Ol bes jasynda Ábish Kekilbaevtyń shyǵarmashylyq keshinde óner kórsetip, onyń batasyn aldy. Arada jyl ótkende Batys Qazaqstan oblystyq qazaq drama teatrynda kórsetilgen «Qurmanǵazy» qoıylymynda bala Qurmanǵazynyń rólin somdady. Bul kúnderi Muhtar Áýezov atyndaǵy Qazaq memlekettik akademııalyq drama teatrynyń talantty, jas akterleriniń biri Abzalbek Ashatulynyń balalyq shaǵy osyndaı esten ketpes oqıǵalarmen bastalǵan. Jýyrda jas talantty ónerpazben suhbattasýdyń sáti túsken edi.
Adyrna: Jetken jetistikterińiz kisi qýantarlyq eken. Balalyq shaǵyńyzdan bastap, kásibı sahnaǵa qalaı kelgenińiz jaıly qysqasha aıtyp berseńiz?
Abzalbek Ashatuly: Alty jasymda mektepke bardym. Synyptastarymnan bir jas kishi bolǵan soń ba, boıym da shaǵyndaý boldy. Qoldy-aıaqqa turmaıtyn, jybyrlaq edim. Osyndaı keıpimdi kórip «qoıan bala» dep ázildeıtin. Bala kezde óner degen qol jetpes arman sııaqty kórinetin. Óse kele kórkem sóz oqýǵa daǵdylandym. Sonyń arqasynda ártúrli baıqaýlarǵa qatysyp júrdim. Mektepti bitirgen keıin 2010-2014 jyldary T.Júrgenov atyndaǵy Qazaq ulttyq óner akademııasynyń «mýzykalyq drama» mamandyǵy boıynsha bilim aldym. Úshinshi kýrsta oqyp júrgen kezde ustazym Nurǵanat Jaqypbaı aǵaıym tamasha tosyn syı jasap Astana Jastar teatrna jumysqa shaqyrdy. Alǵashqy kásibı sahnam osylaısha Jastar teatrynyń akteri bolýdan bastaldy.
Ómirderek:
Abzalbek Ashatuly 1993 jyly Batys Qazaqstan oblysy, Jympıdy jerinde dúnıege keldi.
2009 jyly O.Bókeı oqýlarynyń Gran-prı júldesin alǵan;
2009 jyly Atyraý qalasynda ótken Halyqaralyq Mahambet oqýlarynyń Gran-prı jeńip alǵan;
2010 jyly Respýblıkalyq ádebıet páni baıqaýynyń Gran-prı syılyǵyn ıelengen;
2013 jyly GITIS-te ótken (Máskeý) «rejıssýra jáne ádebıettaný» Halyqaralyq baıqaýynyń eń úzdik er adam nomınaııasynyń ıegeri atandy.
Adyrna: Qazaq teatrynyń qara shańyraǵyna aýysýyńyzǵa ne sebep boldy?
Abzalbek Ashatuly: Keıbir kisilerden ustazy Nurǵanat Jaqypbaımen kelispeı qalyp, M.Áýezov teatryna aýysyp ketipti degen sózdi de estip júrdim. Shyn máninde munda aýysý týraly oıymdy aıtqan kezde ol kisi kelisimin rızalyqpen bergen edi.
M.Áýezov teatryna aýysýyma sebep, úlken keńistik kerek boldy. Basqa teatrlardy kemitkenim emes, dese de M.Áýezov teatrnyń qalyptasqan bazasy bolsyn, sahnalyq úlgisi bolsyn basqalardan erekshe ekeni belgili. Sondyqtan osy teatrda óner kórsetýdi armandadym. Sabaqty ıne sátimen degendeı, birde Almatyda bir telesırııaldyń túsirilimine kelgen kezde, kastıng bolyp jatqanyn estip, kastıngke qatystym. Sonsoń ózińiz kórip otyrǵandaı akterler quramyna qosyldym.
Adyrna: Áýezov teatryndaǵy alǵashqy rólińizde ákeńiz Ashat Maemırovtyń «Qoshtasqym kelmeıdi» spektalinde basty keıipkerdiń biri – Mıtııany sátti somdap shyqtyńyz. Bul bir jaǵynan ózińdi kórsetýge jaqsy múmkindik bolsa, ekinshi jaǵynda týǵan ákeńizdiń aldynda úlken jaýapkershilik turdy. Oǵan syrt kóz synshylardy qosyńyz. Olaı deıtin sebebim, eger róldi durys oınap shyqpasań - ákesi balasynyń moınyna arqalaı almaıtyn júk salypty - deýshiler tabylatyn edi. Aıtpaǵym, osy róldi alyp shyǵý qanshalyqty qıyn boldy?
Abzalbek Ashatuly: «Týra bıde - týǵan joq, týǵandy bıde – ıman joq» demekshi, ónerde týysqandyqqa oryn joq dep oılaımyn. Ákem ónerge kelgende óte qatal kisi. Qoıylymǵa daıyndyq barysynda meni esh aıaǵan emes. Aıamaıdy da. Maǵan qatty zekip jatqan kezde, týǵan balasyna nege bulaı jasap jatyr dep qaraǵandar da boldy. Róldi alyp shyǵýda óte qatty qınaldym. Bir jaǵynan ákemniń baǵyty bólek boldy. Nurǵanat aǵaıdyń mektebinde kóbine adamnyń jan-dúnıesine mán beretinbiz. Al bul kiside jańasha qoıylym bolǵannan keıin, oıy basqasha boldy. Kóbine sezimge emes – sanaǵa áser bergisi keldi. Iaǵnı, kórermendi oıǵa qaldyrǵysy keldi.
Bul akterlikke bet burǵaly beri ákemmen alǵash ret jumys jasaýym edi. Taǵdyrdyń jazýy degen osy bolar. Ákem teatryndaǵy alǵashqy rólimde ákem ekeýmizdi bir sahnada kezdestirdi. Qoıylym aıaqtalǵanda áke úmitin abyroımen arqalaǵanyma qatty qýandym. Mennen baqytty adam bolmady sol kúni...
Adyrna: Akterler qaýymy báıge attar sııaqty ǵoı. Shapqan saıyn qyza túsedi. Alǵashqy synaqtan sátti óttińiz. Rejısser Alma Kákishovanyń «Almas qylysh»
tarıhı dramasyndaǵy Súıinshiktiń rólinde onyń qyzýqandylyǵyn, Baqtyqoja ekeýiniń aralaryndaǵy dıalogtaryn óte sátti shyǵardyńyz. Odan keıin tusaýy kesilgenine kóp bola qoımaǵan «Aqtastaǵy Ahıko» dramasynda Ahmettiń rólinde oınadyńyz. Osy spektakldi kórgen kópshilik Ahmettiń (Baıtursynov) rólin jas balaǵa nege bergen dep túsinbeı jatqandar boldy. Buǵan ne deısiz?
Abzalbek Ashatuly: Kóp kisiler áli de túsinbeı júr-aý deımin. Meniń somdaǵan rólim – aqyn Ahmet. Biraq ol kópshilik oılaǵandaı Ahmet Baıtursynuly emes, jalpy Alash arystarynyń jıyntyq róli bolatyn. Jas ereksheligi týraly maqtaýshylar da, synaýshylar da boldy. Meniń oıymsha árbir qoıylymda tájirıbeli akterlerdiń arasyna jastardy da oınatyp turýdy durys dep esepteımin. Úlkender jastyń jastyǵyn, al jastar olardyń tájirıbelerin alady dep esepteımin. Mysaly, men osy qoıylymda Dýlyǵa Aqmolda aǵamen seriktes (partner) boldym. Ol kisimen jumys istegen óte qatty unady. Toqmeıilsýdi bilmeıtin kisi bolǵandyqtan, kóp nárse úırendim. Áli de tájirıbe jınaý kerektigin túsindim. Jalpy akterdiń boldym, toldym degeni onyń toqtaǵany dep bilemin.
Adyrna: Qara shańyraqqa kelgeli teatr súıer qaýymǵa biraz tanylyp qaldyńyz. Ujymmen birge basqa oblystarǵa da sapar shektińiz. Degenmen halyqtyń kópshiligi teatrǵa bara bermeıdi. Sol sebepti akterlik qýatyńdy kıno óndirisine de jumsaý oıyńyzda joq pa?
Abzalbek Ashatuly: Oıymda bar. Biraq, bir nárseni aıtqym keledi, kınoǵa túsirý akterdi qunsyzdandyrady. Sondyqtan da bir jerde bir aıaǵyńmen nyqtap turýyń kerek. Sosyn ekinshi aıaqpen sharlaı berýge bolady. Kınoǵa túsip juldyz bolǵanyńmen, teatrdyń lázzátyna jetpeıdi. Teatr akterlerine qoldyń shapalaǵynan asqan mártebe joq dep esepteımin
Adyrna: Aqyry kıno týraly aıtyp qaldyq qoı. Qazir elimizdiń barlyq kınoteatrlarynda «Almas qylysh» fılmi kórsetilýde. Bireýlerge unap jatsa, bireýler qateligin taýyp jatyr. Akter retinde sizdiń pikirińizdi bilsek?
Abzalbek Ashatuly: Meniń oıymsha degbir soǵatyn eshteńe joq. On eki saǵattyq dúnıeni eki saǵatqa syıǵyzý múmkin emes. Sátti túsirilgen fılm dep esepteımin.
Adyrna: Kimdi úlgi tutasyz? « Áke kórgen oq jonar» degendeı, rejısser bolý oıyńyzda joq pa?
Abzabek Ashatuly: Ákemdi úlgi tutamyn. Ol kisi akterlik mamandyǵyn, magıstratýrasyn, odan doktorlyǵyn támámdady. Ǵylym men ónerdi qatar alyp kele jatyr. Men de sondaı dárejege jetkim keledi. Biraq rejısserlyqqa bet buram dep aıta almaımyn. Qazaq ulttyq óner ýnıvesrıtetiniń dramalyq rejısser mamandyǵynyń magıstrligin bitirdim. Buıyrsa doktorlyǵyna túsip, ǵylymmen de aınalysý josparda bar.
Teatr akterligimen qatar Temirbek Júrgenov atyndaǵy Qazaq ulttyq óner akademııasynda ustazdyq qyzmet atqaryp júrmin.
Adyrna: Aldaǵy ýaqytta kórermendi qandaı rolmen qýanpaqsyz?
Abzalbek Ashatuly: Erik Nursultannyń «Qyz Jibek» spektaklinde Tólegenniń, «Romeo men Djýletta» pesasynda Romeonyń róline daıyndalyp jatyrmyn.
Adyrna: Áńgimeńizge rahmet!
Áńgimelesken Jasulan NAÝRYZALIEV
