Tokıo Olımpıadasy uıymdastyrý komıtetiniń dırektory Tosıro Mýto tórtjyldyqtyń basty básekesi kelesi jyly da ótpeı qalýy múmkin ekenin aıtty.
Keler jyldyń shilde aıyna deıin búkil álem pandemııany baqylaýda ustaı alady dep eshkim senimmen aıta almaıdy. Sondyqtan biz de sizderge naqty jaýap bere almaımyz. Jýyrda Olımpıada oıyndaryn bir jyl keıinge shegerýge sheshim qabyldaǵan bolatynbyz. Sol úshin de 2021 jylǵy Olımpıadany uıymdastyrýǵa bar kúshimizdi salyp jatyrmyz. Biz kelesi jyly adamzat koronavırýs krızısin jeńetinine sengimiz keledi. Balama josparlar týraly oılaýdyń qajeti joq dep esepteımin. Bar kúshimizdi daıyndyqqa jáne qazirgi máselelerdi sheshýge jumsaýymyz qajet. Adamzat bul indetti jeńý úshin bar bilimin paıdalanýy kerek, – deıdi Tosıro Mýto.
Aıta keteıik, buǵan deıin Halyqaralyq Olımpıada komıteti men Tokıo Olımpıadasynyń uıymdastyrý komıteti koronavırýs pandemııasyna baılanysty 2020 jylǵy jazǵy Olımpıada oıyndaryn 2021 jylǵa aýystyrǵan bolatyn.
Foto: ınternet jelisinen
