdi ekenin aıtyp jatty.
Sonymen, qoıylym bastalmaı turyp, rejısserdi sózge tarttyq. Tuńǵyshbaı Jamanqulov tańdaýdyń nelikten «Qazaqtarǵa» túskenin aıtyp berdi.
«Teatr basshysy, ózimniń shákirtim Álimhan Myrzahan habarlasyp, teatr repertýaryna ultymyzdyń tarıhy, memlekettiliktiń bastaý alǵan kezeńderi sıpattalatyn, ata-babamyzdyń dástúri men turmysyn baıandaıtyn qoıylym engizsek degen usynysyn jetkizdi. Sol sátte oıyma birden Qalıhan Ysqaq pen Shahımardan Qusaıynov jazǵan «Qazaqtar» pesasy tústi. Men kezinde bul shyǵarmany ózim tapsyrys berip jazdyryp edim. Sondyqtan qostanaılyq kórermenniń nazaryna da usynaıyn dep sheshtim. Jyl basynan beri daıyndyq jumystarynda boldyq. Kele almaǵan sátterde telefon arqyly habarlasyp otyrdyq. Men kelgenshe trýppa pesanyń sózderin jattap, dekoraııany ázirlep qoıǵan eken. Sol sebepti biz birden sahnalyq jumystarǵa kirisip kettik», - deıdi halyq ártisi.
Shyǵarma jelisinde Kereı men Jánibek sultandardyń Qazaq handyǵyn qurýy, handyq qurý barysynda kezdesken qıyndyqtar, Qasym sultannyń qaıyspas qaısarlyǵy sheber sýretteledi. Drama jelisinde Ózbek hany Muhamed Shaıbanımen eki arada bolǵan jer bólisý, memlekettik qurylymdardy talqyǵa salyp, ıemdený sııaqty jáne basqa da máselelerdegi ózara kelispeýshilikter men qaıshylyqtar qoıylymǵa arqaý bolady. Ózbek hannyń quramynan bólinip shyqqan Shaıbanı urpaqtary bılik tizginin eshkimge bergisi kelmeıdi. Kereı han men Muhammad Shaıbanı arasyndaǵy tartys shyǵarmanyń negizgi arqaýy.
Kereı hannyń negizgi maqsaty – ult bolyp uıysý, jurt bolý.
Sahnada jarqyraı kóringen beıneniń biri – Qasym sultan. Árbir sózi kesekti, oıy myǵym, rýhy kúshti Qasym sultan keıinnen Qazaq handyǵynyń hany bolyp saılanady. Sahnadaǵy árbir keıipker ózinshe erekshelendi. Moıynsyz, Qoıgeldi, Toıgeldi, Molda, Ana, Nagıra haným, Mıhr haným, Sholpan, Gúlbahor, Dýana sarbaz erekshelendi.
Shyǵarmanyń sharyqtaý sheginde Shaıbanıler bılikti dıplomatııalyq tartyspen almaqshy bolady. Alaıda Qasym han Shaıbanılerge qarsy tabandy kúres júrgizedi. Han taǵynda otyryp Qasym han óziniń qalyń áskerine Shaıbanıler urpaqtaryna óziniń Qazaq handyǵynyń hany bolǵandyǵyn jetkizýdi buıyrady. Ejelgi Turan dalasyn máńgige Qazaqtyń enshisine qaldyratynyn jetkizedi. Qasym han taqqa otyryp, óziniń Qasqa jolyna qara halyqty shaqyrýmen pesa túıindeledi. Qazaq handyǵynynyń tarıhynda «Qasqa joldy Qasym hannyń» dáýiri bastalady.
