Búgin — belgili aqyn, Qazaqstan Jazýshylar odaǵynyń múshesi, memlekettik «Daryn» jastar syılyǵynyń jáne «Altyn qalam» qoǵamdyq syılyǵynyń ıegeri Aqberen ELGEZEKTIŃ týǵan kúni.
Ol 1980 jyly dúnıege kelgen. Semeı oblysy Shubartaý aýdany Mádenıet aýylynda E.Rahmadıev atyndaǵy orta mektepti bitirgen. Ál-Farabı atyndaǵy QazUÝ-diń tarıh fakýltetiniń túlegi.
«Adyrna» ulttyq portaly aqynnyń bir top óleńderin nazarlaryńyzǵa usynady.
Aqıqat
Oralmaı qap keshki bir serýenderden,
Qumǵa sińip, qıraǵan kerýendermen,
Bul jalǵandy súımegen muńlyqtarmen,
Kún astynda qaqtalǵan qurlyqtarmen,
Shyndyq úshin baz keshken shahıttermen,
Tamshylarda tuńshyqqan muhıttarmen,
Kúdikterden mertikken armandarmen,
Shyń basynda entikken ormandarmen,
Aq paraqqa túspegen dastandarmen,
Aq bulttary adasqan aspandarmen,
Shylymdarmen eń sońǵy, shegilmegen,
Burymdarmen keýdege tógilmegen,
Sońǵy beıne saqtalǵan taspalarmen,
Sahnalarda taptalǵan maskalarmen...
Bizdiń basqa qonbaǵan baqytpenen,
Tekten-tekke órtengen ýaqytpenen,
Kúnniń nury syrǵyǵan silemdermen,
Oranyp ap jap-jańa kilemdermen,
Iegińmen sońǵy túk tebindegen,
Kóılek kıip eń sońǵy kebin degen,
Moıyndardy qajaǵan qamyttarmen,
Qaıyńdardan qashalǵan tabyttarmen,
Tabandarǵa qadalǵan jańqalarmen,
Qushaqtasyp qýraǵan qańqalarmen,
Taram-taram súrleýler, tarmaqtarmen,
Bizden buryn attanǵan arýaqtarmen,
Bir ókinish ańqyǵan kelbetińnen,
Joǵalamyz bir kúni jer betinen!
JUBATÝ
Jyla, Janym!
Jalqy muńly,
jasyrmaı solqylyńdy,
qozdyrshy qanymdaǵy altynymdy!...
Jyla, Janym!
Bezgekteı qalshyldashy!
Jalyndap jalqyn shashym,
mańdaıymnan
Jazmyshymnyń jazýy jarqyldasyn!
Jyla, jyla!
Tek, jasyńdy kórsetpeshi!..
Mynaýyń bir ez ǵoı dep, el sókpesin!
Syrtym – adam, al, ishim – jaraly qus...
Jasaǵan-aı, qusymdy emdep bershi!..
Já, qoı endi, jylamashy!
Eshkimdi keshirmeshi!
Sen – máńgilik Táńirdiń Esindesiń!
Kúlshi, qane, qushaqtap kóleńkeńdi!
Ol da kúlsin... «Kúleıik, dosym!»-desin...
Telefon
Meniń telefonymda - bolashaq arýaqtardyń aty-jónderi,
nómirleri jazýly,
Olardyń ishinde aǵalarym da bar,
inilerim de bar azýly,
Olardyń ishinde
qatal apalarym da bar,
botalarym da bar maqtaýly,
dos-qastarymnyń da,
qaryndastarymnyń da nómirleri saqtaýly.
Olar bir birimen xabarlasyp jatady,
Dabyrlasyp jatady kúni-tún,
Olarmen sóılessem degen meniń de bar úmitim.
Eshqaısysyna qońyraý shalmaımyn,
súıkeı salmaımyn nómirin,
Súıkeı salsamshy, suraı salsamshy kóńilin.
Olar da maǵan xabarlaspaıdy,
qońyraý shalmaıdy, keńesip,
Ózderi ǵana sóılese beretinderi,
sóılese beretinderi ne osy?!
Eshkim maǵan xabarlaspaıdy,
Men de eshkimge xabarlaspaımyn, o, nesi?!
...Ólip qalǵan joqpyn ba, albasty basyp, men osy?!..
Seni súıý...
Seni súıý – tynyshtyqpen tildesý,
Seni súıý – únsizdikpen úndesý.
Seni súıý – nur taratý júrekke,
Seni súıý – qýanyshtan muń keshý!
Seni súıý – shýaq shashý janardan,
Seni súıý – jupar jutý samaldan.
Seni súıý - óz ózińdi umytý,
Tabý bálkim óz ózińdi joǵalǵan.
Seni súıý – shyq bop tuný kúltede,
Seni súıý – shoq bop turý biltede.
Seni súıý – bar baılyqtan bas tartyp,
Sýretińdi salyp jatý kúrkede.
Seni súıý – jan aldynda aqtalý,
Seni súıý – jyndanýǵa shaq qalý.
Seni súıý – qasiretten baq tabý,
Seni súıý – azaptardan shattaný!
Seni súıý – óz órtińnen jalyndaý,
Seni súıý – ózge jandy saǵynbaý.
Seni súıý – músinińe bas uryp
Múlde basqa qudyretke tabynbaý!
Seni súıý – perishtege aınalý,
Seni súıý – elesterge baılaný.
Seni súıý – qaýyzynda gúlderdiń,
Dir-dir etip, kóbelekshe oılaný!
Seni súıý – ajalymnan qutylý,
Seni súıý – ajaryńnan tutylý.
Seni súıý – qanatyna qustardyń,
Úlbiregen qaýyrsyn bop jutylý!
Seni súıý – máńgilikke umtylý,
Seni súıý – myń jyǵylyp, myń turý.
Seni súıý – enip ketip kirpikke,
Batyp ketý kózderińe sup-sulý!
Mama
Men seni Táńirden suradym, mama,
Osy arýdyń qursaǵyna bitemin dep.
Men sen úshin talaı jyladym, mama,
Aqynnyń anasy bop ótedi dep.
Men seni jubata almaımyn, mama,
Araıly bir tańyń atady dep.
Men bul ómirdi unata almaımyn, mama,
Qabyrǵama bar muńy batady kep.
Men ómirdi sonda da súıippin, mama,
Syzdaıdy tek ishte, jaram ǵana.
Men bar muńnan bıikpin, mama,
Men úshin alańdama!
Bul ómirde qaı aqyn jaryǵan, mama?
Júrgen soń taǵdyrdyń ótinde kóp.
Bar bolmysym ózińnen daryǵan, mama,
Sen ǵaryshty týǵanyńa ókinbe tek.
Sen meni qazaqqa syıladyń, mama,
Ǵajaptardan qaǵylsań da.
Men seni azapqa qımadym, mama,
Qansha jyl saǵynsam da.
Áıtpese, bilseń ǵoı, janym, mama,
Ishim meniń – sheksiz álem.
Bul meniń sorym ári baǵym, mama,
Janarymdaǵy óksik óleń.
Ishim meniń gúlderge toly ǵoı, mama,
Nurǵa da toly júregim aq.
Bizdiń taǵdyr – azap joly ǵoı, mama,
Áıteýir tilegim aq.
Ákem – Táńir, óziń – Umaısyń, mama,
Al, men – Qudaıdyń balasymyn.
Sen báribir maǵan unaısyń, mama,
Kózimdegi qarashyǵym..!
«Adyrna» ulttyq portaly
