Şymkent qalasynyŋ bas imamy Baqdaulet Abdrahmanov Oraza aiynyŋ bırınşı künı koronavirusqa qarsy vaksina saldyrdy. Bas imamnyŋ igı ısın qoldai kelgen bır top dıni qyzmetker de qalalyq №13 emhanada infeksiiaǧa qarsy ekpe saldyrdy. Būl turaly qalalyq densaulyq saqtau basqarmasy habarlady.
Vaksina adam balasyna qajet azyq nemese aǧzaǧa quat beretın därumen emes ekenın aitqan qalanyŋ bas imamy adam denesıne inemen ekpe egu orazany būzbaitynyn atap öttı.
«Qūrmettı mūsylman jamaǧat! Qasiettı Ramazan aiynyŋ bırınşı künı özımnıŋ jäne halyqtyŋ densaulyǧy üşın alaŋdap, aldaǧy uaqytta jaǧdai jaqsarsyn degen jaqsy nietpen bır top imam bolyp vaksina saldyrdyq. Aldaǧy uaqytta jaǧdaiymyz jaqsaryp, qalypty ömırge keluı üşın jūmyla küresuımız kerek. Meşıtter aşylyp, qūlşylyq ǧibadatymyzdy jasasaq. Ramazan aiynda jasaǧan barşa amaldaryŋyz qabyl bolsyn», - deidı qalanyŋ bas imamy.
Aita keteiık, Şymkent qalasyndaǧy meşıtterde 260-qa tarta imam bar. Jergılıktı dıni qyzmetkerlerdıŋ barlyǧy Oraza aiynda kovidke qarsy vaksina saldyrudy josparlap otyr.
Şymkent qalasy äkımdıgınıŋ baspasöz qyzmetı
