BIR-BIR UShAQ USTAIDY ÁÝEJAIDA...
Premer-mınıstrge jáne onyń tórt orynbasaryna jeke-jeke ushaq qarastyrylǵan. Sózim dáleldi bolýy úshin sýretti qosa usynyp otyrmyn. Bir qyzyǵy, Úkimettiń avıaııalyq shyǵyndary esh jerde aıtylmaıdy. Prezıdenttiń is basqarmasyna qaraıtyn «Berkýt» avıakompanııasynyń saıtyna kirip kórińiz, sýper-djetter týraly bir túıir aqparat joq.
Jyl saıyn halyqtan jasyryp jumsaıtyn mıllıardtar týraly bilgińiz kelse tolyq oqyp shyǵyńyz.
Men otyrǵan myna ushaqtyń quny 140 mıllıon dollar turady. 2015 jyly shyǵarylǵan. Dál osyndaı sý jańa sý murynnyń tórt túrine otyryp retsiz rásýalarǵa kýáger boldyq.
Rásýá deıtinim, mynaý turǵan Qaraǵandyǵa ushaq aldyrǵan «kókelerdi» kórdik. Taldyqorǵanda otyryp tıip turǵan Almatyǵa ushaq aldyrǵan sátterge men ǵana emes, tanymal blogerler de kýá.
Áýelde mundaı VIP samaletterdiń ishinde sýretke túsýge tyıym salyndy. Sebebi, Úkimet múshelerimen birge júrgendikten halyqqa shalqyǵan ómirdiń sátterin shyǵarmańdar degen buıryq tústi. Bir qyzyǵy, osyndaı jyly-jumsaǵy jaıylǵan ushaqtarmen 2 jylǵa jýyq toqtaýsyz ushyppyn.
Sonymen, Úkimet músheleriniń avıaparki qaı jerde ornalasqan. Astanadaǵy áýejaıdyń arǵy betine barsańyz VIP-termınal tur. Ol jerde Úkimet múshelerine jáne forbs tizimindegi baı-manaptarǵa kúndiz-túni qyzmet kórsetiledi.
Premer-mınıstr Asqar Mamınniń ushaǵyna artyq adam otyrmaıdy. Máselen, óńirlerge jumys sapary kezinde vıe-premerlerge bólek bıznes-ushaq qarastyrylǵan. Oǵan mınıstrlerdiń mińgesýine ruqsat.
Biraq, Beıbit Atamqulov sekildi mıllıarder mınıstrler men «Samuryq-qazynanyń» Esimov sekildi jetekshi menedjerleri jekemenshik kompanııalarǵa tapsyrys beredi.
Bıznes sanattaǵy ushaqtyń 1 saǵaty kemi 5000 evrodan bastalady. 10 saǵat jaldasańyz 50 000 evro. Ulttyq valıýtamen esepteseńiz shamamen 25 mıllıon teńge. Bul-bir baǵyttyń ǵana shyǵyny. Al, halyqaralyq ushýlar quny 40 000 evrodan bastalady. Jylyna keminde ishki jáne syrtqy 30-40 jumys sapary josparlanady. Onyń shyǵynyn esepshotqa soǵa berińiz. Somasy mıllıardtardy quraıdy. Sonymen, ushaqtan qushaqqa sekirip júrgen Úkimet músheleriniń avıaııalyq shyǵyndary týraly beıresmı derek joq emes, bar.
Premer-mınıstrdi, 4 vıe-premerdi jáne mınıstrlerdi, Senat pen Májilis tóraǵalaryn týda-sıýda tasymaldaýǵa jyl saıyn Respýblıkalyq bıýdjetten 15 000 000 000-20 000 000 000 (on bes-jıyrma mıllıard teńge) qarastyrylady. Prezıdenttiń is basqarmasyna qaraıtyn «Berkýt» avıakompanııasy memlekettik dep kórsetilgen. Iaǵnı, sany kóp sapasy joq Úkimettiń aspandaǵy ermegine halyqtyń esebinen suraýsyz aqsha alý úrdisi 20 jyldan beri jalǵasyp keledi.
«Habar» men «Qazaqstannyń» jańyltpash jańalyqtaryn qarap otyrsańyz Asqar Mamın túske deıin Túrkistanda, tústen keıin Qaraǵandyda, keshkisin Kókshetaýdy alataýdy aıyryp, qarataýdy qaıyryp júr degen qyrtymbaı sıýjetterdi kúnde kóresiz.
Bir mezette Eraly Toǵjanov Atyraýda, Álıhan Smaıylov Almatyda, Roman Sklıar Petropavlda júr degen jańalyqty da jıi estısizder. Bylaı qarasań, Úkimet únemi ushyp-qonyp júredi.
«Erikken sart enegin ýqalasa», bizdiń erikken Úkimet sidik shaptyrym jerge samaletpen saırań salýdy unatady.
Qyzmet qunyna qunarly taǵammen qosa, qyzyl-qara ıkra, araq-vıskı, ekzotıkalyq jemis-jıdek usynylady.
Ortasha eseppen alsaq, sońǵy on jylda kelip-ketip jatqan paıdasy kók tıyn Úkimettiń ushyp-qonýyna ǵana 200 000 mıllıard teńgege jýyq aqsha bıýdjetten shyǵyndalypty.
Buǵan 19 mınıstrliktiń komandırovochnyı shyǵyndaryn qosyńyz.
Máselen, Beıbit Atamqulov basqaratyn Indýstrııa jáne ınfraqurylymdyq damý mınıstrligi issapar shyǵyndaryna 250-300 mıllıon teńgege deıin qarastyrǵan.
Uzyn sózdiń yrǵasy Úkimet halyqty emes, halyq Úkimetti asyrap otyr. Mılıardtap ushaqqa, mıllıondap mashınaǵa, paıyzdap premıaǵa, bylapytta aılyqqa aıaýsyz aqsha jumsaıdy.
Salystyrmaly túrde: Qazaqstanda jylyna 30-40 áıel úshem týady eken. Sol úshem týǵan analarǵa qazaqsannyń kez-kelgen qalasynan kezeksiz páter berilsin degen usynys bolyp edi. Sol ýaqytta, Úkimet basyndaǵy sabazdar úshem týatyn sanaýly áıeldiń shyǵynyn aýyrsynyp bas tartqan bolatyn.
Basqasyn ózińiz oılaı berińiz........
Aıtpaqshy, ushaq ishindegi basqa da qyzyqqa toly sýretter men vıdeolardy aldaǵy ýaqytta bólisemin. Ázirge, osyny ózara bólise berińizder.
Erbol Mándibek, jýrnalıst
