Qar kóshkininiń júrý qaýpine baılanysty taý bókterlerine shyǵýǵa tyıym salynady. Almatyda aýa raıyna baılanysty eskertý jarııalandy, dep habarlaıdy Tótenshe jaǵdaılar departamentiniń baspasóz qyzmeti.
Departament taratqan málimetterge qaraǵanda, jylymyqtyń aıasynda jaýyn-shashynnyń túsýine jáne qar jamylǵysynyń turaqsyzdyǵy men bıiktiginiń joǵary bolýyna baılanysty Úlken jáne Kishi Almaty sý alabtarynda 21-22 sáýir aralyǵynda qar kóshkini qaýpi saqtalady.
«Kóshkin júrý qaýpi múmkin bolýyna baılanysty, qarly tik jartastarǵa shyǵýǵa bolmaıdy.Taýda abaı bolyńyzdar», – delingen vedomstvanyń habarlamasynda.
«Qazgıdromet» RMK derekterine súıensek, qalada aýa temperatýrasy tómendeýi múmkin.
«21 sáýirde Almatyda kúndiz jańbyr, qar jaýady dep kútiledi. Naızaǵaı oınap, burshaq jaýýy múmkin. Soltústik-shyǵystan soqqan jel, ekpini 10 m/s-den 23-28 m/s deıin. Aýa temperatýrasy túnde + 5, kúndiz +7 jyly bolady», – dep habarlaǵan bolatyn «Qazgıdromet» RMK fılıaly.
