Reseı depýtattary birinen keıin biri Qazaqstanmen baılanysty terrıtorııalyq máseleniń shetin shyǵara bastady.
Keshe V.Mıronovtyń taǵy bir sandyraǵyn tyńdap tań qaldym. Ol KSRO-ny emes, Reseı ımperııasyn aıtyp otyr eken. Tyńdaı kele, onyń oıy KSRO sııaqty jańa odaq qurý emes, 21-ǵasyrda «Táýelsiz Qazaqstannyń óz erkimen Reseı ımperııasyna qaıta qosylýy» týraly máseleni kóterip otyrǵany anyq baıqaldy.
V.Mıronov óziniń «Reseıge qosý» týraly sandyraq áńgimesinde Ózbekstan, Grýzııa, Prıbaltıka elderi týraly sóz qozǵaýdan meılinshe qashqaqtap, máseleni tek Qazaqstanǵa qaraı burýmen boldy...
Árıne, onyń «argýmenti» onyń shalasaýatty bilimine saı «KSRO zańyna súıenetindikten», ol bul zańnyń kúshi burynǵy barlyq Odaqtas Respýblıkalarǵa da qatysty «qoldanylatynyn» ashyq aıtýy kerek edi. Biraq oǵan onyń júregi daýalamady.
Sol arqyly ol «Reseı ázirge tek Qazaqstanǵa ǵana álimjettik jasaýǵa qaýqarly» degen oıdy aıtty dese bolady...
Nege? Ókinishti jeri de osy Qazaqstan BUU quramyndaǵy, Halyqaralyq kelisimsharttarǵa qoly qoıylǵan, Reseımen shegarasy moıyndalǵan, tipten, Reseımen kepildikke otyrǵan jáne Eýrazııalyq ekonomıkalyq odaqqa, Kedendik odaqqa enip ketken el emes pe edi?
Endeshe, Óz basyna taǵy bir agressor degen jaman ataqty ilý Reseıge ne úshin qajet? degen suraq týatyny zańdy..
Endi ol Reseıdiń óziniń «bas aýrýy» dep qoıalyq ta, biz onyń sebebin ózimizden izdep kóreıik...
Sonda, onyń eń basty sebebi retinde olıgarhııa máselesi alǵa shyǵady eken...
Álemde Qoǵam men memleketterdiń damý zańdylyqtary týraly nebir teorııalar bar. Olardyń kóbi tarıhı turǵyda dáleldenip, qazir klassıkalyq teorııa retinde moıyndalǵan. Sonyń biri - Olıgarhııalyq memleket.
Onyń basty belgileriniń biri - Olıgarhııalyq basqarý júıesindegi memlekettiń qaýipsizdiginiń óte tómen bolýy.
Sebebi, mundaıda Olıgarhııa men Memlekettik damý arasynda ortaq maqsat bolmaıdy.
Halyqtyq memlekettiń maqsaty - ózin ózi nyǵaıtý bolsa, Olıgarhııalyq memlekettiń maqsaty - memleketti olıgarhııa maqsatyna baǵyndyrý.
Árıne, bul olıgarhııalyq maqsatta da "memleketti nyǵaıtý" túsinigi bar. Biraq ol "memleketti baılyq kózi retinde qoldaný" baǵytynda ǵana júzege asady.
Sondyqtan, naqty bir jaǵdaılarda olıgarhııalyq júıe "memlekettik qorǵanysty" ózderiniń jeke múddelerine aıyrbastap jiberý qaýpi joǵary bolady.
Eger bul jaǵdaı memlekette ornyqsa, onda oǵan qarsy syrtqy kúshter ashyqtan ashyq boı kótere bastaıdy...
Mundaı tásildi AQSh 20-shy ǵasyr boıy álemde nátıjeli qoldandy...
Ol týraly "Ispoved ekonomıcheskogo ýbııy" atty kitapta jaqsy baıandalǵan...
Endi mine, Reseı kesh te bolsa, osy tásildi kórshisine qoldanǵysy keletinin kórsetti...
Ol múmkin, bizdegi Ulttyq (memlekettik) múdde baǵytynyń álsiregeniniń belgisi bolar bálkim?
Sizder qalaı oılaısyzdar?
Ábdirashıt BÁKIRDIŃ jazbasynan.
"Adyrna" ulttyq portaly.
Foto ashyq derekkózden alyndy.
