Jákeń birden iske kiristi. Qatelespeppin. Baıden oryntaǵyna otyra sala eki bilegin túre iske kiristi.
Djozef Baıden alǵashqy kúnderden - aq shalaǵaı Tramptyń shıki zańdaryn keri qaıtardy.
Pýtınge zvandady, qońyraýlatyp, ony biraz silkidi.
Ekeýiniń áńgimelesken temalary mynadaı: "Amerıkaǵa jasalǵan kıberatakanyń artynda turǵan sender ǵoı"
"Aýǵanstandaǵy AQSh áskerıleriniń basy úshin Reseı syıaqy taǵaıyndady ma?"..
"Navalnyı nege ýlandy?"... t.b.
Men Pýtınniń ornynda bolsam, bundaı áńgimeden soń biraz terlep - tepship, júzim qabaryp shyǵar edi. Ol da sóıtken shyǵar. Ózine ózi kelip kóńilin basýy úshin seıildep shyǵyp, ıadrolyq zymyrandarynyń shańyn súrtip qoıdy ma, kim bilsin... Jalǵyz aldanyshy sol...
Sizder qalaısyzdar ma, qalamaısyzdar ma, ol óz erkińiz, biraq aqıqat bireý.
AQSh búginde halyqaralyq jandarm rólinde otyr.
Áskerı, ekonomıkalyq, ǵylymı taǵy basqa kóptegen salalarda ázirshe oǵan teń keler el joq. Ony moıyndamasańyz basqa planetaǵa kóshińiz.
Qazir sarapshylar arasynda "qudiretti AQSh qaıta oraldy" degen sóz shyǵyp jatyr. Ol ras. Kúlli jahan boıynsha ol qubylys sezilip jatyr.
Al "Amerıkany uly derjava qylamyn" degen popýlıst Tramptyń tusynda osy AQSh tyń qaı tesikke túsip ketkenin bir qudaı bilsin.
Tramp demekshi... osynda, osy Tramptan Qytaımen alysqan qaharman jasap oǵan tabynyp júrgender - men úshin: ne AQSh tarıhynan, ne syrtqy geosaıası jaǵdaıdan habary joq toǵyshar tobyr ǵana.
Sebebi, Amerıka tarıhyn biletin adam biledi;
Onyń Qytaıǵa qarsy geosaıası áreketi sonaý ótken ǵasyrdyń 50 jyldarynan bastalady. Prezıdent Nıkson odaqtasy - Sıngapýrge kelgende Qytaı týraly suraıdy eken. Karter kelse de sol áńgime, Reıgan kelse de Lı Kýan Iý men sol áńgime. Ony Lı Kýan Iý kitabynda jasyrmaı jazady.
Is júzinde Lı amerıkandyqtardyń sol mańdaǵy toqyldaǵy bolypty.
Amerıkandyqtar sol zamannan beri Tynyq muhıtta Qytaıǵa qarsy áskerı qamal turǵyzyp tastady.Jalpy, Amerıkanyń Qytaıdyń kúnshyǵysynda ornalasqan áskerı kúshimen ınoplanetıandarmen soǵysýǵa bolady.Tynyq muhıt jaǵalaýyndaǵy elderdiń aýmaǵynda AQSh tyń áskerı bazasy joq el joq dese de bolady. Ol jerde bári Amerıkanyń odaqtasy. AQSh tyń jahanda 50 den asa áskerı odaqtasy bar eken.
Eger sol odaqtastardyń birine Qytaıdan áskerı qaýip tónse, neshe mınýtte qaı el iske kirisedi, neshe sekýntte qaı odaqtas qaı soǵysqa aralasady, onyń bári bul elderdiń arasyndaǵy ózara kelisimsharttarda jazylyp tur.Al AQSh tyń ondaǵy áskerı qudireti tipti sumdyq, zamanaýı avıanoseteriniń eki - úsheýi (AQSh ta onyń 12 si bar) mundaı jaǵdaıda júzip kelip Qytaıdyń kúnshyǵysyn bombylap japyryp óte alady eken. Qytaıda ondaı áskerı kúsh joq ázirshe.Bir sózben aıtsaq, Qytaıdyń shyǵysy - tutas temir qamal.
Iaǵnı, AQSh Qytaıǵa qarsy óz saıasatyn 70 jyl buryn eseptep shyǵyp, ony batyl quryp kele jatyr. Ol endi amerıkandyq qaıratker prezıdentterdiń ortaq eńbegi.
Endi mynaý shıki Tramp kelip sońǵy kezde kúsheıip turǵan Qytaıdy túrtpektep, bir mezette sankııa salyp, sol sátte ózi bir aıaǵymen bultaqtap Qytaıda turǵan Gonkongty julyp almaqshy bolyp shatyldy. Onyń nátıjesi keri áser berip sumdyq boldy.
Osy jerde mysal úshin mynany aıtaıyq; Batystyń Reseıge sankııa salǵanyna bıyl 7 jyl bolypty. Endi bir 7 jyldan soń Batys Reseı aımaqtarynyń azattyǵy týraly áńgime kóterse bolady eken.
Bul sondaı uzaq merzimge arnalǵan saıasat edi negizi... Sony saýdager Tramp óziniń 4 jyl merziminde istemekshi bolyp, kúsheıip turǵan Qytaıǵa soqtyǵyp Gonkongtan aıyrylyp, bylyqtyrdy.
Qysqasy, Tramptyń qateleri jetedi.
Sony Baıden dereý jóndep jatyr.
Jalpy, Baıdenniń Reseıge qarsy ustanymy, álemdegi dıktatorlar basqarǵan mesheý elderge qatysty saıasaty da qatań bolady dep jobalap otyrmyn. Ol endi óz aldyna uzaq áńgime.
Baıden ózi naǵyz amerıkandyq adýyndy prezıdent bolsa, ózi ıdeıalyq demokrat bolsa, ol basqa ne isteýshi edi. Ol olardy qýyrady.
Sondyqtan álemdegi elderin menshiktep alǵan dıktatorlardyń kózderi qazir alaq - julaq etip, olarǵa jóndep as batpaı júrgenine men senimdimin.
Uzyn sózdiń qysqasy, Djozef Baıden keldi, otyrdy, iske kiristi.
Baıqaıyq, kóreıik.
Oljas Ábil,
"Adyrna" ulttyq portaly
