Itke talanǵan áıel dárigerlerdiń kesirinen qolynan aıyryldy

1648
Adyrna.kz Telegram

Qaraǵandy oblysynda aýyl turǵyny dárigerlerdiń jaıbasarlyǵynan qolynan aıryldy. Jaryq kentinde ıtke talanǵan áıel jedel járdemdi bir jarym saǵat kútken, dep habarlaıdy KTK arnasy.

Dárigerler janarmaı joq degen syltaýmen ýaqyt sozypty. Aqyry jedel járdem kóligin aýylda qýyp júrip toqtatqanymen, odan qaıyr bolmaǵan.

Qansyraǵan kelinshekti týystary aýdan ortalyǵyna ózderi jetkizgenimen, jasýshalary jansyzdanǵan qoldy kesýge týra kelgen. Al naýqastyń ózi jáne týystarynyń aıtqanyn dárigerler joqqa shyǵaryp otyr.

Aıǵanym Datkınany shynjyrdan bosap ketken óz ıti talap jatqanda kómekke kórshisi Berikbol kelgen. Áıeldiń qolyn tistep jaǵy qarysqan ıt sál bolmasa keńirdekten alar edi deıdi. Attandap kelip qolyna túsken temirmen soqqanda, ıt tura qashqan.

Tapa-tal túste azan-qazan bolǵandar Aıǵanymdy úıge kirgizgenimen, qandy toqtata almapty. Al jedel járdem shaqyrtqanymen, sol kúıi kelmegen. Janushyrǵandar aýyldaǵy emhanaǵa barsa, esigi jabyq bolǵan. Al bas dárigerge qońyraý shalǵanmen "Aqordada tanysym bar" dep murnyn shúıirgen basshysynyń qonaqtan qoly bosamaǵan.

"Bastyǵy Baıǵalıeva Juldyz Shabdanovnaǵa habarlassa, ol kisi qonaqta otyrmyn degen kórinedi. "Men Qoshanov turǵanda qoryqpaımyn, sender ne isteı alasyńdar?" deıdi. Jedel járdem eshteńe daıyn emes. Jasýshasyn saqtap qalatyn, muzdatatyn dári, preparattar bolý kerek qoı. Qandy toqtatatyn ekpe de bolýy tıis. Onyń eshteńesi der kezinde jasalmaǵan", – deıdi naýqastyń sińilisi Baıan Mámıtova.

Týǵandar Aıǵanymdy kólikke salyp, jedel járdemdi aýyl ishindegi bir qıylysta qýyp jetip ustaǵan. Alaıda ishindegi eki feldsher naýqasqa ıne sala almaǵan. Sóıtip, ony qansyrap jatqan Aıǵanymǵa naýqastyń óz kelini Ulbazar ekken.

Kómek kútýmen eki-úsh saǵat ýaqyt joǵaltyp jetken aýdandyq aýrýhanadaǵylar qoldy aman alyp qala almaǵan.

"Aýdan ortalyǵyna kelgennen keıin naýqasqa dıagnoz qoıylyp, ota jasaý qajet boldy. Biraq týystary aýdan aýrýhanasynyń jaǵdaıynda ota jasaýdan bas tartqan soń, naýqasty hýrýrg, anestezıolog dárigerlermen birge Qaraǵandy qalasyna jetkizý týraly sheshim qabyldandy. Sol kúni naýqasqa ota jasaldy, qazir naýqastyń jaǵdaıy turaqty", – deıdi oblystyq densaýlyq basqarmasyna qarasty ahýal ortalyǵynyń qyzmetkeri Dýlat Janabek.

Qazir Aıǵanymnyń qoly ıyǵynan short kesilgeni bolmasa, jaǵdaıy turaqty. Týystary aýyldaǵy aq halattylar jumysyna jaýappen qarasa, qolyn aman alyp qalýǵa bolar edi deıdi.

Oqı otyryńyz: "Bir atqanda ólmedi": Tarazda ápkesine qonaqqa kelgen áıel qapyda qaza boldy

Al dárigerlerdiń aıtýynsha, jedel járdem naýqastyń úıine jarty saǵatta kelgen. Biraq naýqasty jiberýden ózderi bas tartypty-mys. Tipti, ózimizdi tildedi dep, dárigerler polıııaǵa aryz túsirip úlgeripti.

Endigi jerde oqıǵanyń búge-shúgesin oblystaǵy densaýlyq saqtaý basqarmasy jasaqtaǵan arnaıy komıssııa men tártip saqshylary anyqtaýy tıis.

Aýyldaǵy ambýlatorııanyń bas dárigerine eldiń ókpesi qara qazandaı. Baltyry syzdaǵandar bylaı tursyn, júkti áıel jolda bosanyp jatsa da miz baqpaıtyn kórinedi. Sondyqtan taǵaıyndalǵan tekseris bas dárigerdiń "tiregine" qaramastan, aýyldaǵy ahýaldy jaqsarta ma dep úmittenedi.

Pikirler