قاراعاندى وبلىسىندا اۋىل تۇرعىنى دارىگەرلەردىڭ جايباسارلىعىنان قولىنان ايرىلدى. جارىق كەنتىندە يتكە تالانعان ايەل جەدەل جاردەمدى ءبىر جارىم ساعات كۇتكەن، دەپ حابارلايدى كتك ارناسى.
دارىگەرلەر جانارماي جوق دەگەن سىلتاۋمەن ۋاقىت سوزىپتى. اقىرى جەدەل جاردەم كولىگىن اۋىلدا قۋىپ ءجۇرىپ توقتاتقانىمەن، ودان قايىر بولماعان.
قانسىراعان كەلىنشەكتى تۋىستارى اۋدان ورتالىعىنا وزدەرى جەتكىزگەنىمەن، جاسۋشالارى جانسىزدانعان قولدى كەسۋگە تۋرا كەلگەن. ال ناۋقاستىڭ ءوزى جانە تۋىستارىنىڭ ايتقانىن دارىگەرلەر جوققا شىعارىپ وتىر.
ايعانىم داتكينانى شىنجىردان بوساپ كەتكەن ءوز ءيتى تالاپ جاتقاندا كومەككە كورشىسى بەرىكبول كەلگەن. ايەلدىڭ قولىن تىستەپ جاعى قارىسقان يت ءسال بولماسا كەڭىردەكتەن الار ەدى دەيدى. اتتانداپ كەلىپ قولىنا تۇسكەن تەمىرمەن سوققاندا، يت تۇرا قاشقان.
تاپا-تال تۇستە ازان-قازان بولعاندار ايعانىمدى ۇيگە كىرگىزگەنىمەن، قاندى توقتاتا الماپتى. ال جەدەل جاردەم شاقىرتقانىمەن، سول كۇيى كەلمەگەن. جانۇشىرعاندار اۋىلداعى ەمحاناعا بارسا، ەسىگى جابىق بولعان. ال باس دارىگەرگە قوڭىراۋ شالعانمەن "اقوردادا تانىسىم بار" دەپ مۇرنىن شۇيىرگەن باسشىسىنىڭ قوناقتان قولى بوساماعان.
"باستىعى بايعاليەۆا جۇلدىز شابدانوۆناعا حابارلاسسا، ول كىسى قوناقتا وتىرمىن دەگەن كورىنەدى. "مەن قوشانوۆ تۇرعاندا قورىقپايمىن، سەندەر نە ىستەي الاسىڭدار؟" دەيدى. جەدەل جاردەم ەشتەڭە دايىن ەمەس. جاسۋشاسىن ساقتاپ قالاتىن، مۇزداتاتىن ءدارى، پرەپاراتتار بولۋ كەرەك قوي. قاندى توقتاتاتىن ەكپە دە بولۋى ءتيىس. ونىڭ ەشتەڭەسى دەر كەزىندە جاسالماعان", – دەيدى ناۋقاستىڭ ءسىڭىلىسى بايان ءماميتوۆا.
تۋعاندار ايعانىمدى كولىككە سالىپ، جەدەل جاردەمدى اۋىل ىشىندەگى ءبىر قيىلىستا قۋىپ جەتىپ ۇستاعان. الايدا ىشىندەگى ەكى فەلدشەر ناۋقاسقا ينە سالا الماعان. ءسويتىپ، ونى قانسىراپ جاتقان ايعانىمعا ناۋقاستىڭ ءوز كەلىنى ۇلبازار ەككەن.
كومەك كۇتۋمەن ەكى-ءۇش ساعات ۋاقىت جوعالتىپ جەتكەن اۋداندىق اۋرۋحاناداعىلار قولدى امان الىپ قالا الماعان.
"اۋدان ورتالىعىنا كەلگەننەن كەيىن ناۋقاسقا دياگنوز قويىلىپ، وتا جاساۋ قاجەت بولدى. بىراق تۋىستارى اۋدان اۋرۋحاناسىنىڭ جاعدايىندا وتا جاساۋدان باس تارتقان سوڭ، ناۋقاستى حۋرۋرگ، انەستەزيولوگ دارىگەرلەرمەن بىرگە قاراعاندى قالاسىنا جەتكىزۋ تۋرالى شەشىم قابىلداندى. سول كۇنى ناۋقاسقا وتا جاسالدى، قازىر ناۋقاستىڭ جاعدايى تۇراقتى", – دەيدى وبلىستىق دەنساۋلىق باسقارماسىنا قاراستى احۋال ورتالىعىنىڭ قىزمەتكەرى دۋلات جانابەك.
قازىر ايعانىمنىڭ قولى يىعىنان شورت كەسىلگەنى بولماسا، جاعدايى تۇراقتى. تۋىستارى اۋىلداعى اق حالاتتىلار جۇمىسىنا جاۋاپپەن قاراسا، قولىن امان الىپ قالۋعا بولار ەدى دەيدى.
وقي وتىرىڭىز: ء"بىر اتقاندا ولمەدى": تارازدا اپكەسىنە قوناققا كەلگەن ايەل قاپىدا قازا بولدى
ال دارىگەرلەردىڭ ايتۋىنشا، جەدەل جاردەم ناۋقاستىڭ ۇيىنە جارتى ساعاتتا كەلگەن. بىراق ناۋقاستى جىبەرۋدەن وزدەرى باس تارتىپتى-مىس. ءتىپتى، ءوزىمىزدى تىلدەدى دەپ، دارىگەرلەر پوليتسياعا ارىز ءتۇسىرىپ ۇلگەرىپتى.
ەندىگى جەردە وقيعانىڭ بۇگە-شۇگەسىن وبلىستاعى دەنساۋلىق ساقتاۋ باسقارماسى جاساقتاعان ارنايى كوميسسيا مەن ءتارتىپ ساقشىلارى انىقتاۋى ءتيىس.
اۋىلداعى امبۋلاتوريانىڭ باس دارىگەرىنە ەلدىڭ وكپەسى قارا قازانداي. بالتىرى سىزداعاندار بىلاي تۇرسىن، جۇكتى ايەل جولدا بوسانىپ جاتسا دا ءمىز باقپايتىن كورىنەدى. سوندىقتان تاعايىندالعان تەكسەرىس باس دارىگەردىڭ "تىرەگىنە" قاراماستان، اۋىلداعى احۋالدى جاقسارتا ما دەپ ۇمىتتەنەدى.
