Búgin – qazaq halqynyń birtýar uldarynyń týǵan kúni. 22 naýryz kúni Ǵabıt Músirepovtiń týǵanyna 119 jyl, Marat Qabanbaevtyń ómir esigin ashqanyna 73 jyl, Jánibek Kármenovtiń dúnıege kelgenine 72 jyl tolyp otyr.
Ǵabıt Mahmutuly Músirepov – qazaqtyń halyq jazýshysy, dramatýrg, synshy, memleket jáne qoǵam qaıratkeri. Onyń qalamynan shyqqan «Oıanǵan ólke», «Jat qolynda», «Qazaq soldaty», «Ulpan», «Kezdespeı ketken bir beıne», ana taqyrybyna jazǵan áńgimeleri qazaq ádebıetiniń altyn qoryna qosylǵan baǵa jetpes týyndylar.
Marat Qabanbaev – jazýshy, pýblııst. Onyń shyǵarmalarynyń deni balalar men jasóspirimderge arnalǵan. Negizgi taqyryby: zaman kelbeti, jastardyń ómir-tirshiligi; ıdeıasy: adamdy súıý. «Baqbaq basy tolǵan kún» (1975), «Arystan, men, vıolenchel jáne qasaphana» (1977), «Jıhankez Tıtı» (1982), «Pysyq boldym, minekı» (1983), «Qala men qyz bala» (1984), «Qazaq, qaıda barasyń?» (1995), «Sýret salǵym kelmeıdi» (1995) atty povester men áńgimeler toptamalary, «Kórkem dám» (1977), «Aıshylyq alys jol» (1987) romandary jaryq kórdi.
Jánibek Kármenuly – ánshi, jazýshy, qazaq KSR-iniń eńbek sińirgen ártisi. Ol ózindik án oryndaýshylyǵymen erekshe kózge tústi, kóptegen halyq kompozıtorlarynyń shyǵarma ómiri men murasyn nasıhattaý jáne olardyń umytylǵan án mátinderin qalpyna keltirý isine mol úles qosty. Óner taqyrybyna arnalǵan kitaptary (“Aqylbaıdyń áni”, ”Ǵashyqtyń tili”, “Mahabbat áni”) jaryq kórdi.
«Adyrna» ulttyq portaly
